ຕາມຂ່າວຈາກວິທະຍຸສາກົນ ແຫ່ງ ສປ ຈີນ, ງານສັບປະດາແລກປ່ຽນດ້ານການສຶກສາຈີນ-ອາຊຽນ ໄດ້ຈັດຂຶ້ນເມື່ອບໍ່ດົນມານີ້ ຢູ່ແຂວງ ກຸ້ຍໂຈ່ວ ຂອງ ສປ ຈີນ, ສະຫະພັນ ການສຶກສາ ດີຈິຕອນ ຈີນ-ອາຊຽນ ໄດ້ຮັບການ ສ້າງຕັ້ງຂຶ້ນ ໃນງານຄັ້ງນີ້.ສຳລັບ ການສ້າງຕັ້ງ ສະຫະພັນ ການສຶກສາ ດີຈິຕອນ ຈີນ-ອາຊຽນ ແມ່ນ ມາດຕະການ ສຳຄັນ ເພື່ອຈັດຕັ້ງ ປະຕິບັດ ເອກະສານ ຜົນກອງປະຊຸມ ໂຕະມົນ ລັດຖະມົນຕີ ການສຶກສາ ຈີນ-ອາຊຽນ ຄັ້ງທີ 3. ໂຮງຮຽນ ປະເພດຕ່າງໆ ແລະ ອົງການ ສຶກສາ ທິການ ເກືອບ 60 ແຫ່ງ ທີ່ມາຈາກ ສປ ຈີນ, ມາເລເຊຍ ແລະ ສິງກະໂປ ໄດ້ຮ້ອງຂໍ ເຂົ້າເປັນ ສະມາຊິກສະຫະພັນ ເປັນງວດທຳອິດ, ສ່ວນສຳນັກງານກອງເລຂາຂອງສະຫະພັນ ຈັດຕັ້ງຢູ່ມະຫາວິທະຍາໄລ ເປີດປະຕູຈີນ. ໃນໂອກາດນີ້ ທ່ານ ວາງສີມີງ, ເລຂາຄະນະພັກ ມະຫາວິທະຍາໄລ ເປີດປະຕູຈີນ ກ່າວວ່າ: ຜ່ານການສ້າງຕັ້ງ ສະຫະພັນ ການສຶກສາ ດີຈິຕອນ ຈີນ-ອາຊຽນແລ້ວ ຈະຄ່ອຍໆສ້າງ ເປັນເວທີ ການບໍລິການ ແລະ ເຄືອຂ່າຍ ການຮ່ວມແບບ ສັງລວມ ຂ້າມຊາດ ດ້ານການສຶກສາ ແບບດີຈິຕອນ ເພື່ອເຮັດໃຫ້ ນັກຮຽນ ນັກສຶກສາຂອງ ສປ ຈີນ ແລະ ບັນດາປະເທດ ສະມາຊິກ ອາຊຽນ ສາມາດ ໄດ້ຮັບຊັບພະຍາກອນ ການສຶກສາ ທີ່ມີຄຸນນະພາບດີ ແລະ ໂອກາດ ດ້ານການສຶກສາ ຕະຫລອດ ຊີວິດ ດ້ວຍເງິນທຶນ ໜ້ອຍກວ່າເກົ່າ ແລະ ວິທີຄ່ອງແຄ້ວ ກວ່າເກົ່າ, ພ້ອມທັງ ຊ່ວຍໃຫ້ ການສຶກສາ ຂອງບັນດາປະເທດ ຫັນເປັນ ແບບດີຈິຕອນ./.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
