ໃນຕອນຄໍ່າຂອງວັນທີ 17 ກັນຍາ 2023 ຢູ່ທີ່ສູນປະຊຸມສາກົນ ໂຮງແຮມລີ້ຢວນ, ທ່ານນາຍົກລັດຖະມົນຕີ ສອນໄຊ ສີພັນດອນ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບທ່ານ ຫຼານ ທ່ຽນ ລີ້, ປະທານເຂດປົກຄອງຕົນເອງຊົນເຜົ່າຈ້ວງກວາງຊີ, ສປ ຈີນ ພ້ອມດ້ວຍຄະນະ. ກ່ອນອື່ນ, ທ່ານນາຍົກລັດຖະມົນຕີ ໄດ້ສະແດງຄວາມຂອບໃຈມາຍັງ ທ່ານປະທານເຂດປົກຄອງຕົນເອງເຜົ່າຈ້ວງກວາງຊີ ແລະ ຄະນະຮັບຜິດຊອບຈັດງານ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ອຳນວຍຄວາມສະດວກໃຫ້ ແກ່ການຢ້ຽມຢາມຂອງຄະນະໃນຄັ້ງນີ້ ພ້ອມທັງ ສະແດງຄວາມຊົມເຊີຍ ຕໍ່ຜົນສຳເລັດຢ່າງຮອບດ້ານ ໃນການພັດທະນາເສດຖະ ກິດ-ສັງຄົມ ຂອງເຂດປົກຄອງຕົນເອງຊົນເຜົ່າຈ້ວງກວາງຊີ ເຊິ່ງເຫັນວ່າ ເປັນເຂດໜຶ່ງທີ່ມີການພັດທະນາໄວໃນ ສປ ຈີນ. ສໍາລັບການເປັນເຈົ້າພາບຈັດງານວາງສະແດງສິນຄ້າ ແລະ ກອງປະຊຸມສຸດຍອດການຄ້າ-ການລົງທຶນ ອາຊຽນ-ຈີນ ຄັ້ງທີ 20 ນີ້ ເປັນການສືບຕໍ່ຈາກການວາງສະແດງໃນຫຼາຍຄັ້ງຜ່ານມາ ເພື່ອສົ່ງເສີມການພົວພັນຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ເຕັກໂນໂລຊີ, ການແລກປ່ຽນຂໍ້ມູນຂ່າວສານ ແລະ ອື່ນໆ ລະຫວ່າງ ສປ ຈີນ ແລະ ບັນດາປະເທດອາຊຽນ. ພ້ອມນີ້ ແຂວງກວາງຊີ ຍັງຖືວ່າເປັນຂົວຕໍ່ອັນສຳຄັນ ກັບບັນດາປະເທດ ອາຊຽນ ແລະ ເປັນປະຕູທາງຜ່ານ ຈາກອາຊຽນເຂົ້າສູ່ປະເທດຈີນ.ໃນໂອກາດນີ້, ທ່ານ ນາຍົກລັດຖະມົນຕີ ໄດ້ຕີລາຄາສູງ ແລະ ເຊື່ອໝັ້ນວ່າ ການເປັນເຈົ້າພາບຈັດງານວາງສະແດງສິນຄ້າ ຈີນ-ອາຊຽນ ໃນຄັ້ງນີ້ ຈະເປັນການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍການພົວພັນຮ່ວມມື ລະຫວ່າງ ສປ ຈີນ ແລະ ບັນດາປະເທດໃນອາຊີຕາເວັນອອກສ່ຽງໃຕ້ ໃຫ້ນັບມື້ໄດ້ຮັບໝາກຜົນຕົວຈິງຫຼາຍກວ່າເກົ່າ. ສ່ວນການຮ່ວມມືຂອງສອງປະເທດ ເຫັນວ່າສອງພັກ, ສອງລັດ ແລະ ປະຊາຊົນສອງຊາດ ໄດ້ຮັບການສືບຕໍ່ເສີມຂະຫຍາຍຢ່າງບໍ່ຢຸດຢັ້ງ ແລະ ລົງເລິກໃນວຽກງານຕົວຈິງຫຼາຍດ້ານ ໂດຍສະເພາະ ແມ່ນການສືບຕໍ່ປະຕິບັດຂໍ້ລິເລີ່ມ (ໜຶ່ງແລວ ໜຶ່ງເສັ້ນທາງ) ຂອງ ສປ ຈີນ ເຂົ້າກັບຍຸດທະສາດການຫັນປະເທດ ທີ່ບໍ່ມີຊາຍແດນຕິດຈອດກັບທະເລ ມາເປັນປະເທດເຊື່ອມໂຍງເຊື່ອມຈອດກັບພາກພື້ນ ເວົ້າລວມ, ເວົ້້າສະເພາະ ຕະຫຼອດໄລຍະຜ່ານມາ ສປປ ລາວ ແລະ ແຂວງກວາງຊີ ໄດ້ມີການຮ່ວມມືກັນຢ່າງໃກ້ຊິດ, ຊ່ວຍເຫຼືອສະໜັບສະໜູນເຊິ່ງກັນ ແລະ ກັນ.
ການແລກປ່ຽນການຢ້ຽມຢາມ ຂອງການນຳຂັ້ນສູງສອງຝ່າຍ ກໍ່ດຳເນີນໄປຢ່າງເປັນປົກກະຕິ ແລະ ໄດ້ເພີ່ມຂຶ້ນໃນແຕ່ລະປີ ລວມທັງ ການຊ່ວຍເຫຼືອພັດທະນາ ແລະ ບໍາລຸງສ້າງຊັບພະຍາກອນມະນຸດໃຫ້ ແກ່ ສປປ ລາວ. ສໍາລັບການຮ່ວມມືໃນຕໍ່ໜ້າ ແມ່ນຈະໄດ້ສືບຕໍ່ປະຕິບັດການຮ່ວມມືສອງປະເທດລາວ-ຈີນ ກໍ່ຄື ລະຫວ່າງ ສປປ ລາວ ກັບ ແຂວງກວາງຊີ ໂດຍຖືເອົາການຕົກລົງເປັນເອກະພາບ ຂອງສອງເລຂາທິການໃຫຍ່ ເປັນທິດຊີ້ນໍາ, ຜັນຂະຫຍາຍ ແລະ ຈັດຕັ້ງປະຕິບັດ ໃຫ້ເກີດດອກອອກຜົນ ເປັນຮູບປະທໍາ ແລະ ມີປະສິດທິຜົນ; ໂດຍອີງໃສ່ມູນເຊື້ອປະຫວັດສາດ ທີ່ມີການພົວພັນກັນມາແຕ່ດົນນານນັ້ນ ໃຫ້ສືບຕໍ່ແລກປ່ຽນການຢ້ຽມຢາມການນໍາແຂວງກວາງຊີ ແລະ ບັນດາແຂວງກ່ຽວຂ້ອງຂອງລາວ; ສືບຕໍ່ຖອດຖອນບົດຮຽນ ການພັດທະນາຊົນນະບົດ ແລະ ລຶບລ້າງຄວາມທຸກຍາກ ໃຫ້ແກ່ ສປປ ລາວ; ລວມທັງ ສະເໜີໃຫ້ມີນະໂຍບາຍພິເສດໃຫ້ແກ່ສິນຄ້າກະສິກຳຈາກ ສປປ ລາວ ໃຫ້ສາມາດເຂົ້າມາຈຳໜ່າຍຢູ່ ສປ ຈີນ ແລະ ຊ່ວຍ ສປປ ລາວ ໃນການຍົກສູງຄຸນນະພາບການຜະລິດສິນຄ້າກະສິກຳ, ປັບປຸງການປູກພືດກະສິກຳທີ່ມີທ່າແຮງ ແລະ ມີຜົນຕອບຮັບທີ່ສູງຂຶ້ນ ດ້ວຍການຮ່ວມມືກັນໃຫ້ເລິກເຊິ່ງ; ສົ່ງເສີມ ແລະ ນຳໃຊ້ກົນໄກຮ່ວມມື ລະຫວ່າງບັນດາແຂວງພາກເໜືອຂອງລາວ ກັບແຂວງກວາງຊີ ເພື່ອຊຸກຍູ້ການຮ່ວມມືຮອບດ້ານ; ຊຸກຍູ້ບັນດາວິສາຫະກິດທີ່ມີທຶນຮອນ, ມີປະສົບການ ແລະ ມີຄວາມສາມາດ ໄປລົງທຶນ ຫຼື ຮ່ວມທຸລະກິດຢູ່ລາວຫຼາຍຂຶ້ນ ໂດຍສະເພາະ ແມ່ນການປຸງແຕ່ງກະສິກຳ ແລະ ການຜະລິດອຸດສາຫະກຳ ທີ່ລາວມີທ່າແຮງ; ສືບຕໍ່ໃຫ້ການຊ່ວຍເຫຼືອສ້າງຊັບພະຍາກອນມະນຸດໃຫ້ ສປປ ລາວ; ຄຽງຄູ່ກັບການຍົກສູງການຮ່ວມມື ດ້ານການທ່ອງທ່ຽວ ລະຫວ່າງສອງຝ່າຍໃຫ້ຫຼາຍຂຶ້ນ ໂດຍສະເພາະແມ່ນການນຳໃຊ້ເສັ້ນທາງລົດໄຟ ລາວ-ຈີນ, ການນຳໃຊ້ເສັ້ນທາງດ່ວນ ລາວ-ຈີນ ແລະ ເສັ້ນທາງອື່ນໆ. ໃນປີ 2024 ຈະເປັນປີທ່ອງທ່ຽວຂອງ ສປປ ລາວ ຫວັງວ່າ ອໍານາດການປົກຄອງເຂດປົກຄອງຕົນເອງຊົນເຜົ່າຈ້ວງກວາງຊີ ຈະມີນະໂຍບາຍສະໜັບສະໜູນ ເພື່ອເຮັດໃຫ້ການທ່ອງທ່ຽວສອງຝ່າຍ ມີບັນຍາກາດອັນໃໝ່. ພ້ອມກັນນີ້, ໄດ້ຕາງໜ້າພັກ-ລັດຖະບານ ແລະ ປະຊາຊົນລາວ ຂໍສະແດງຄວາມຂອບໃຈມາຍັງການນໍາຂອງເຂດປົກຄອງຕົນເອງຊົນເຜົ່າຈ້ວງກວາງຊີ ຕໍ່ການສະໜັບສະໜູນ, ການຊ່ວຍເຫຼືອອັນລໍ້າຄ່າ ແລະ ມີຜົນປະໂຫຍດຫຼາຍໆດ້ານ ໃຫ້ແກ່ ສປປ ລາວ.
ໃນໂອກາດດຽວກັນ, ທ່ານ ປະທານເຂດປົກຄອງຕົນເອງເຜົ່າຈ້ວງກວາງຊີ ກໍ່ໄດ້ສະແດງຄວາມດີໃຈເປັນຢ່າງຍິ່ງ ແລະ ຍິນດີຕ້ອນຮັບທ່ານ ນາຍົກລັດຖະມົນຕີ ພ້ອມດ້ວຍຄະນະທີ່ເດີນທາງ ມາເຂົ້າຮ່ວມງານວາງສະແດງສິນຄ້າ ຈີນ-ອາຊຽນ ຄັ້ງນີ້, ພ້ອມທັງ ໄດ້ຕີລາຄາສູງຕໍ່ການຍົກລະດັບ ສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ເວົ້າລວມ, ເວົ້າສະເພາະ ແມ່ນການພົວພັນຮ່ວມມື ລະຫວ່າງ ເຂດປົກຄອງຕົນເອງຊົນເຜົ່າຈ້ວງກວາງຊີ ກັບ ສປປ ລາວ ເຊິ່ງມີປະຫວັດສາດ, ສາຍພົວພັນມິດຕະພາບ ອັນເປັນມູນເຊື້ອມາແຕ່ດົນນານ; ສະແດງຄວາມດີໃຈ ແລະ ຕີລາຄາສູງ ທີ່ເຫັນວ່າການຮ່ວມມືຂອງສອງປະເທດ ນັບມື້ນັບໄດ້ຮັບການຂະຫຍາຍຕົວຢ່າງບໍ່ຢຸດຢັ້ງ ເວົ້້າລວມ, ເວົ້າສະເພາະ ແມ່ນການຮ່ວມມືລະຫວ່າງ ເຂດກວາງຊີ ແລະ ສປປ ລາວ ແມ່ນໄດ້ການເພີ່ມທະວີ ແລະ ນັບມື້ນັບເຂົ້າສູ່ລວງເລິກຕົວຈິງ ໂດຍສະເພາະ ການຮ່ວມມືທາງເສດຖະກິດ, ການຄ້າ, ການລົງທຶນ, ການທ່ອງທ່ຽວ ແລະ ກະສິກໍາ ຮ່ວມກັນ ລວມທັງ ຈະສືບຕໍ່ຊ່ວຍເຫຼືອໃນການສ້າງຊັບພະຍາກອນມະນຸດ ໃຫ້ແກ່ ສປປ ລາວ. ພ້ອມທັງ ຢືນຢັນວ່າຈະຮ່ວມກັບພາກສ່ວນກ່ຽວຂ້ອງຂອງລາວ ສືບຕໍ່ແລກປ່ຽນການຢ້ຽມຢາມເຊິ່ງກັນ ແລະ ກັນ ເພື່ອຮັດແໜ້ນການພົວພັນຮ່ວມມື ແລະ ຖອດຖອນບົດຮຽນ ໃນຂົງເຂດທີ່ທັງສອງຝ່າຍມີທ່າແຮງ ແລະ ໃຫ້ຄວາມສົນໃຈນຳກັນ ລວມທັງ ສ້າງຕັ້ງກົນໄກການຮ່ວມມື ເພື່ອຄວາມສະດວກໃນ ການປະສານງານ ແລະ ຊຸກຍູ້ການພົວພັນຮ່ວມມື ໃຫ້ແໜ້ນແຟ້ນຍິ່ງຂຶ້ນ ແລະ ຈະສືບຕໍ່ຊຸກຍູ້ບັນດາບໍລິສັດ, ນັກລົງທຶນຂອງແຂວງກວາງຊີ ໄປຢ້ຽມຢາມ ແລະ ສຶກສາ ເບິ່ງຄວາມເປັນໄປໄດ້ ໃນການຮ່ວມມືດ້ານການລົງທຶນ ແລະ ດໍາເນີນທຸລະກິດ ຢູ່ ສປປ ລາວ.
ໃນໄລຍະທີ່ເຄື່ອນໄຫວຢູ່ແຂວງກວາງຊີ, ທ່ານນາຍົກລັດຖະມົນຕີ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ໄປຢ້ຽມຢາມ ສູນຂໍ້ມູນຂ່າວສານ ຈີນ-ອາຊຽນ ແລະ ເຂົ້າຮ່ວມເປັນສັກຂີພິຍານ ໃນພິທີລົງນາມເຊັນ MOU ລະຫວ່າງ ສະພາການຄ້າ ແລະ ອຸດສາຫະກຳແຫ່ງຊາດລາວ ກັບສູນຂໍ້ມູນຂ່າວສານ ຈີນ-ອາຊຽນ ຕື່ມອີກ.
ຂ່າວ;ພາບ: ກົມປະຊາສຳພັນ ສຫນຍ
