ຕະຫຼາດນັກເຕະຊາອຸດີ ໂປຣ ລີກ ປິດຕົວລົງແລ້ວເມື່ອເວລາ 2:00 ໂມງຂອງຄືນວັນທີ 7 ກັນຍານີ້ ຕາມເວລາປະເທດລາວ ໂມຮາເໝັດ ຊາລາ ກອງໜ້າ ລີເວີພູລ ແລະ ຈາດອນ ຊານໂຊ່ ປີກ ແມນເຊັສເຕີ ຢູໄນເຕັດ ບໍ່ໄດ້ຍ້າຍໄປຮ່ວມທີມໃນລີກຊາອຸດີ ອາຣາເບຍ ເຖິງແມ່ນຈະມີຂ່າວວ່າມີການເຈລະຈາກັນກ່ອນຕະຫຼາດປິດ.
Al Ittihad ມີຂ່າວກັບ ຊາລາ ມາຕະຫຼອດເດືອນທີ່ຜ່ານມາ ແລະ ມີລາຍງານວ່າ ຍື່ນຂໍ້ສະເໜີເຖິງ 215 ລ້ານປອນ ເພື່ອໃຫ້ທີມ ລີເວີພູລ ຍອມປ່ອຍຕົວໄປຮ່ວມທີມ ແຕ່ສຸດທ້າຍແລ້ວ ຊາລາ ຍັງຢູ່ຄ້າຝີຕີນໃນປະເທດອັງກິດຕໍ່ໄປ.
ໃນຂະນະທີ່ ຊານໂຊ່ ເຊິ່ງຖືກ ເອຣິກ ເທນ ຮາກ ຜູ້ຈັດການທີມແມນເຊສເຕີ ຢູໄນເຕັດ ວິຈານວ່າຊ້ອມບໍ່ໄດ້ດີ ເຮັດໃຫ້ຕົວນັກເຕະອອກມາໂພສຕອບໂຕ້ ຈົນເຮັດໃຫ້ເຫັນວ່າໝົດອະນາຄົດກັບແມນຢູ ແລ້ວ ກໍໄດ້ຮັບຄວາມສົນໃຈຈາກ Al-Ettifa ທີ່ມີ ສະຕີເຟ່ນ ເຈີຣາດ ອະດີດນັກເຕະ ລີເວີພູລ ເປັນຫົວໜ້າຄູຝຶກ.
“ເດລີ່ ເມລ” ລາຍງານຂ່າວວ່າ ແມນເຊັສເຕີ ຢູໄນເຕັດ ພ້ອມປ່ອຍໃຫ້ Al-Ettifa ຢືມຕົວ ຊານຊົວ ໄປໃຊ້ງານແບບບໍ່ເສຍຄ່າໃນລະດູການນີ້ ແຕ່ຕ້ອງມີທາງເລືອກທີ່ຈະຊື້ຂາດທີ່ 50 ລ້ານປອນ ຫຼັງໝົດສັນຍາຢືມຕົວ ແຕ່ທີມຈາກ ຊາອຸດິ ໂປຣ ລີກ ບໍ່ສາມາດຕົກລົງໃນຈຸດນີ້ໄດ້ ເນື່ອງຈາກວ່າບໍ່ມີກໍາລັງເງິນພຽງພໍທີ່ຈະຊື້ຂາດໃນອະນາຄົດ ເຮັດໃຫ້ຂໍ້ຕົກລົງນີ້ລົ້ມລົງໄປແລ້ວ.
ສະຫຼຸບຈໍານວນເງິນທີ່ທີມຈາກ ຊາອຸດິ ໂປຣລີກ ທຸ່ມເທຊື້ນັກເຕະໄປເສີມທັບຕະຫຼອດລະດູຮ້ອນທີ່ຜ່ານມາ ຢູ່ທີ່ 700 ລ້ານປອນ ເປັນລີກທີ່ໃຊ້ເງິນເສີມທີມສູງສຸດເປັນອັນດັບ 4 ຂອງໂລກ ເປັນຮອງຈາກ ພຣີເມຍລີກ ອັງກິດ, ລີກ 1 ຝຣັ່ງ, ລາ ລີກາ ແອັດສະປາຍ ເທົ່ານັ້ນ.
