ວັນອາທິດ ທີ 10 ກັນຍາ 2023 ພາຍຫຼັງທີ່ທີມຊາດເຢຍລະມັນ ເຈົ້າພາບເອີໂຣ 2024 ເສຍໃຫ້ທີມຊາດຍີ່ປຸ່ນໄປ 1-4 ໃນການແຂ່ງຂັນບານເຕະອຸ່ນເຄື່ອງຕາມປະຕິທິນ FIFA Day ໃນເດືອນກັນຍາ.
ພາຍຫຼັງຈາກຈົບເກມບໍ່ເຖິງ 24 ຊົ່ວໂມງ ສະມາຄົມບານເຕະເຢຍລະມັນ (DFB) ປະກາດປົດ ຮານຊີ ຟລິກ ຜູ້ຈັດການຄົນປັດຈຸບັນອອກຈາກຕຳແໜ່ງ ໂດຍມີຜົນບັງຄັບໃຊ້ທັນທີ ແລະ ໃຫ້ ຣູດີ ໂຟເລີ ຕໍານານຂອງທີມຊາດເຢຍລະມັນ ນັ່ງເປັນຄູຝຶກຊົ່ວຄາວແທນໄປກ່ອນ.
ນອກຈາກນີ້ ຈະມີການຫາລືກັນໃນເລື່ອງການຊອກຫາຄູຝຶກສອນໃໝ່ ເພື່ອເປົ້າໝາຍຄືການກຽມຄວາມພ້ອມສູ່ການເປັນເຈົ້າພາບຈັດງານແຂ່ງຂັນເອີໂຣ 2024 ໃນ 9 ເດືອນຕໍ່ໜ້າ ເຊິ່ງມີຄາດການວ່າ ຢູລຽນ ນາເກວມັນ ອະດີດຜູ້ຈັດການທີມຂອງ ແອເບ ໄລຊິກ ແລະ ບາເຢິນ ມິວນິກ ມີໂອກາດສູງຫຼາຍທີ່ຈະໄດ້ມາປ່ຽນແທນໃນຕໍາແໜ່ງນີ້ນັ້ນເອງ.
