ບໍລິສັດ ໄຟຟ້າ ຫົງສາ ຈໍາກັດ ມີພັນທະສັນຍາສ່ວນໜຶ່ງ ທີ່ຕ້ອງປະຕິບັດຕາມສັນຍາສໍາປະທານ ວ່າດ້ວຍການພັດທະນາຄຸນນະພາບຊີວິດ ແລະ ສັງຄົມອ້ອມຂ້າງ ຈຶ່ງໄດ້ໃຫ້ຄວາມສໍາຄັນໃນການພັດທະນາເຍົາວະຊົນ ອັນເປັນກໍາລັງສໍາຄັນໃນການພັດທະນາບ້ານເມືອງ ແລະ ປະເທດຊາດ ໃນອະນາຄົດ ບໍລິສັດ ຈຶ່ງໃຫ້ການສະໜັບສະໜູນທຶນການສຶກສາແກ່ນັກຮຽນທີ່ມີຜົນການຮຽນດີ ໃນລະດັບຊັ້ນປະຖົມສຶກສາ ຈົນເຖິງ ລະດັບປະລິນຍາຕີ ເລີ່ມຕັ້ງແຕ່ປີ 2011 ເຖິງປັດຈຸບັນ ໄດ້ໃຫ້ການສະໜັບສະໜູນທຶນການສຶກສາໃນລະດັບຊັ້ນປະຖົມສຶກສາ ມາແລ້ວຫຼາຍກວ່າ 400 ທຶນ ແລະ ລະດັບປະລິນຍາຕີ ຫຼາຍກວ່າ 70 ທຶນ ແລະ ຍັງເປີດໂອກາດໃຫ້ນ້ອງໆ ນັກສຶກສາຈາກສະຖາບັນການສຶກສາຕ່າງໆ ພາຍໃນ ສປປ ລາວ ໄດ້ເຂົ້າມາເຝິກງານໃນບໍລິສັດ ເພື່ອເສີມສ້າງຄວາມຮູ້ ແລະ ປະສົບການຈາກການເຮັດວຽກຈິງອີກດ້ວຍ
ໃນວັນທີ 6 ກັນຍາ 2023 ພະແນກຊັບພະຍາກອນມະນຸດ ຝ່າຍ Corporate Services (CS) ບໍລິສັດ ໄຟຟ້າ ຫົງສາ ຈໍາກັດ ມອບທຶນການສຶກສາ ໂຄງການ New Graduate Internship Program (NGIP) ປະຈໍາປີ 2023 ທີ່ມະຫາວິທະຍາໄລແຫ່ງຊາດລາວ ມີທ່ານ ໂພສີ ທອບວັນດາ ຮອງອະທິການບໍດີ ມະຫາວິທະຍາໄລແຫ່ງຊາດລາວ ແລະ ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ ພ້ອມດ້ວຍຄູ-ອາຈານ ແລະ ນັກສຶກສາ ເຂົ້າຮ່ວມ.
ສໍາລັບທຶນການສຶກສາ ໂຄງການ New Graduate Internship Program (NGIP) ນີ້ ເປັນການມອບທຶນການສຶກສາໃຫ້ກັບນັກສຶກສາຂອງ ມະຫາວິທະຍາໄລແຫ່ງຊາດລາວ ທີ່ກໍາລັງສຶກສາຢູ່ໃນສາຂາວິຊາຕ່າງໆ ຈໍານວນ 5 ທຶນ ຄື: ສາຂາສື່ມວນຊົນ 1 ທຶນ ສາຂາກົດໝາຍທຸລະກິດ 1 ທຶນ ສາຂາວິສະວະກໍາໄຟຟ້າ 1 ທຶນ ສາຂາວິສະວະກໍາກົນຈັກ 1 ທຶນ ແລະ ສາຂາວິສະວະກໍາໂຍທາ 1 ທຶນ ແລະ ເມື່ອນັກສຶກສາ ຈົບການສຶກສາໃນລະດັບປະລິນຍາຕີແລ້ວ ທາງບໍລິສັດຈະມອບສັນຍາການເປັນພະນັກງານຂອງບໍລິສັດ ໃຫ້ກັບສຶກສາເປັນໄລຍະເວລາ 2 ປີ ເພື່ອຮ່ວມເປັນສ່ວນສໍາຄັນໃນການພັດທະນາຊັກກະຍະພາບຂອງນ້ອງໆ ໃຫ້ສາມາດນໍາຄວາມຮູ້ຈາກສາຂາວິຊາທີ່ຈົບຫຼັກສູດການສຶກສາມາປະຍຸກໃຊ້ ແລະ ປັບໃຊ້ໃນການເຮັດວຽກ ໃຫ້ເກີດປະໂຫຍດຕໍ່ຕົວເອງ ຊຸມຊົນ ແລະ ປະເທດຊາດຕໍ່ໄປ.
