ກະຊວງສຶກສາທິການ ແລະ ກິລາ (ສສກ) ຈະສຸມໃສ່ທຸກກຳລັງແຮງ ເພື່ອສ້າງທຸກເງື່ອນໄຂໃຫ້ທຸກຄົນໄດ້ເຂົ້າເຖິງການສຶກສາ ແລະ ຂະຫຍາຍການສຶກສາໄປສູ່ເຂດຫ່າງໄກສອກຫຼີກໃຫ້ທົ່ວເຖິງ, ສ້າງທຸກເງື່ອນໄຂໃຫ້ແກ່ຜູ້ຮຽນໃນກຸ່ມເປົ້າໝາຍທີ່ດ້ອຍໂອກາດ, ຜູ້ທຸກຍາກ, ເພດຍິງ, ຊົນເຜົ່າ, ຜູ້ພິການໄດ້ຮັບການສຶກສາທີ່ມີຄວາມສະເໝີພາບ ແລະ ເທົ່າທຽມ.
ເມື່ອວັນທີ 5 ກັນຍາ 2023 ທີ່ສຳນັກງານກະຊວງສຶກສາທິການ ແລະ ກິລາ, ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ຖະແຫຼງການເນື່ອງໃນໂອກາດວັນສາກົນແຫ່ງການຮຽນຮູ້ໜັງສື ຄົບຮອບ 58 ປີ (8 ກັນຍາ 1965-8 ກັນຍາ 2023) ວ່າ: ໃນວັນທີ 8 ກັນຍາຂອງທຸກໆປີ ອົງການອຸຍແນັດສະໂກ ໄດ້ປະກາດເປັນວັນສາກົນແຫ່ງການຮຽນຮູ້ໜັງສື ມາຮອດປີນີ້ພໍດີຄົບຮອບ 58 ປີ (ນັບແຕ່ວັນທີ 8 ກັນຍາ 1965-8 ກັນຍາ 2023) ຊຶ່ງວັນດັ່ງກ່າວແມ່ນວັນທີ່ມີຄວາມໝາຍຄວາມສຳຄັນຢ່າງຍິ່ງຕໍ່ກັບປະຊາຊາດໃນທົ່ວໂລກ ໂດຍສະເພາະແມ່ນຜູ້ດ້ອຍໂອກາດ, ພາດໂອກາດທາງການສຶກສາ ຊຶ່ງຕົ້ນຕໍແມ່ນຄວາມບໍ່ຮູ້ໜັງສື ແລະ ການຮຽນບໍ່ຈົບການສຶກສາຂັ້ນພື້ນຖານ. ທັງນີ້, ກໍເພື່ອຊຸກຍູ້ ແລະ ສົ່ງເສີມໃຫ້ບຸກຄົນເຫຼົ່ານັ້ນໄດ້ຮຽນຮູ້ໜັງສື, ອ່ານອອກ ຂຽນເປັນ ແລະ ສາມາດນໍາເອົາຄວາມຮູ້ຄວາມສາມາດໄປໝູນໃຊ້ເຂົ້າໃນການດຳລົງຊີວິດຕົວຈິງ ເພື່ອຍົກລະດັບ ແລະ ພັດທະນາຄຸນນະພາບຊີວິດຂອງຜູ້ຮຽນໃຫ້ດີຂຶ້ນເທື່ອລະກ້າວ. ພ້ອມກັນນັ້ນ, ໄດ້ຮຽກຮ້ອງໃຫ້ທຸກໆປະເທດທີ່ເປັນສະມາຊິກຂອງອົງການສະຫະປະຊາຊາດ ຈັດຕັ້ງສະເຫຼີມສະຫຼອງວັນດັ່ງກ່າວ ເພື່ອສະຫຼຸບຕີລາຄາຜົນຂອງການຈັດຕັ້ງປະຕິບັດແຜນການຮຽນຮູ້ໜັງສືໃນປະເທດຂອງຕົນ, ພ້ອມທັງໃຫ້ກໍານົດທິດທາງ, ແຜນການ, ຄາດໝາຍສູ້ຊົນ ແລະ ວິທີການຈັດການສຶກສາ ແນ່ໃສ່ສົ່ງເສີມການຮຽນຮູ້ໜັງສືໃນປີຕໍ່ໆໄປ.
ໃນແຕ່ລະປີ ອົງການອຸຍແນັດສະໂກ ໄດ້ມີສານເພື່ອໃຫ້ລັດພາຄີໄດ້ເອົາໃຈໃສ່ໃນການສົ່ງເສີມການຮຽນຮູ້ໜັງສື, ການພັດທະນາແບບຍືນຍົງ ແລະ ມີຫົວຂໍ້ຈຸດສຸມສຳລັບວັນສາກົນແຫ່ງການຮຽນຮູ້ໜັງສື ປີ 2023 ຄື: “ສົ່ງເສີມການຮຽນໜັງສືໃຫ້ທຸກຄົນໃນໂລກໃນໄລຍະຂ້າມຜ່ານ: ສ້າງພື້ນຖານໃຫ້ແກ່ສັງຄົມມີຄວາມສະຫງົບ ແລະ ຍືນຍົງ” (Promoting Literacy for a world in transition: Building the foundation for sustainable and peaceful societies), ການຮຽນຮູ້ໜັງສືມີຄວາມໝາຍຄວາມສຳຄັນ ແລະ ເປັນໃຈກາງໃນການກໍ່ສ້າງບຸກຄະລາກອນ ຊຶ່ງປະກອບດ້ວຍຄວາມຮູ້, ຄວາມສາມາດ ແລະ ທັກສະໃຫ້ມີຄວາມສອດຄ່ອງໃນການປ່ຽນແປງໄລຍະໃໝ່ ເຮັດໃຫ້ສັງຄົມມີຄວາມສະຫງົບ ແລະ ຍືນຍົງ. ມາຮອດປີ 2020, 1 ສ່ວນ 7 ຫຼື ປະມານ 763 ລ້ານຄົນຂອງໄວໜຸ່ມ ແລະ ຜູ້ໃຫຍ່ ອາຍຸ 15 ປີຂຶ້ນໄປໃນໂລກ ຂາດພື້ນຖານການຮຽນຮູ້ໜັງສື ແລະ ທັກສະການຄິດໄລ່ເລກຂັ້ນພື້ນຖານ. ນອກຈາກນັ້ນ, ເດັກນ້ອຍ ແລະ ຊາວໜຸ່ມ ໃນເກນອາຍຸລະຫວ່າງ 6-18 ປີ ຈໍານວນ 244 ລ້ານຄົນ ຍັງບໍ່ໄດ້ເຂົ້າໂຮງຮຽນ.
ລັດຖະບານແຫ່ງ ສປປ ລາວ ໄດ້ກຳນົດເອົາການສຶກສາເປັນວຽກງານໃຈກາງໃນການພັດທະນາຊັບພະຍາກອນມະນຸດ ແລະ ສົ່ງເສີມໃຫ້ພົນລະເມືອງລາວ ແລະ ຜູ້ທີ່ອາໄສຢູ່ ສປປ ລາວ ເຂົ້າເຖິງການສຶກສາທີ່ມີຄຸນນະພາບ, ສະເໝີພາບ ແລະ ເທົ່າທຽມກັນລະຫວ່າງຕົວເມືອງ ແລະ ຊົນນະບົດ ແຕ່ເຖິງຢ່າງໃດກໍຕາມ ສປປ ລາວ ຍັງມີປະຊາກອນທີ່ຢູ່ເຂດຫ່າງໄກສອກຫຼີກ ແລະ ຜູ້ດ້ອຍໂອກາດຈຳນວນບໍ່ໜ້ອຍທີ່ເຂົ້າເຖິງການສຶກສາໄດ້ຍາກ ແລະ ອັດຕາການປະລະຂອງນັກຮຽນໂດຍທົ່ວໄປຍັງສູງຢູ່ ຊຶ່ງນີ້ແມ່ນສິ່ງທ້າທາຍອັນໃຫຍ່ຫຼວງຂອງປະເທດພວກເຮົາທີ່ຈະຕ້ອງສຸມໃສ່ວຽກງານການສຶກສາ ເປັນຕົ້ນ ເພີ່ມການລົງທຶນ ແລະ ນໍາໃຊ້ຊັບພະຍາກອນທີ່ມີຢູ່ ເຖິງແມ່ນວ່າຈະຕົກຢູ່ໃນສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ, ບັນຫາໄພທຳມະຊາດທີ່ເກີດຂຶ້ນຢູ່ຫຼາຍແຂວງ, ພາວະການຂາດແຄນຄູສອນກໍຕາມ, ການປະລະການຮຽນຂອງນັກຮຽນໃນທຸກຊັ້ນທຸກສາຍ ແມ່ນເປັນຜົນກະທົບຕໍ່ການພັດທະນາການສຶກສາ ກໍຄືການພັດທະນາປະເທດຊາດໂດຍລວມ. ຕໍ່ກັບສະພາບການດັ່ງກ່າວນັ້ນ, ລັດຖະບານແຫ່ງ ສປປ ລາວ ກໍຄື ກະຊວງສຶກສາທິການ ແລະ ກິລາ ຈະສຸມໃສ່ທຸກກຳລັງແຮງ ເພື່ອສ້າງທຸກເງື່ອນໄຂໃຫ້ທຸກຄົນໄດ້ເຂົ້າເຖິງການສຶກສາ, ຂະຫຍາຍການສຶກສາໄປສູ່ເຂດຫ່າງໄກສອກຫຼີກໃຫ້ທົ່ວເຖິງ, ສ້າງທຸກເງື່ອນໄຂໃຫ້ແກ່ຜູ້ຮຽນໃນກຸ່ມເປົ້າໝາຍທີ່ດ້ອຍໂອກາດ, ຜູ້ທຸກຍາກ, ເພດຍິງ, ຊົນເຜົ່າ, ຜູ້ພິການໄດ້ຮັບການສຶກສາທີ່ມີຄວາມສະເໝີພາບ ແລະ ເທົ່າທຽມ.
ພ້ອມກັນນັ້ນ, ທ່ານ ຮສ.ປອ ພຸດ ສິມມາລາວົງ ໄດ້ຕາງໜ້າໃຫ້ແກ່ກະຊວງສຶກສາທິການ ແລະ ກິລາ ສະແດງຄວາມຍ້ອງຍໍສັນລະເສີນມາຍັງຄະນະນໍາ, ອໍານາດການປົກຄອງແຕ່ລະຂັ້ນ, ບັນດາຂະແໜງການ, ອົງການຈັດຕັ້ງມະຫາຊົນ, ການຈັດຕັ້ງພາກເອກະຊົນ, ຊຸມຊົນ, ຜູ້ບໍລິຫານການສຶກສາ ແລະ ກິລາ, ຄູອາຈານ ແລະ ນັກຮຽນ ຕະຫຼອດຮອດພີ່ນ້ອງລາວບັນດາເຜົ່າທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານການສຶກສາ, ວຽກງານການສົ່ງເສີມການຮຽນຮູ້ໜັງສື ກໍຄື ການປະກອບສ່ວນຕໍ່ການຜັນຂະຫຍາຍດໍາລັດວ່າດ້ວຍການຮຽນຮູ້ຕະຫຼອດຊີວິດ, ຂໍຂອບໃຈມາຍັງປະເທດເພື່ອນມິດ ແລະ ອົງການຈັດຕັ້ງຕ່າງໆ ທີ່ໄດ້ໃຫ້ການສະໜັບສະໜູນຕໍ່ຜົນສໍາເລັດໃນໄລຍະຜ່ານມາ ແລະ ເນື່ອງໃນໂອກາດສະເຫຼີມສະຫຼອງວັນສາກົນແຫ່ງການຮຽນຮູ້ໜັງສື ຄົບຮອບ 58 ປີນີ້ ຂໍສົ່ງພອນໄຊອັນປະເສີດມາຍັງຄະນະນໍາ, ອໍານາດການປົກຄອງ, ຜູ້ບໍລິຫານການສຶກສາ, ຄູອາຈານ, ນັກຮຽນ, ນັກສຶກສາ ແລະ ປະຊາຊົນລາວບັນດາເຜົ່າໃນທົ່ວປະເທດຈົ່ງມີສຸຂະພາບເຂັ້ມແຂງ, ມີຄວາມສຸກ ແລະ ປະສົບຜົນສໍາເລັດໃນໜ້າທີ່ວຽກງານຂອງຕົນ ພ້ອມກັນກ້າວຂຶ້ນຍາດເອົາຜົນສຳເລັດທີ່ໃຫຍ່ຫຼວງກວ່າເກົ່າໃນທຸກວຽກງານ ໂດຍສະເພາະວຽກງານການຮຽນຮູ້ໜັງສື ແລະ ບໍາລຸງຍົກລະດັບການສຶກສາໃຫ້ສູງຂຶ້ນເລື້ອຍໆ.
ໂດຍ: ບົວລະພາ
