ຕາມຂ່າວຈາກ ວິທະຍຸສາກົນ ຫວຽດນາມ, ເມື່ອບໍ່ດົນມານີ້, ທ່ານ Yoon Suk Yeol ປະທານາທິບໍດີ ສ ເກົາຫລີ ແລະ ທ່ານ Fumio Kishida, ນາຍົກ ລັດຖະ ມົນຕີ ຍີ່ປຸ່ນ ໄດ້ມີການເຈລະຈາ ສອງຝ່າຍ ຢູ່ນອກ ກອງປະຊຸມ ສຸດຍອດ ກຸ່ມບັນດາ ພື້ນຖານ ເສດຖະກິດ ພັດທະນາ ແລະ ຫາກໍ່ພົ້ນເດັ່ນ ແຖວໜ້າ ຂອງໂລກ (G20) ຢູ່ ນະຄອນຫລວງ ນິວແດນລີ ຂອງ ອິນເດຍ. ໂດຍທັງສອງຝ່າຍ ໄດ້ຕົກລົງເຫັນດີ ເປັນເອກະພາບກັນ ຊຸກຍູ້ ການຈັດກອງປະຊຸມ ສຸດຍອດ 3 ຝ່າຍ ສ ເກົາຫລີ-ຍີ່ປຸ່ນ-ສປ ຈີນ. ປະຈຸບັນ, ສ ເກົາຫລີ ພວມດຳລົງຕຳແໜ່ງ ປະທານ ກອງປະຊຸມ ສຸດຍອດ ສ ເກົາຫລີ -ຍີ່ປຸ່ນ- ສປ ຈີນ ແລະ ພວມຊຸກຍູ້ ການຈັດກອງປະຊຸມ ໃນທ້າຍປີນີ້. ຖ້າຫາກ ໄດ້ດຳເນີນ, ນີ້ຈະແມ່ນ ກອງປະຊຸມ ສຸດຍອດ 3 ຝ່າຍ ສ ເກົາຫລີ-ຍີ່ປຸ່ນ-ສປ ຈີນ ຄັ້ງທຳອິດ ໃນຮອບ 4 ປີຜ່ານມາ. ກອງປະຊຸມ ສຸດຍອດ 3 ຝ່າຍ ຄັ້ງທຳອິດ ໃນປີ 2008, ການນຳ 3 ປະເທດໄດ້ເຫັນດີ ຈັດກອງປະຊຸມ ປະຈຳປີ ແລະ ເປັນປະທານ ໝູນວຽນ. ແຕ່ເຖິງຢ່າງ ໃດກໍ່ຕາມ, ພາຍຫລັງ ກອງປະຊຸມຄັ້ງ ຫລ້າສຸດ ທີ່ຈັດຂຶ້ນຢູ່ ສປ ຈີນ ໃນເດືອນ ທັນວາ 2019, ກໍ່ຍັງບໍ່ທັນມີ ກອງປະຊຸມຄັ້ງ ໃດຖືກຈັດຂຶ້ນ ຕື່ມອີກ. ສາຍເຫດ ແມ່ນຍ້ອນ ຜົນສະທ້ອນ ຈາກພະຍາດ ລະບາດ ໂຄວິດ-19, ກໍ່ຄື ການໂຕ້ ຖຽງກັນ ເຊິ່ງກ່ຽວຂ້ອງເຖິງ ບັນດາບັນຫາ ໃນປາງສົງຄາມ ເຮັດໃຫ້ ການພົວພັນ ຍີ່ປຸ່ນ – ສ ເກົາຫລີ ຫລຸດລົງ ໃນລະດັບ ຕ່ຳສຸດ ໃນຫລາຍປີ ຜ່ານມາ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
