ໃນຕອນແລງວັນທີ 11 ກັນຍານີ້ ທີ່ຫໍສະພາແຫ່ງຊາດ ຫຼັງໃໝ່, ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ແຫ່ງ ສປປ ລາວ ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ນາງ ແອນນາ ມາເລຍ ມາລີ ມາຊາໂດ ກຳມະການສູນກາງພັກກອມມູນິດກູບາ ຮອງປະທານສະພາແຫ່ງຊາດອໍານາດປະຊາຊົນ ຮອງປະທານສະພາແຫ່ງລັດ ແຫ່ງ ສ ກູບາ ພ້ອມຄະນະ ໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 10-13 ກັນຍານີ້.
ສະຫາຍ ປະທານສະພາແຫ່ງຊາດ ແຫ່ງ ສປປ ລາວ ໄດ້ກ່າວສະແດງຄວາມປິຕິຍິນດີ ຍິນດີເປັນຢ່າງຍິ່ງທີ່ໄດ້ຕ້ອນຮັບ ສະຫາຍ ນາງ ແອນນາ ມາເລຍ ມາລີ ມາຊາໂດ ພ້ອມຄະນະໃນໂອກາດທີ່ມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້. ພ້ອມທັງສະແດງຄວາມຊົມເຊີຍ ຕໍ່ສະຫາຍ ທີ່ໄດ້ຮັບການແຕ່ງຕັ້ງເປັນຮອງປະທານສະພາແຫ່ງຊາດອໍານາດປະຊາຊົນ ສາທາລະນະລັດ ກູບາ ອີກເທື່ອໜຶ່ງ ແລະ ທັງເປັນຮອງປະທານສະພາແຫ່ງລັດ ແຫ່ງ ສ.ກູບາ ແລະ ຂອບໃຈເປັນຢ່າງສູງ ທີ່ສະຫາຍໄດ້ເລືອກເອົາ ສປປ ລາວ ເປັນປະເທດທໍາອິດ ຂອງການຢ້ຽມຢາມຕ່າງປະເທດ ຂອງສະຫາຍ. ພ້ອມກັນນີ້, ກໍຕີລາຄາສູງ ຕໍ່ການຢ້ຽມຢາມລາວ ຂອງສະຫາຍ ແລະ ຄະນະ ໃນຄັ້ງນີ້ ຊຶ່ງເປັນການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອອັນດີງາມມາແຕ່ດົນນານບົນພື້ນຖານອຸດົມການສັງຄົມນິຍົມ ລະຫວ່າງ ສອງພັກ, ສອງລັດ ແລະ ປະຊາຊົນ ສອງປະເທດ ລາວ-ກູບາ ເວົ້າລວມ, ເວົ້າສະເພາະແມ່ນ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດອໍານາດປະຊາຊົນແຫ່ງ ສ.ກູບາ ໃຫ້ເຂົ້າສູ່ລວງເລິກຍິ່ງຂຶ້ນ.
ສະຫາຍ ນາງ ແອນນາ ມາເລຍ ມາລີ ມາຊາໂດ ໄດ້ກ່າວສະແດງຄວາມຂອບໃຈຕໍ່ທ່ານປະທານສະພາແຫ່ງຊາດ ແຫ່ງ ສປປ ລາວ ທີ່ໄດ້ໃຫ້ການຕ້ອນຮັບ ແລະ ຕີລາຄາສູງຕໍ່ການມາເຄື່ອນໄຫວຢູ່ ສປປ ລາວໃນຄັ້ງນີ້ຂອງຕົນພ້ອມຄະນະ ຊຶ່ງນອກຈາກຈະພົບປະສອງຝ່າຍແລ້ວ ກໍຍັງໄດ້ເຂົ້າຢ້ຽມຂໍ່ານັບການນໍາຂັ້ນສູງຂອງ ສປປ ລາວ ແລະ ໄດ້ໄປເຄື່ອນໄຫວຢູ່ແຂວງຫຼວງພະບາງ.
ການພົວພັນ ແລະ ຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດອໍານາດປະຊາຊົນກູບາ ໃນໄລຍະຜ່ານມາ ຊຶ່ງສອງຝ່າຍໄດ້ຮ່ວມກັນຈັດຕັ້ງປະຕິບັດ ບົດບັນທຶກຊ່ວຍຈໍາ (MOU) ວ່າດ້ວຍ ການຮ່ວມມື ລະຫວ່າງ ສອງອົງການນິຕິບັນຍັດ ທີ່ໄດ້ລົງນາມ ໃນປີ 2019 ຢ່າງເປັນຮູບປະທໍາ ໂດຍມີການແລກປ່ຽນຄະນະຜູ້ແທນ ໄປມາຫາສູ່ກັນ. ນອກນັ້ນ, ສອງຝ່າຍ ຍັງມີການແລກປ່ຽນບົດຮຽນ ແລະ ຂໍ້ມູນຂ່າວສານ, ສົ່ງສານຊົມເຊີຍ, ສານອວຍພອນ ຊຶ່ງກັນ ແລະ ກັນ ໃນໂອກາດວັນສຳຄັນຂອງຊາດ ແລະ ສະໜັບສະໜູນກັນໃນເວທີລັດຖະສະພາພາກພື້ນ ແລະ ສາກົນ. ສະພາແຫ່ງຊາດລາວ ໄດ້ສະໜັບສະໜູນຢ່າງແຮງກ້າ ໃຫ້ ສ ກູບາ ເຂົ້າເປັນປະເທດສັງເກດການ ໃນກອງປະຊຸມສະມັດຊາໃຫຍ່ລະ ຫວ່າງຊາດອາຊຽນ (AIPA) ໃນເດືອນ ສິງຫາ 2023 ທີ່ ອິນໂດນເນເຊຍ ຜ່ານມາ.
ໃນຕອນທ້າຍ, ສະຫາຍ ໄຊສົມພອນ ພົມວິຫານ ກໍໄດ້ອວຍພອນ ແລະ ຊົມເຊີຍ ທີ່ສະພາແຫ່ງຊາດອຳນາດປະຊາຊົນກູບາ ໄດ້ຮັບເປັນປະເທດສັງເກດການ ຂອງກອງປະຊຸມໄອປາ, ພ້ອມທັງສະເໜີທິດທາງການຮ່ວມມືລະຫວ່າງສອງອົງການນິຕິບັນຍັດ ໃນຕໍ່ໜ້າ.
(ຂ່າວ: ສຸກສະຫວັນ, ພາບ: ກິກ)
