ໃນວັນທີ 31 ສິງຫາ 2023 ນີ້, ທ່ານ ນາງ ເຂັມມະນີ ພົນເສນາ ຫົວໜ້າຫ້ອງວ່າການສໍານັກງານປະທານປະເທດ ໄດ້ຕ້ອນຮັບ ທ່ານ ແຊມ ເຊີຣາຍເນີ(Sam Schreiner) ອຸປະທູດ ແຫ່ງ ຣາຊະອານາຈັກ ລຸກຊຳບວກ ປະຈຳ ສປປ ລາວ ຂໍເຂົ້າຢ້ຽມຂ່ຳນັບອຳລາ ໃນໂອກາດສໍາເລັດໜ້າທີ່ການທູດຢູ່ ສປປ ລາວ.
ໃນໂອກາດນີ້, ທ່ານ ນາງ ເຂັມມະນີ ພົນເສນາ ໄດ້ສະແດງຄວາມຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ທ່ານ Sam Schreiner, ອຸປະທູດ ແຫ່ງ ຣາຊະອານາຈັກ ລຸກຊຳບວກ ປະຈຳ ສປປ ລາວທີ່ສຳເລັດການປະຕິບັດໜ້າທີ່ການທູດ ຢູ່ ສປປ ລາວ ໃນຄັ້ງນີ້, ຕະຫລອດການປະຕິບັດໜ້າທີ່ທ່ານໄດ້ເອົາໃຈໃສ່ຢ່າງຕັ້ງໜ້າໃນການເສີມຂະຫຍາຍສາຍພົວພັນຮ່ວມມືຊ່ວຍເຫລືອ ເຊິ່ງກັນ ແລະ ກັນ ລະ ຫວ່າງສອງປະເທດ ລາວ ແລະ ລຸກຊໍາບວກ, ພ້ອມທັງ ສະເໜີໃຫ້ທ່ານອຸປະທູດ ສືບຕໍ່ປະກອບສ່ວນຊຸກຍູ້ການພົວພັນຮ່ວມມືສອງຝ່າຍ ລາວ-ລຸກຊຳບວກ ໃຫ້ນັບມື້ໄດ້ຮັບການເສີມຂະຫຍາຍແໜ້ນແຟ້ນ ຍິ່ງໆຂຶ້ນ.
ໃນໂອກາດນີ້, ທ່ານ Sam Schreiner ໄດ້ສະແດງຄວາມຂອບໃຈມາຍັງ ທ່ານ ນາງ ເຂັມມະນີ ພົນເສນາ ທີ່ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຂອບໃຈຕໍ່ ທຸກອົງການຈັດຕັ້ງຂອງລາວ ທີ່ໄດ້ອຳນວຍຄວາມສະດວກໃນການປະຕິບັດໜ້າທີ່ ຢູ່ ສປປ ລາວ ຢ່າງມີປະສິດທິຜົນ.
ຂ່າວ-ພາບ: ວຽງສະຫວັນ
