ຂ່າວຕ່າງປະເທດລາຍງານ ໃນວັນທີ 11 ກັນຍາ ຜ່ານມາ, ກະຊວງພະລັງງານ ແລະ ໂຄງສ້າງພື້ນຖານຂອງອິດສະຣາແອນໄດ້ອອກຖະແຫຼງການໂດຍລະບຸແຜນການເຊື່ອມຕໍ່ເຄືອຂ່າຍໄຟຟ້າຂອງປະເທດເຂົ້າກັບແຫຼ່ງພະລັງງານໝູນວຽນ ຊຶ່ງສ່ວນຫຼາຍເປັນພະລັງງານແສງຕາເວັນ ຄິດເປັນປະລິມານຫຼາຍກວ່າ 2.000 ເມກະວັດ.
ຖະແຫຼງການລະບຸວ່າ: ການຕັດສິນໃຈດັ່ງກ່າວຈະເຮັດໃຫ້ບໍລິສັດການໄຟຟ້າແຫ່ງອິດສະຣາແອນ (IEC) ສາມາດເຊື່ອມຕໍ່ກັບແຫຼ່ງພະລັງງານໝູນວຽນຂະໜາດໃຫຍ່ຫຼາຍແຫ່ງ ຊຶ່ງສ່ວນຫຼາຍຕັ້ງຢູ່ທາງພາກ ເໜືອ ແລະ ພາກໃຕ້ຂອງປະເທດ ນຳມາສູ່ການສົ່ງເສີມການຜະລິດພະລັງງານໝູນວຽນທົ່ວປະເທດ. ປະຊາຊົນທົ່ວອິດສະຣາແອນຈະສາມາດເຂົ້າຮ່ວມການປະຕິວັດພະລັງງານໝູນວຽນ ສາມາດສ້າງກຳໄລຈາກການຕິດຕັ້ງອຸປະກອນພະລັງງານແສງຕາເວັນພາຍໃນດິນຂອງຕົນເອງ ແລະ ມີສ່ວນຮ່ວມໃນການປ່ຽນຜ່ານສູ່ເສດຖະກິດພະລັງງານສະອາດທີ່ມີການແຂ່ງຂັນ ແລະ ແຜ່ກະຈາຍອຳນາດໃນອະນາຄົດອັນມໍ່ໆນີ້.
ຂະນະດຽວກັນ, IEC ຈະສົ່ງເສິີມແຜນການພັດທະນາເຄືອຂ່າຍໄຟຟ້າ ມູນຄ່າປະມານ 1,7 ໝື່ນລ້ານເຊເກວ (ສະກຸນເງິນອິດສະຣາແອນ) ຊຶ່ງມຸ່ງເນັ້ນຈັດຕັ້ງແຫຼ່ງພະລັງງານໝູນວຽນແຫ່ງໃໝ່ທົ່ວປະເທດພາຍໃນປີ 2030.
