ການແຂ່ງຂັນເທັນນິດແກຣນສະແລມສຸດທ້າຍຂອງປີ ລາຍການ ຢູເອັດ ໂອເພັນ 2023 ທີ່ສະໜາມອາເທີ ແອດ ສະເຕດ້ຽມ ເມື່ອຕອນເຊົ້າວັນທີ 11 ກັນຍາ 2023 ເປັນການແຂ່ງຂັນໃນຮອບຊີງຊະນະເລີດ ປະເພດຊາຍດ່ຽວ ລະຫວ່າງ ໂນວັກ ຢໍໂຄວິດ ມື 2 ຂອງໂລກຈາກແຊກບີ ພົບກັບ ດານີວ ເມັດເວເດບ ມື 3 ຂອງໂລກຈາກຣັດເຊຍ.
ສະຖິຕິການພົບກັນມາທັງໝົດ 14 ຄັ້ງ ເປັນ ໂນວັກ ຢໍໂຄວິດ ທີ່ມີສະຖິຕິເໜືອກວ່າ ເກັບໄຊໄປໄດ້ 9 ຄັ້ງ ສ່ວນ ດານີວ ເມັດເວເດບ ຊະນະ 8 ຄັ້ງ ໂດຍຄູ່ນີ້ເຄີຍດວນກັນໃນ ລາຍການ ຢູເອັດ ໂອເພັນ ມາແລ້ວ 1 ຄັ້ງ ໃນຮອບຊີງຊະນະເລີດ ເມື່ອປີ 2021 ແລະ ເປັນ ດານີວ ເມັດເວເດບ ທີ່ເອົາຊະນະໄປໄດ້ 3-0 ເຊັດ ຄວ້າແຊ໋ມໄປຄອງ.
ສ່ວນຜົນການແຂ່ງຂັນໃນນັດນີ້ ປະກົດວ່າ ໂນວັກ ຢໍໂຄວິດ ເກັບໄຊຊະນະໄດ້ເໜືອກວ່າ ດານີວ ເມັດເວເດບ ໄປແບບຂາດຮອຍ 3-0 ເຊັດ 6-3, 7-5 ແລະ 6-3 ຄະແນນ ຄວ້າແຊ໋ມ ຢູເອັດ ໂອເພັນ 2023 ໄປຄອງໄດ້ສຳເລັດ ໄດ້ຮັບເງິນລາງວັນ 3 ລ້ານໂດລາສະຫະລັດ ພ້ອມທວງຄືນໝາຍເລກ 1 ຂອງໂລກອີກຄັ້ງ. ຊຶ່ງການຄວ້າແຊ໋ມໃນຄັ້ງນີ້ ຖືເປັນແຊ໋ມລະດັບແກຣນສະແລມທີ 24 ຂອງ ໂນວັກ ຢໍໂຄວິດ ແລະ ເປັນສະຖິຕິການຄອງແຊ໋ມຫຼາຍທີ່ສຸດຕະຫຼອດການ ພ້ອມເປັນແຊ໋ມແກຣນສະແລມທີ 3 ຈາກ 4 ລາຍການ ໃນປີ 2023 ພາດພຽງ ວິມເບິນດັນ ທີ່ເສຍໃຫ້ກັບ ຄາລອດ ອັນຄາຣາດ ດາວຮຸ່ງຈາກປະເທດແອັດສະປາຍ ໂດຍຖືເປັນແຊ໋ມ ຢູເອັດ ໂອເພັນ ສະໄໝທີ 4 ຂອງຕົວເອງ.
ຂະນະດຽວກັນການຄວ້າແຊ໋ມແກຣນສະແລມ ສະໄໝທີ 24 ຂອງ ໂນວັກ ຢໍໂຄວິດ ນອກຈາກຈະສ້າງສະຖິຕິຄວ້າແຊ໋ມສູງສຸດໃນປະເພດຊາຍດ່ຽວແລ້ວ ເຈົ້າຕົວຍັງສ້າງສະຖິຕິທຽບເທົ່າ ມາກາເຣັດ ຄອດ ນັກເທັນນິດສາວລະດັບຕຳນານຈາກອົດສະຕຣາລີ ທີ່ຈາລຶກປະຫວັດສາດຄວ້າແຊ໋ມລະດັບແກຣນສະແລມທີ 24 ສະໄໝ ຫຼາຍທີ່ສຸດໃນໂລກເມື່ອລວມລະຫວ່າງປະເພດຍິງ ແລະ ປະເພດຊາຍ.
ຮຽບຮຽງໂດຍ: ພອນເພັດ ບຸນຄ້ຳ
