ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ທ່ານ ຮໍຊຽນ ອາມິຣ ອັບດໍລລາຫຽນ ລັດຖະມົນຕີການຕ່າງປະເທດ ອີຣານ ຢັ້ງຢືນວ່າ: ອີຣານ ພ້ອມແລ້ວທີ່ຈະຊ່ວຍສ້າງຕັ້ງການພົວພັນຢ່າງສະໜິດສະໜົມລະຫວ່າງບັນດາປະເທດໃນພາກພື້ນກັບ ສະຫະພາບເອີຣົບ (ອີຢູ). ຕາມຖະແຫຼງການຂອງກະຊວງການຕ່າງປະເທດ ອີຣານ ໃຫ້ຮູ້ວ່າ: ທ່ານ ຮໍຊຽນ ອາມິຣ ອັບດໍລລາຫຽນ ໄດ້ຍົກອອກຄຳປາໄສດັ່ງກ່າວ ໃນການພົບປະກັບ ທ່ານ ລຸຍຈິ ດີ ໄມໂອ ຜູ້ຕາງໜ້າພິເສດຂອງ ອີຢູ ຢູ່ເຂດອ່າວເປີເຊຍ ທີ່ນະຄອນຫຼວງ ເຕເຮຣານ ຂອງອີຣານ.
ຂ່າວລະບຸວ່າ: ທ່ານ ຮໍຊຽນ ອາມິຣ ອັບດໍລລາຫຽນ ໃຫ້ຮູ້ວ່າ: ອີຣານ ຊົມເຊີຍ ບໍ່ວ່າຂໍ້ລິເລີ່ມໃດຂອງ ອີຢູ ທີ່ແນໃສ່ເພີ່ມທະວີການຮ່ວມມືລະຫວ່າງ ສະຫະພາບເອີຣົບ ກັບບັນດາປະເທດໃນພາກພື້ນ. ສ່ວນຜູ້ຕາງໜ້າພິເສດຂອງ ອີຢູ ໄດ້ເນັ້ນໜັກວ່າ: ເວທີປາໄສສົນທະນາ ແລະ ຮ່ວມມືລະຫວ່າງບັນດາປະເທດໃນພາກພື້ນແມ່ນມີຄວາມສຳຄັນ. ທ່ານ ລຸຍຈິ ດີ ໄມໂອ ຖືວ່າ: ການຫັນການພົວພັນລະຫວ່າງ ອີຣານ ແລະ ຊາອຸດິດ ອາຣັບບີ ເປັນປົກກະຕິ ແມ່ນເພື່ອຜົນປະໂຫຍດຂອງພາກພື້ນ.
