ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີເປີດການຮຽນການສອນພາສາຣັດເຊຍ ໃນຊັ້ນມັດທະຍົມສຶກສາຢູ່ ສປປ ລາວ ເມື່ອວັນທີ 8 ກັນຍາ 2023 ທີ່ໂຮງຮຽນ ມສ ເພຍວັດ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ປອ ນາງ ສີສຸກ ວົງວິຈິດ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ເອລິຊາດ ຕາລິບົບ ເອກອັກຄະລັດຖະທູດ ສະຫະພັນຣັດເຊຍ ປະຈໍາ ສປປ ລາວ, ທ່ານ ສຈ.ປອ ບໍ່ແສງຄຳ ວົງດາລາ ອະດີດລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ອະດີດລັດຖະມົນຕີ ກະຊວງສຶກສາທິການ ແລະ ກິລາ, ປະທານສະມາຄົມມິດຕະພາບ ລາວ-ຣັດເຊຍ ພ້ອມດ້ວຍຜູ້ອຳນວຍການສະຖາບັນ, ສຸນ, ຄູອາຈານ ແລະ ນ້ອງນັກຮຽນຢ່າງພ້ອມພຽງ.
ໂອກາດດັ່ງກ່າວ, ທ່ານ ຮສ.ປອ ອານຸລົມ ວິໄລພອນ ຜູ້ອໍານວຍການສະຖາບັນຄົ້ນຄວ້າວິທະຍາສາດການສຶກສາ ກະຊວງ ສສກ ໄດ້ກ່າວວ່າ: ໂດຍປະຕິບັດຕາມບົດບັນທຶກຄວາມເຂົ້າໃຈລະຫວ່າງກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ມະຫາວິທະຍາໄລໂຕມ ແຫ່ງ ສະຫະພັນຣັດເຊຍ ທີ່ໄດ້ລົງນາມໃນວັນທີ 23 ພຶດສະພາ 2023 ແລະ ຮ່າງບົດບັນທຶກການຮ່ວມມືສະເພາະ ລະຫວ່າງສະຖາບັນຄົ້ນຄວ້າວິທະຍາສາດການສຶກສາຂອງລາວ ກັບ ມະຫາວິທະຍາໄລໂຕມ ແຫ່ງ ສະຫະພັນຣັດເຊຍ ທີ່ຈະລົງນາມວ່າດ້ວຍການຮ່ວມມືທາງດ້ານການສຶກສາ ພາສາຣັດເຊຍ ໃນສາຍສາມັນສຶກສາຢູ່ ສປປ ລາວ ແລະ ເພື່ອສ້າງສາຍພົວພັນລະຫວ່າງສອງປະເທດໃຫ້ແໜ້ນແຟ້ນຍິ່ງໆຂຶ້ນ ກໍຄື ໃຫ້ມີການຈັດຕັ້ງການຮຽນການສອນພາສາຣັດເຊຍ ໃນຊັ້ນມັດທະຍົມສຶກສາໃຫ້ເປັນຮູບປະທຳຂຶ້ນມາ. ດັ່ງນັ້ນ, ໃນການຮ່ວມມືກັນຄັ້ງນີ້ ຈຶ່ງໄດ້ສ້າງເປັນໂຄງການທົດລອງສອນພາສາຣັດເຊຍຢູ່ໂຮງຮຽນມັດທະຍົມສຶກສາໃນ ສປປ ລາວ ປະກອບມີ 2 ໂຮງຮຽນ ຄື: ໂຮງຮຽນມັດທະຍົມສຶກສາສົມບູນເພຍວັດ ແລະ ໂຮງຮຽນມັດທະຍົມສຶກສາສົມບູນເຈົ້າອານຸວົງ. ນອກຈາກນັ້ນ, ພວກເຮົາຍັງຈະໄດ້ຮ່ວມກັນພິຈາລະນາ ເປີດໃຫ້ມີການສົ່ງເສີມການຮຽນຮູ້ພາສາຣັດເຊຍຂຶ້ນທີ່ສູນສົ່ງເສີມພາສາຕ່າງປະເທດ ໃນສະຖາບັນຄົ້ນຄວ້າວິທະຍາສາດການສຶກສາ ແລະ ໃນອະນາຄົດຈະໄດ້ພິຈາລະນາຮ່ວມກັນໃນການພັດທະນາຂີດຄວາມສາມາດໃຫ້ແກ່ຄູລາວ ໃນການສອນພາສາຣັດເຊຍ.
ຂະນະດຽວກັນ, ທ່ານ ປອ ນາງ ສີສຸກ ວົງວິຈິດ ໄດ້ກ່າວວ່າ: ໃນນາມກະຊວງສຶກສາທິການ ແລະ ກິລາ ກໍຄື ລັດຖະບານ ແຫ່ງ ສປປ ລາວ ຂໍສະແດງຄວາມຊົມເຊີຍ ແລະ ຂອບໃຈມາຍັງສະຖານທູດສະຫະພັນຣັດເຊຍ ປະຈຳ ສປປ ລາວ ກໍຄື ລັດຖະບານແຫ່ງສະຫະພັນຣັດເຊຍ ແລະ ສູນວິທະຍາສາດ ແລະ ວັດທະນະທຳຣັດເຊຍ ປະຈຳ ສປປ ລາວ ທີ່ໄດ້ຊຸກຍູ້ຊ່ວຍເຫຼືອເຮັດໃຫ້ມີການຈັດຕັ້ງການຮຽນການສອນພາສາຣັດເຊຍ ເພື່ອໃຫ້ນັກຮຽນມີຄວາມສາມາດດ້ານພາສາຣັດເຊຍ ຊຶ່ງອາດສາມາດຮຽນຕໍ່ໃນລະດັບສູງໃນຂັ້ນຕໍ່ໄປ ຢູ່ ສປປ ລາວ ແລະ ຢູ່ສະຫະພັນຣັດເຊຍໃນອະນາຄົດ. ຜ່ານມາ ກະຊວງສຶກສາທິການ ແລະ ກິລາ ກໍຄື ລັດຖະບານ ແຫ່ງ ສປປ ລາວ ໄດ້ຮັບການຊ່ວຍເຫຼືອໃນການໃຫ້ທຶນການສຶກສາແກ່ນັກສຶກສາລາວໄປຮຽນຕໍ່ໃນລະດັບການສຶກສາຊັ້ນສູງ, ປະລິນຍາຕີ ແລະ ເໜືອປະລິນຍາຕີ ແລະ ດ້ານອື່ນໆ ຊຶ່ງເປັນການຊ່ວຍເຫຼືອທີ່ສໍາຄັນ ແລະ ເປັນປະໂຫຍດທີ່ສຸດໃນການພັດທະນາຊັບພະຍາກອນມະນຸດ ເພື່ອຕອບສະໜອງໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດຂອງ ສປປ ລາວ. ດັ່ງນັ້ນ, ເພື່ອເສີມຂະຫຍາຍສາຍພົວພັນການຮ່ວມມື ແລະ ມິດຕະພາບອັນດີງາມລະຫວ່າງສອງປະເທດທີ່ມີມາແຕ່ດົນນານແລ້ວນັ້ນ ໃຫ້ແໜ້ນແຟ້ນຍິ່ງໆຂຶ້ນ, ການຮຽນຮູ້ວັດທະນະທຳ ແລະ ພາສາຣັດເຊຍກໍແມ່ນຊ່ອງທາງໜຶ່ງທີ່ເຮັດໃຫ້ນັກຮຽນ ກໍຄື ພົນລະເມືອງລາວເຂົ້າໃຈ ແລະ ສື່ສານກັບຄົນຣັດເຊຍ ເພື່ອເປັນການສົ່ງເສີມສາຍພົວພັນ ແລະ ມິດຕະພາບອັນດີງາມລະຫວ່າງສອງປະເທດ ທັງເປັນການປະຕິບັດຕາມບົດບັນທຶກຄວາມເຂົ້າໃຈລະຫວ່າງກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ມະຫາວິທະຍາໄລໂຕມ ແຫ່ງສະຫະພັນຣັດເຊຍ ວ່າດ້ວຍການຮ່ວມມືທາງດ້ານການສອນພາສາຣັດເຊຍ ໃນສາຍສາມັນສຶກສາຢູ່ ສປປ ລາວ.
ສະນັ້ນ, ສະຖາບັນຄົ້ນຄວ້າວິທະຍາສາດການສຶກສາ ກະຊວງ ສສກ ແລະ ສູນວິທະຍາສາດ ແລະ ວັດທະນະທຳຣັດເຊຍ ປະຈຳ ລາວ ໃນນາມເປັນຕົວແທນມະຫາວິທະຍາໄລໂຕມ ແຫ່ງ ສະຫະພັນຣັດເຊຍ ຈຶ່ງໄດ້ສ້າງເປັນໂຄງການທົດລອງສອນພາສາຣັດເຊຍຢູ່ໂຮງຮຽນ ມັດທະຍົມສຶກສາ ໃນ ສປປ ລາວ ໂດຍເລືອກເອົາໂຮງຮຽນເປົ້າໝາຍ 2 ແຫ່ງ ຄື: ໂຮງຮຽນ ມັດທະຍົມສຶກສາສົມບູນ ເພຍວັດ ແລະ ໂຮງຮຽນມັດທະຍົມສຶກສາສົມບູນ ເຈົ້າອານຸວົງ ເພື່ອໃຫ້ການສອນພາສາຣັດເຊຍ ໃນຊັ້ນມັດທະຍົມສຶກສາເປັນຮູບປະທໍາຂຶ້ນ ພ້ອມຢັ້ງຢືນວ່າການສອນພາສາຣັດເຊຍສໍາລັບຊັ້ນມັດທະຍົມສຶກສາ ໃນ ສປປ ລາວ ຄັ້ງນີ້ ເປັນໂຄງການຊ່ວຍເຫຼືອທີ່ສຳຄັນໃຫ້ແກ່ຂະແໜງການສຶກສາ ແລະ ກິລາລາວ. ນອກຈາກຈະເປັນການສ້າງໂອກາດ, ເງື່ອນໄຂເອື້ອອຳນວຍໃຫ້ນັກຮຽນຊັ້ນມັດທະຍົມສຶກສາຂອງລາວໄດ້ຮຽນພາສາຣັດເຊຍໃນຖານະການຮຽນພາສາຕ່າງປະເທດເປັນພາສາທີສອງຕາມຄວາມຕ້ອງການແລ້ວ ຍັງຈະເປັນການປະກອບສ່ວນເຂົ້າໃນການຮ່ວມມື, ການແລກປ່ຽນວັດທະນະທຳອັນດີງາມລະຫວ່າງສອງປະເທດ, ສປປ ລາວ ແລະ ສະຫະພັນຣັດເຊຍ ທີ່ມີມາແລ້ວໃຫ້ແໜ້ມແຟ້ນຍິ່ງຂຶ້ນ.
ຫຼັງຈາກນັ້ນ, ບັນດາຄະນະນຳ ພ້ອມດ້ວນແຂກທີ່ເຂົ້າຮ່ວມ ໄດ້ຢ້ຽມຊົມຫ້ອງຮຽນພາສາຣັດເຊຍອີກດ້ວຍ.
ໂດຍ ບົວລະພາ
