ຄຳວ່າ: ນັກຮົບເກົ່າລາວ ໝາຍເຖີງອະດີດນັກຮົບປະຕິວັດໃນຖັນແຖວກໍາລັງປະກອບອາວຸດຂອງປະຊາຊົນລາວ. ພວກເພີ່ນໄດ້ຜ່ານການສຶກສາອົບຮົມ, ເຝິກຝົນຫລໍ່ ຫລອມຈາກພັກປະຊາຊົນ ປະຕິວັດລາວ ໂດຍຜ່ານການຊຸບຫລໍ່ຈາກແປວໄຟແຫ່ງສົງຄາມທີ່ຍືດເຍື້ອຍາວນານ, ກາຍເປັນບຸກຄົນບໍລິສຸດຕໍ່ຊາດ, ຈົງຮັກພັກດີຕໍ່ພັກ ແລະ ຕໍ່ປະຊາຊົນ, ຖັນແຖວນັກຮົບເຫຼົ່ານີ້ ໄດ້ປະກອບສ່ວນອັນໃຫຍ່ຫລວງໃຫ້ແກ່ປະເທດຊາດ, ເປັນຜູ້ເສຍສະຫລະເລືອດເນື້ອ, ເຫື່ຶອໄຄ ນັບທັງຊີວິດເພື່ອແລກເອົາຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນມາໃຫ້ປະຊາຊົນລາວບັນ ດາເຜົ່າຕະຫລອດ 6 ທົດສະວັດກວ່າແຫ່ງການຕໍ່ສູ້ຕ້ານການຮຸກຮານຂອງພວກຈັກ ກະພັດລ່າເມືອງຂຶ້ນແບບເກົ່າ ແລະ 2 ທົດສະວັດແຫ່ງການຕໍ່ສູ້ຕ້ານການຮຸກຮານພວກລ່າເມືອງຂຶ້ນແບບໃໝ່ ເຮັດໃຫ້ມີຫລາຍຄົນເສຍຊີວິດໃນສະໜາມຮົບ, ປະພໍ່ ແມ່ທີ່ຄອງຄອຍຢູ່ບ້ານ, ປະລູກໃຫ້ເປັນກຳພ້າ-ກຳພອຍ, ປະເມຍໃຫ້ເປັນໝ້າຍ ຍ້ອນຍົກສູງຜົນປະໂຫຍດສ່ວນລວມຫລາຍກ່ວາຜົນປະໂຫຍດສ່ວນຕົວ.
ໃນໄລຍະແຫ່ງການປະຕິວັດຊາດ ປະຊາທິປະໄຕ ກໍຄື ໄລຍະແຫ່ງການປົກປັກຮັກ ສາ ແລະ ສ້າງສາພັດທະນາປະເທດຊາດ, ບັນດາພະນັກງານນັກຮົບປະຕິວັດຈຳນວນໜຶ່ງ ໄດ້ກ້າວຂຶ້ນເປັນຜູ້ນຳສູງສຸດຂອງພັກ-ລັດ, ເປັນຜູ້ນຳພາ- ບັນຊາຢູ່ໃນກອງທັບ ແລະ ກຳລັງປ້ອງກັນຄວາມສະຫງົບ, ຈໍານວນໜຶ່ງໄດ້ກາຍເປັນວີລະຊົນແຫ່ງຊາດ, ນັກຮົບແຂ່ງ ຂັນທົ່ວປະເທດ, ລວມທັງຜູ້ອາວຸໂສຂອງການປະຕິວັດທີ່ຍັງມີຊີວິດຢູ່ ແລະ ຜູ້ທີ່ລ່ວງລັບໄປແລ້ວ, ຈໍານວນຫຼວງຫຼາຍເຖິງອາຍຸກະສຽນໄດ້ພັກຜ່ອນຮັບບຳເນັດ-ບໍານານ, ອອກສ້າງເສດຖະກິດຄອບຄົວ ແລະ ດຳລົງຊີວິດຢູ່ຕາມຮາກຖານທ້ອງຖິ່ນທົ່ວປະເທດ, ຈຳນວນໜຶ່ງຕ້ອງສູນເສຍອົງຄະ ແລະ ພັກຟື້ນສຸຂະພາບຢູ່ຕາມສູນຕ່າງໆ ຕາມນະ ໂຍບາຍຂອງພັກ.
ດັ່ງນັ້ນ, ຜູ້ເກີດໃໝ່ໃຫຍ່ລຸນ ກໍຄື ຄົນຮຸ່ນຫລັງທີ່ເປັນຜູ້ສືບທອດພາລະກິດປະຕິ ວັດຕ້ອງຄິດສະເໝີວ່າ: “ມີພວກເພິ່ນໃນມື້ນັ້ນ ຈິ່ງມີພວກເຮົາໃນມື້ນີ້ ” ຄົນຮຸ່ນຫລັງຕ້ອງມີຄວາມເອກອ້າງທະນົງໃຈ, ກຳແໜ້ນຜົນງານປະຕິວັດ, ຜົນງານແຫ່ງການຕໍ່ສູ້ມີໄຊຂອງນັກຮົບເກົ່າປະຕິວັດລາວ, ຮຸ່ນປູ່, ຮຸ່ນຍ່າ ແລະ ລຸງ, ປ້າ, ອາວ, ອາ ທີ່ໄດ້ຕໍ່ສູ້ຢ່າງພິລາດອາດຫານ, ເດັດດ່ຽວໜຽວແໜ້ນ, ທົນທານ ແລະ ມີນໍ້າໃຈຍອມເສຍສະ ຫຼະອັນສູງສົ່ງໃນພາລະກິດປະຕິວັດ.
ໃນສະພາບເສດຖະກິດຂອງປະເທດທີ່ພວມພົບຄວາມຫຍຸ້ງຍາກ ຫລື ສະພາບວິກິດໃນປັດຈຸບັນນີ້. ຍິ່ງກວ່າເວລາໃດໝົດ ຄົນຮຸ່ນໃໝ່ຕ້ອງເອົາໃຈໃສ່ເສີມຂະຫຍາຍມູນເຊື້ອອັນດີງາມຂອງນັກຮົບເກົ່າປະຕິວັດລາວທີ່ມີຕໍ່ປະເທດຊາດ ກໍຄື ການສືບຕໍ່ສ້າງສາ ແລະ ພັດທະນາປະເທດຊາດໃນໄລຍະໃໝ່ດ້ວຍຄວາມເສຍສະຫລະ, ຊື່ສັດສຸດຈະລິດ, ໂປ່ງໃສ ແລະ ກວດສອບໄດ້, ທັງໄດ້ຮັບຜົນສໍາເລັດທຸກວຽກງານ.
ພ້ອມນີ້, ຕ້ອງບໍ່ຫລົງລືມການເອົາໃຈໃສ່ເບິ່ງແຍງນັກຮົບເກົ່າປະຕິວັດລາວທີ່ຍັງມີຊີວິດຢູ່ໃນທົ່ວປະເທດ ເພື່ອໃຫ້ມີຊີວິດການເປັນຢູ່ທີ່ນັບມື້ດີຂຶ້ນ ແລະ ສົມກັບທີ່ພວກເພີ່ນໄດ້ຜ່ານຜ່າຫ່າລູກກະສຸນ-ຫ່າລູກລະເບີດຂອງພວກສັດຕູມາຈົນນັບບໍ່ຖ້ວນ ເພື່ອຍາດເອົາຄວາມເປັນເອກະລາດຂອງຊາດ ແລະ ນຳເອົາຄວາມສົມບູນພູນສຸກມາໃຫ້ປະຊາຊົນລາວບັນດາເຜົ່າຄືທຸກມື້ນີ້ ແລະ ປ່ຽນຄໍາເວົ້າຫຍໍ້ທໍ້ທີ່ວ່າ: “ນາແລ້ວຂ້າຄວາຍເຖິກ ເສິກແລ້ວປະຄົນຫານ” ມາເປັນ “ນາແລ້ວ ລ້ຽງຄວາຍເຖິກ ເສີກແລ້ວເບິ່ງຄົນຫານ” ເພາະພວກເພີ່ນລ້ວນແຕ່ແມ່ນຜູ້ທີ່ມີຄຸນງາມຄວາມດີໃນພາລະກິດປະຕິວັດຕໍ່ສູ້ປົດປ່ອຍປະເທດຊາດ ແລະ ເຮັດໃຫ້ປະເທດເຮົານັບມື້ໄດ້ຮັບການພັດທະນາຈົນມາຮອດທຸກມື້ນີ້.
ຊົມເຊີຍວັນສ້າງຕັ້ງສະຫະພັນນັກຮົບເກົ່າແຫ່ງຊາດ ຄົບຮອບ 21 ປີ ຢ່າງສຸດໃຈ!!
ໂດຍ: ບຸນຕຽງ ຈັນທະວົງ
