ໃນລະຫວ່າງວັນທີ 3-6 ກັນຍາ 2023 ນີ້, ເມືອງແກ່ນທ້າວ ແຂວງໄຊຍະບູລີ ໄດ້ມີຝົນຕົກປານກາງ ຫາ ຕົກໜັກ ຢູ່ບາງບໍລິເວນເປັນບາງໄລຍະ ໂດຍສະເພາະແມ່ນຕອນກາງຄືນ ຊຶ່ງພາໃຫ້ມີນໍ້າປ່າໄຫຼຊຸ, ຖ້ວມທີ່ຢູ່ອາໄສຂອງປະຊາຊົນ, ເຮັດໃຫ້ຖະໜົນຫົນທາງເຊາະເຈື່ອນ, ຂົວເປ່ເພເສຍຫາຍ ແລະ ເນື້ອທີ່ທໍາການຜະລິດຂອງປະຊາຊົນເສຍຫາຍ ເປັນຕົ້ນແມ່ນ ນໍ້າຖ້ວມຂົວ 5 ແຫ່ງ ຄື: ຂົວບ້ານປາກຕົມ, ຂົວບ້ານປາກແຄມ, ຂົວໂຮງຮຽນປາກແຄມ, ຂົວບ້ານຫ້ວຍບູຮາ ແລະ ຂົວບ້ານໜອງ. ເຮັດໃຫ້ຂົວຂາດ ຈໍານວນ 2 ແຫ່ງ ປັດຈຸບັນຍັງບໍ່ສາມາດທຽວໄດ້, ນໍ້າໄຫຼຊຸເຮືອນປະຊາຊົນ ບ້ານວັງປາ ຈໍານວນ 1 ຄອບຄົວ ລວມມູນຄ່າເສຍຫາຍ 47.400.000 ກີບ, ນໍ້າຖ້ວມນາ ປະ ຊາຊົນ ບ້ານວັງປາ ຈໍານວນ 1 ຄອບຄົວ ເນື້ອທີ່ນາເສຍຫາຍ 0,7 ເຮັກຕາ, ນໍ້າຖ້ວມເຮືອນຂອງປະຊາຊົນຢູ່ບ້ານໜອງ ຈໍານວນ 10 ຫຼັງ ແລະ ນໍ້າຖ້ວມເຮືອນຂອງປະຊາຊົນຢູ່ບ້ານຫ້ວຍບູຮາ ຈໍານວນ 3 ຫຼັງ. (ສ່ວນມູນຄ່າຄວາມເສຍຫາຍ ແມ່ນພວມເກັບກຳຂໍ້ມູນ). ດ້ວຍຄວາມເປັນຫ່ວງປະຊາຊົນ ແລະ ເພື່ອກວດກາເບິ່ງຄວາມເສຍຫາຍຕົວຈິງ ພ້ອມທັງຊອກວິທີແກ້ໄຂໃຫ້ທັນການນັ້ນ, ໃນວັນທີ 6 ກັນຍາ ນີ້, ທ່ານ ອໍາຄາ ລັດສະໝີ ກໍາມະການພັກແຂວງ ເລຂາພັກເມືອງ, ເຈົ້າເມືອງແກ່ນທ້າວ ພ້ອມດ້ວຍທີມງານ ໄດ້ລົງຕິດຕາມຂົວທີ່ຖືກນໍ້າຖ້ວມ ເພື່ອເລັ່ງແກ້ໄຂໃຫ້ສາມາດສັນຈອນໄປມາໄດ້ເປັນປົກກະຕິໂດຍໄວ.
ຂ່າວ-ພາບ: ໄຊຍະບູລີ
