ວັນທີ 5 ເດືອນກັນຍາ 2023 ບັນດາຜູ້ຕາງໜ້າຈາກ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງສາທາລະນະສຸກ, ສື່ມວນຊົນ ພ້ອມດ້ວຍ ຜູ້ຊ່ຽວຊານດ້ານສາທາລະນະສຸກຈາກທັງ 18 ແຂວງຂອງ ສປປ ລາວ ໄດ້ເຕົ້າໂຮມທີ່ ວັງວຽງ ເພື່ອປຶກສາຫາລືວິທີເເກ້ໄຂບັນຫາການຂາດສານອາຫານໃນກຸ່ມເດັກນ້ອຍອາຍຸຕ່ຳກວ່າ 5 ປີ ໃນ ສປປ ລາວ. ກອງປະຊຸມດັ່ງກ່າວ ເເມ່ນໄດ້ຮັບການຈັດຕັ້ງຂຶ້ນພາຍໃຕ້ບັ້ນ ການໂຄສະນາເຜີຍແຜ່ສົ່ງເສີມໂພຊະນາການຂອງແມ່, ເດັກອ່ອນ ແລະ ເດັກນ້ອຍ (MIYCN) ເຊິ່ງເປັນບັ້ນລິເລີ່ມຮ່ວມລະຫວ່າງລັດຖະບານແຫ່ງ ສປປ ລາວ, ສະຫະພາບເອີຣົບ ແລະ ອົງການຢູນິເຊັບ.
ໃນກອງປະຊຸມ, ທ່ານ ສົມສະຫວາດ ພົງສາ, ຫົວຫນ້າກົມ ສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ໄດ້ກ່າວເຖີງບົດບາດຂອງ ສື່ມວນຊົນ ໃນການເຜີຍເເຜ່ຂໍ້ມູນກ່ຽວກັບ ບັນຫາການຂາດສານອາຫານ ເເລະ ຄວາມສໍາຄັນຂອງໂພຊະນາການທີ່ດີ, ການບໍລິການດ້ານໂພຊະນາການທີ່ມິຄຸນນະພາບ ແລະ ການສົ່ງເສີມພຶດຕິກໍາດ້ານການກິນທີ່ດີ ຕໍ່ການແກ້ໄຂບັນຫາດັ່ງກ່າວໃນ ສປປ ລາວ. ທ່ານໄດ້ກ່າວວ່າ: “ການກະຈາຍຂໍ້ມູນຂ່າວສານແບບຕໍ່ເນື່ອງ ຈະຊ່ວຍໃຫ້ຊຸມຊົນມີຄວາມຮັບຮູ້ເລິກເຊິ່ງ ແລະ ມີປ່ຽນແປງທັດສະນະຄະຕິ ແລະ ພຶດຕິກໍາຂອງຕົນໃນການກິນຢູ່ ແລະ ການຮັກສາສຸຂະພາບ. ດັ່ງນັ້ນ ຂ້າພະເຈົ້າຂໍໍຮຽກຮ້ອງໃຫ້ສື່ມວນຊົນ ຈົ່ງເອົາໃຈໃສ່ປະກອບສ່ວນໃນການໃຫ້ຄວາມຮູ້ແກ່ຊຸມຊົນຢ່າງປົກກະຕິ ແລະ ຕໍ່ເນື່ອງ.”
ບັນຫາທ້າທາຍດ້ານເສດຖະກິດທີ່ເກີດຂຶ້ນພາຍຫຼັງການແຜ່ລະບາດຂອງພະຍາດ ໂຄວິດ-19 ນັ້ນແມ່ນເຫັນໄດ້ວ່າ ມີຜົນກະທົບທາງລົບຕໍ່ການໃຊ້ຈ່າຍໃນຄົວເຮືອນ, ໂດຍສະເພາະແມ່ນ ການໃຊ້ຈ່າຍດ້ານອາຫານການກິນ. ອີງຕາມການປະເມີນທີ່ຜ່ານມາໂດຍ ອົງການຢູນິເຊັບ ແລະ ກະຊວງສາທາລະນະສຸກ, ອັດຕາການປະຕິບັດທີ່ດີກ່ຽວກັບການລ້ຽງດູເດັກອ່ອນ ໄດ້ຫຼຸດລົງຢ່າງຫຼວງຫຼາຍພາຍໃນຫນຶ່ງປີ. ອັດຕາການບໍລິໂພກອາຫານຂັ້ນຕໍ່າສຸດທີ່ຍອມຮັບໄດ້ສໍາລັບເດັກນ້ອຍອາຍຸຕໍ່າກວ່າ 2 ປີໄດ້ຫຼຸດລົງຈາກ 21% ໃນປີ 2022 ເປັນ 15% ໃນປີ 2023, ເຊິ່ງຍັງສອດຄ່ອງກັບການເພີ່ມຂຶ້ນຂອງອັດຕາການຂາດສານອາຫານເເບບເຕັ້ຍ ໃນກຸ່ມເດັກນ້ອຍອາຍຸຕ່ຳກວ່າ 5 ປີ, ຈາກ 33% ເປັນ 37%.
ດັ່ງນັ້ນ, ຈຸດປະສົງຂອງກອງປະຊຸມດັ່ງກ່າວ ຈຶ່ງເເມ່ນການສະໜອງຂໍ້ມູນຫຼ້າສຸດໃຫ້ກັບບັນດາສື່ມວນຊົນ ເພື່ອກະຕຸ້ນການປ່ຽນແປງພຶດຕິກຳທີ່ກ່ຽວຂ້ອງກັບໂພຊະນາການໃນທົ່ວປະເທດ. ຜູ້ເຂົ້າຮ່ວມກອງປະຊຸມ ໄດ້ຮັບຂໍ້ມູນກ່ຽວກັບ ບົດລາຍງານຄວາມຄືບໜ້າປະຈຳປີຂອງການຈັດຕັ້ງປະຕິບັດ ແຜນປະຕິບັດງານແຫ່ງຊາດດ້ານໂພຊະນາການ ເເລະ ຍຸດທະສາດ ສຳລັບປິ 2023 ໂດຍສູນໂພຊະນາການ, ກະຊວງສາທາລະນະສຸກ. ນອກນັ້ນ, ຊຸດຂໍ້ມູນເພີ່ມເຕີມຈະຖືກສະຫນອງໃຫ້ໂດຍ ສູນສະຖິຕິ ແລະ ຂ່າວສານສາທາລະນະສຸກ, ພ້ອມກັບການສົນທະນາກ່ຽວກັບ ບົດບາດຂອງສື່ມວນຊົນ ໃນການສົ່ງເສີມສຸຂະພາບເດັກ.
ທ່ານ ໄຊມ້ອນ ນາເຊີ້, ຫົວຫນ້າ ພະເເໜກສື່ສານ ຂອງອົງການຢູນິເຊັບ ປະຈຳ ສປປ ລາວ, ໄດ້ກ່າວວ່າ: “ສື່ມວນຊົນ ສາມາດໃຫ້ທັງຄວາມຮູ້ເເກ່ຊຸມຊົນ, ເສີມສ້າງຄວາມເຂົ້າໃຈ ແລະ ຊຸກຍູ້ການປະຕິບັດຕົວຈິງໃນຊຸມຊົນ. ໃນຂະນະທີ່ພວກເຮົາວາງເເຜນວຽກງານໂພຊະນາການ, ສື່ມວນຊົນຈະຍັງຄົງສືບຕໍ່ເປັນພັນທະມິດທີ່ສຳຄັນໃນການເຜີຍແຜ່ ຍຸດທະສາດທີ່ອີງໃສ່ຫຼັກຖານ ເພື່ອຊ່ວຍໃຫ້ພວກເຮົາສາມາດເພີ່ມທະວີຄວາມພະຍາຍາມຂອງພວກເຮົາ ໃນການສ້າງການປ່ຽນເເປງທີ່ມີຄວາມໝາຍໃນຊີວິດ ເເລະ ໂພຊະນາການຂອງເດັກນ້ອຍໃນທົ່ວ ສປປ ລາວ.”
ນອກຈາກກອງປະຊຸມນີ້ເເລ້ວ, ທີມງານສື່ມວນຊົນໄວໜຸ່ມລາວ, ພາຍໃຕ້ການຊີ້ນຳຂອງ ວິທະຍຸກະຈາຍສຽງແຫ່ງຊາດລາວ, ກໍ່ຈະໄດ້ຈັດງານປຶກສາຫາລືນຳບັນດາໄວໜຸ່ມ ກ່ຽວກັບພຶດຕິກຳການກິນຂອງພວກເຂົາ, ເຊິ່ງງານດັ່ງກ່າວ ເເມ່ນຈະໄດ້ຈັດຂຶ້ນໃນທ້າຍເດືອນກັນຍາໃນສາມແຂວງ.
ກອງປະຊຸມຄັ້ງນີ້ຍັງໄດ້ຈັດຂຶ້ນໃນໄລຍະການສະເຫຼີມສະຫຼອງຄົບຮອບ 50 ປີຂອງອົງການຢູນິເຊັບ ໃນ ສປປ ລາວ ອີກເຊັ່ນດຽວກັນ. ເນື່ອງໃນໂອກາດດັ່ງກ່າວ, ອົງການຢູນິເຊັບ ຈະໄດ້ຈັດງານຕ່າງໆຂຶ້ນເພື່ອສະເຫຼີມສະຫຼອງສາຍພົວພັນ ເເລະ ການຮ່ວມມືອັນເຂັ້ມເເຂງລະຫວ່າງລັດຖະບານລາວ ເເລະ ອົງການຢູນິເຊັບ ໃນໄລຍະ 50 ປີ ທີ່ຜ່ານມາ.
