ພິທີແນະນຳແອັບໃໝ່ M moneyX Application ຂອງບໍລິສັດ ລາວໂມບາຍມັນນີ ຈຳກັດຜູ້ດຽວ ໄດ້ຈັດຂຶ້ນໃນວັນທີ 8 ກັນຍາ 2023 ທີ່ ບໍລິສັດ ລາວໂທລະຄົມມະນາຄົມ ມະຫາຊົນ ໂດຍມີ ທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ບໍລິສັດລາວໂທລະຄົມ ມະນາຄົມ ມະຫາຊົນ ທ່ານ ມະໂນລີດ ຊຸມພົນພັກດີ ຫົວໜ້າກົມຄຸ້ມຄອງລະບົບຊຳລະສະສາງ ທະນາຄານ ແຫງ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ອາລຸນນະເດດ ບານຈິດ ຜູ້ອຳນວຍການບໍລິສັດລາວໂມບາຍມັນນີ ຈຳກັດຜູ້ດຽວກ່າວວ່າ: ໃນການແນະນຳແອັບໃໝ່ M moneyX Application ຂອງບໍລິສັດ ລາວໂມບາຍມັນນີ ຈຳກັດຜູ້ດຽວ ໃນຄັ້ງນີ້ ເພື່ອເປັນການປ່ຽນຮູບແບບໃໝ່ ຈາກແອັບ M-Money ມາເປັນແອັບ M money X ກະເປົາເງິນເທິງມືຖື E-Wallet ທີ່ທັນສະໄໝ ແລະ ໃຫ້ປະສົບການ ທຸລະກຳການເງິນ ທີ່ສະດວກກວ່າ ເພື່ອຕອບສະໜອງເພີ່ມ ຄວາມສະດວກໃຫ້ ລູກຄ້າໄດ້ຢ່າງທົ່ວເຖິງ ໃນຂອບເຂດທົ່ວປະເທດ ແລະ ການພັດທະນາແອັບໃນຄັ້ງນີ້ຈະເຮັດໃຫ້ແອັບ M-Money X ເປັນແອັບ E-Wallet ທີ່ຕອບສະໜອງ ແລະ ໃຫ້ປະໂຫຍດສູງສຸດແກ່ຜູ້ໃຊ້ງານ.
ໃນໄລຍະທີ່ຜ່ານມາ ບໍລິສັດ ລາວໂມບາຍມັນນີ ຫຼື M-Money ໄດ້ມີສ່ວນຮ່ວມຊ່ວຍໃຫ້ບໍລິການໃຫ້ກັບທາງພາກລັດ, ມີການຊ່ວຍເບີກຈ່າຍເງິນເດືອນໃຫ້ແກ່ພະນັກງານບຳນານ ທີ່ຢູ່ຫ່າງໄກຈາກຕົວເມືອງ ຂອງອົງການປະກັນສັງຄົມແຫ່ງຊາດ ແລະ ນອກຈາກນັ້ນ M-Money ຍັງໄດ້ຮ່ວມມືກັບອົງການ Ox farm ປະຈຳປະເທດລາວ ເພື່ອເປັນຊ່ອງທາງການເບີກຈ່າຍເງິນຊ່ວຍເຫຼືອໃນເຂດຊົນນະບົດ ໂດຍຜ່ານແອັບ M-Money ໃຫ້ແກ່ຄອບຄົວທີ່ໄດ້ຮັບຜົນກະທົບຈາກການແຜ່ລະບາດຂອງຜະຍາດໂຄວິດ-19 ລວມມີຈຳນວນ 5 ແຂວງ, 11 ເມືອງ, 129 ບ້ານ ແລະ 2.200 ຄອບຄົວ ລວມເປັນເງິນຈຳນວນ 250.000 ໂດລາ ຫຼື ທຽບເທົ່າ 4.212.500.000 ກີບ ແລະ ແອັບ M-Money ຍັງມີ Function ຂອງບໍລິການຊຳລະ Easy Tax ໃນການຊຳລະພາສີອາກອນ, ເພື່ອເພີ່ມຄວາມສະດວກສະບາຍໃນການຊຳລະພາສີອາກອນໃຫ້ຖືກຕ້ອງ ທັນເວລາ ແລະ ຍັງເປັນການມອບພັນທະເຂົ້າງົບປະມານຢ່າງແທ້ຈິງ ແລະ ໃນອານາຄົດຍັງຈະມີການເຊື່ອມຕໍ່ບໍລິການໃໝ່ໆ ເຊັ່ນ: Wechat Pay, Visa ແລະ ອື່ນໆ ເພື່ອໃຫ້ກ້າວກະໂດດເປັນແອັບ E-Wallet ທີ່ຕອບໂຈດທຸກການໃຊ້ງານຂອງປະເທດລາວ ດັ່ງນັ້ນບໍລິສັດຈຶ່ງໄດ້ມີການປ່ຽນຮູບແບບໃໝ່ ຈາກແອັບ M-Money ມາເປັນແອັບ M moneyX ທີ່ໃຫ້ປະສົບການ ທຸລະກຳການເງິນ ທີ່ສະດວກກວ່າ ແລະ ເປັນບາດກ້າວໜຶ່ງທີ່ສຳຄັນຂອງ ບໍລິສັດ ລາວໂມບາຍມັນນີ ຈຳກັດຜູ້ດຽວ ,ພ້ອມທັງຈະຊ່ວຍໃຫ້ ສັງຄົມລາວ ກ້າວເຂົ້າສູ່ການຜັນຂະຫຍາຍເສດຖະກິດດິຈິຕ້ອນທີ່ທັນສະໄໝ ແລະ ຫຼຸດຜ່ອນການນຳໃຊ້ເງິນສົດ ຕາມແຜນພັດທະນາເສດຖະກິດດິຈິຕ້ອນ ຂອງພັກ-ລັດ ໃຫ້ປະກົດຜົນເປັນຈິງ ຕາມວິໄສທັດຂອງ ກຸ່ມບໍລິສັດ ລາວໂທລະຄົມ ມະນາຄົມ ມະຫາຊົນ.
ຂ່າວ: ຍຸພິນທອງ
