ສະຫະພັນກິລາຢີມນາສະຕິກແຫ່ງຊາດລາວ ຈະສືບຕໍ່ເສີມສ້າງຄວາມແຂງແກ່ນໃຫ້ ນາງ ແພຣວາ ມິຊາໂຕະ ພິລາພັນເດຊ ນັກກິລາຢີມນາສະຕິກທີມຊາດລາວ ຊຶ່ງເປັນແມ່ຍິງຄົນລາວຄົນທຳອິດ ທີ່ເປີດປະຫວັດສາດໜ້າໃໝ່ໃຫ້ວົງການກິລາຢີມນາສະຕິກລາວ ໃນເວທີລະດັບພາກພື້ນ ແລະ ສາກົນ ກໍຄື ງານກິລາຊີເກມ ຄັ້ງທີ 31 ປີ 2022 ທີ່ ສສ ຫວຽດນາມ ແລະ ລາຍການ ຊີງແຊ໋ມໂລກ 2023 ດ້ວຍການສົ່ງໄປເກັບຕົວຝຶກຊ້ອມກັບບັນດາຊ່ຽວຊານຢີມນາສະຕິກ ລະດັບໂລກ ເພື່ອຮັບປະກັນໃນການສ້າງຜົນງານ ງານມະຫະກຳກິລາຊີເກມ ຄັ້ງທີ 33 ທີ່ປະເທດໄທ ເປັນເຈົ້າພາບ ໃນປີ 2025.
ຕາມການໃຫ້ສຳພາດຂອງ ທ່ານ ໂພແກ້ວ ພິລາພັນເດຊ ຮອງປະທານ-ເລຂາທິການ ສະຫະພັນກິລາຢີມນາສະຕິກແຫ່ງຊາດລາວ ໃຫ້ຊາບວ່າ: ພາຍຫຼັງທີ່ໄດ້ສຳເລັດການສົ່ງນັກກິລາເຂົ້າຮ່ວມແຂ່ງຂັນລາຍການ ຊີງແຊ໋ມໂລກ 2023 ທີ່ເມືອງບາເລນເຊຍ ປະເທດແອັດສະປາຍ ເປັນເຈົ້າພາບ ຊຶ່ງເຮັດໃຫ້ພວກເຮົາໄດ້ປະສົບການ ແລະ ບົດຮຽນຫຼາຍດ້ານ ສະນັ້ນ ໃນຕໍ່ໜ້ານີ້ ທາງສະຫະພັນກໍໄດ້ມີການວາງແຜນຍຸດທະສາດການພັດທະນາກິລາຢີມນາສະຕິກລາວ ໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ເພື່ອຮັບປະກັນໃນການສ້າງຜົນງານໃຫ້ແກ່ປະເທດໃຫ້ພົ້ນເດັ່ນກວ່າເກົ່າ ໂດຍສະເພາະມີແຜນການເລີ່ມສ້າງພື້ນຖານການອອກກຳລັງກາຍກິລາຢີມນາສະຕິກ ເພື່ອສຸຂະພາບ ຕາມໂຄງການຂອງສະຫະພັນກິລາຢີມນາສະຕິກ ສາກົນ ຫຼື ໂຄງການ Gymnastics for All ຂະຫຍາຍສ້າງໃຫ້ທຸກຄົນສາມາດເຂົ້າເຖິງກິລາຢີມນາສະຕິກໄດ້ງ່າຍຂຶ້ນ ເສີມສ້າງສຸຂະພາບ ສ້າງຄວາມຜ່ອນຄາຍໃນຮ່າງກາຍໃຫ້ມີສຸຂະພາບແຂງແຮງ ແລະ ມີອາຍຸຍືນຍາວ ຄຽງຄູ່ກັບການພັດທະນານັກກິລາຢີມແອໂຣບິກໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ເພື່ອກຽມຄວາມພ້ອມເຂົ້າຮ່ວມການແຂ່ງຂັນງານມະຫະກຳກິລາຊີເກມ ຄັ້ງທີ 33 ທີ່ປະເທດໄທ ເປັນເຈົ້າພາບ ໃນປີ 2025 ໂດຍເລີ່ມມີການຄັດເລືອກນັກກິລາແລ້ວ ແລະ ຈະເລີ່ມການຝຶກຊ້ອມຢ່າງຈິງຈັງ ແລະ ສົ່ງເຂົ້າຮ່ວມແຂ່ງຂັນເພື່ອຫາປະສົບການ ສ່ວນກິລາຢີມນາສະຕິກລີລາ ໄດ້ນັກກິລາຮຸ່ນໃໝ່ມາເສີມແລ້ວ ເພື່ອທີ່ຈະມາເປັນຮຸ່ນສືບທອດຕໍ່ໄປ ແລະ ໃຫ້ສາມາດເຂົ້າຮ່ວມແຂ່ງຂັນໄດ້ໃນອະນາຄົດ.
ທ່ານ ໂພແກ້ວ ພິລາພັນເດຊ ໃຫ້ຮູ້ຕື່ມອີກວ່າ: ສຳລັບການເຄື່ອນໄຫວຂອງ ແພຣວາ ຈະສືບຕໍ່ເສີມສ້າງຄວາມແຂງແກ່ນໃຫ້ລາວດີຂຶ້ນກວ່າເກົ່າ ດ້ວຍການສົ່ງຝຶກຊ້ອມໃນລະດັບນານາຊາດໃຫ້ຫຼາຍຂຶ້ນຢ່າງຕໍ່ເນື່ອງ ໂດຍສະເພາະໄປຝຶກຊ້ອມທີ່ບັນດາປະເທດໃນຂົງເຂດເອີຣົບ ທີ່ເປັນປະເທດມີນັກກິລາເກັ່ງໆໃນກິລາປະເພດນີ້ ລວມເຖິງຈະສົ່ງໄປສຶກສາຢູ່ທີ່ປະເທດຍີ່ປຸ່ນ ໃນມະຫາວິທະຍາໄລທີ່ມີຊ່ຽວຊານດ້ານກິລານີ້ເຊັ່ນກັນ ຊືຶ່ງມີສະໂມສອນ ຢີມນາສະຕິກລີລາ ລະດັບຕົ້ນໆຂອງປະເທດຍີ່ປຸ່ນ ແລະ ກໍມີນັກກິລາຢີມນາສະຕິກທີມຊາດຍີ່ປຸ່ນຢູ່ຮ່ວມນຳອີກດ້ວຍ ຊຶ່ງຈະເປັນໂອກາດທີ່ດີທີ່ຈະພັດທະນາ ແພຣວາ ໃຫ້ແຂງແກ່ນຫຼາຍຂຶ້ນກວ່າເກົ່າ ເພື່ອກຽມເຂົ້າຮ່ວມສ້າງຜົນງານໃນການແຂ່ງຂັນງານມະຫະກຳກິລາຊີເກມ ຄັ້ງທີ 33 ທີ່ປະເທດໄທ ເປັນເຈົ້າພາບ ໃນປີ 2025 ແລະ ງານມະຫະກຳກິລາໂອແລມປີກສາກົນ ຫາກມີໂອກາດໄດ້ເຂົ້າຮ່ວມໃນປີໜ້າ ຊຶ່ງລາວເຮົາຍັງມີໂອກາດໃນການຄັດເລືອກໄປໂອແລມປິກ ຈາກການໄດ້ເຂົ້າຮ່ວມ ລາຍການ ຊີງແຊ໋ມໂລກ ຫຼື world championship ຊຶ່ງຈະມີການຕັດສິນຈາກຄະນະກຳມະການໂອແລມປິກອີກຄັ້ງ. ນອກຈາກນີ້, ກໍຍັງມີແຜນຈະເຂົ້າຮ່ວມການແຂ່ງຂັນ ເອຊຽນ ເກມ ໃນປີໜ້າ ແລະ ລາຍການ ຊີງແຊ໋ມອາຊີ ແລະ ຊີງແຊ໋ມໂລກ ອີກດ້ວຍ.
ແພຣວາ ມິຊາໂຕະ ພິລາພັນເດຊ ເປັນແມ່ຍິງລາວຄົນທຳອິດ ທີ່ໄດ້ເປີດປະຫວັດສາດໜ້າໃໝ່ ໃຫ້ວົງການກິລາ ຢີມນາສະຕິກລາວໃນເວທີລະດັບອາຊຽນ, ອາຊີ ແລະ ສາກົນ ໂດຍສະເພາະໄດ້ເຂົ້າຮ່ວມແຂ່ງຂັນງານກິລາຊີເກມ ຄັ້ງທີ 31 ທີ່ ສສ ຫວຽດນາມ ເປັນເຈົ້າພາບ ເມື່ອປີ 2022 ຊຶ່ງຕິດ 1 ໃນ 10 ອັນດັບທຳອິດ ແລະ ມີຊືຶ່ເຂົ້າຊີງຫຼຽນຄຳ ແຕ່ໜ້າເສຍດາຍບໍ່ສາມາດແຈ້ງເກີດໄດ້. ເຖິງຢ່າງໃດກໍຕາມ, ນ້ອງ ແພຣວາ ກໍຍັງບໍ່ທັນໝົດກຳລັງໃຈ ພ້ອມຈະສືບຕໍ່ພັດທະນາຕົນເອງຢ່າງຕໍ່ເນື່ອງ ໂດຍມີຄອບຄົວໃຫ້ສະໜັບສະໜູນຢ່າງເຕັມທີ່ ແລະ ສາມາດສ້າງຜົນງານຄວ້າ 3 ຫຼຽນທອງ ໃນການແຂ່ງຂັນກິລາຢີມນາສະຕິກ ລາຍການ ສິງກະໂປ ໂອເພັນ 2022 ຫຼື Singapore Open 2022 Gymnastic 2022 ອີກດ້ວຍ.
ຂ່າວໂດຍ: ສົງການ ພັນແພງດີ
