ເພື່ອເຮັດໃຫ້ອົງປະກອບຂອງກົງຈັກລັດເວົ້າລວມ ເວົ້າສະເພາະກໍ່ແມ່ນ ກົງຈັກການຈັດຕັ້ງຂອງແຂວງວຽງຈັນ ໃຫ້ມີຄົບຖ້ວນ ແລະ ມີຄວາມເຂັ້ມແຂງ ຄະນະປະຈຳສະພາປະຊາຊົນແຂວງ ຈຶ່ງໄດ້ຕົກລົງເຫັນດີ ສະເໜີລາຍຊື່ຂອງບຸກຄະລາກອນ ທີ່ໄດ້ຮັບການແຕ່ງຕັ້ງໃຫມ່ໃນຂັ້ນພະແນກການ ແລະ ເຈົ້າເມືອງ ຈຳນວນ 10 ທ່ານ ຕາມການສະເໜີຂອງອົງການປົກຄອງແຂວງ ເຂົ້າພິຈາລະນາ ຮັບຮອງ ໃນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງວຽງຈັນຊຸດທີ II .
ທ່ານນາງ ໃສແສງຈັນ ແສງພະຈັນ ຮອງເລຂາທິການສະພາປະຊາຊົນແຂວງວຽງຈັນ ໄດ້ຜ່ານລາຍຊື່ຂອງບັນດາບຸກຄະລາກອນທີ່ຈະສະເໜີ ພິຈາລະນາ ຮັບຮອງໃນກອງສະໄໝສາມັນເທື່ອທີ 5 ຂອງສະພາປະຊາຊົນແຂວງວຽງຈັນຊຸດທີ II ທີ່ຈັດຂຶ້ນລະຫວ່າງວັນທີ 29-31ສິງຫາ 2023ນີ້ ຕາມໜັງສືສະເໜີຂອງທ່ານເຈົ້າແຂວງວຽງຈັນ ສະບັບເລກທີ 111/ຈຂ.ວຈ ລົງວັນທີ 23 ສິງຫາ 2023 ທີ່ສະເໜີຕໍ່ສະພາປະຊາຊົນແຂວງວຽງຈັນ, ເພື່ອຮັບຮອງເອົາການແຕ່ງຕັ້ງຫົວໜ້າພະແນກການຂັ້ນແຂວງ ແລະ ເຈົ້າເມືອງ ດັ່ງລະອຽດລຸ່ມນີ້:
1. ສະເໜີຮັບຮອງ ທ່ານ ສະໝານ ວິເສດຍະພົງສ໌ ກຳມະການພັກແຂວງ, ເປັນຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງວຽງຈັນ.
2. ສະເໜີຮັບຮອງ ທ່ານ ວອນ ວໍລະສານ ກຳມະການພັກແຂວງ, ເປັນຫົວໜ້າພະແນກການເງິນແຂວງວຽງຈັນ.
3. ສະເໜີຮັບຮອງ ທ່ານ ສີສະຫວາດ ແສງພະຈັນ ກຳມະການພັກແຂວງ, ເປັນຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງວຽງຈັນ.
4. ສະເໜີຮັບຮອງ ທ່ານ ຄຳປ່ຽນ ຈັນທະມັງຄຸນ ກຳມະການພັກແຂວງ, ເປັນຫົວໜ້າພະແນກພາຍໃນແຂວງວຽງຈັນ.
5. ສະເໜີຮັບຮອງ ທ່ານ ຄໍາມອນ ສີສອນສັກ ກຳມະການພັກແຂວງ, ເປັນຫົວໜ້າພະແນກໂຍທາທິການ ແລະ ຂົນສົ່ງ ແຂວງວຽງຈັນ.
6. ສະເໜີຮັບຮອງ ທ່ານ ສີສະໄຫວ ແກ້ວດາລາວິນ ເປັນຫົວໜ້າພະແນກແຮງງານ ແລະ ສະຫວັດດີການສັງຄົມແຂວງວຽງຈັນ.
7. ສະເໜີຮັບຮອງ ທ່ານ ແກ້ວ ພິມມະວົງ ກຳມະການພັກແຂວງ, ເລຂາພັກເມືອງຊະນະຄາມ ເປັນເຈົ້າເມືອງຊະນະຄາມ.
8. ສະເໜີຮັບຮອງ ທ່ານ ກົງຈັນ ພັນທະມິດ ກຳມະການພັກແຂວງ, ເລຂາພັກເມືອງຫີນເຫີບ ເປັນເຈົ້າເມືອງຫີນເຫີບ.
9. ສະເໜີຮັບຮອງ ທ່ານ ອຳໄພ ໂສລັດຕະນະວົງ ເລຂາພັກເມືອງກາສີ ເປັນເຈົ້າເມືອງກາສີ
10. ສະເໜີຮັບຮອງ ທ່ານ ວິລະວຸດ ປະກິດ ເລຂາພັກເມືອງ ເປັນເຈົ້າເມືອງແກ້ວອຸດົມ,
ພ້ອມນີ້ ບັນດາຜູ້ແທນກອງປະຊຸມ ຍັງໄດ້ພ້ອມກັນລົງຄະແນນສຽງຄວາມໄວ້ວາງໃຈຕໍ່ 10 ທ່ານ ທີ່ໄດ້ຮັບການແຕ່ງຕັ້ງໃຫມ່, ເຊິ່ງຄະແນນສຽງໄວ້ວາງໃຈເກີນ 90%.
ຂ່າວ: ບຸນມາ ແກ້ງບຸດດາ
