ບໍລິສັດ ລັດວິສາຫະກິດໂຮງພິມສຶກສາ ກະຊວງສຶກສາທິການ ແລະ ກິລາ (ສສກ) ໄດ້ສຳເລັດການພິມປຶ້ມແບບຮຽນ, ປຶ້ມຄູ່ມືຄູ ແລະ ສຳເລັດການແຈກຢາຍປຶ້ມໄປເຖິງໂຮງຮຽນຕ່າງໆໃນຂອບເຂດທົ່ວປະເທດ ນັບແຕ່ທ້າຍເດືອນກໍລະກົດເປັນຕົ້ນມາ ເພື່ອຮັບປະກັນໃຫ້ທັນກັບການເປີດສົກຮຽນໃໝ່ ສົກຮຽນ 2023-2024 ໃນວັນທີ 1 ກັນຍານີ້.
ທ່ານ ຄຳບອນ ບຸນນະລາດ ຜູ້ອຳນວຍການ ບໍລິສັດ ລັດວິສາຫະກິດໂຮງພິມສຶກສາ ໄດ້ໃຫ້ສຳພາດຕໍ່ນັກຂ່າວ ໜັງສືພິມປະຊາຊົນ ໃນວັນທີ 29 ສິງຫາ ນີ້ວ່າ: ໂຮງພິມສຶກສາໄດ້ສໍາເລັດການພິມປຶ້ມແບບຮຽນ, ປຶ້ມຄູ່ມືຄູ ແລະ ສຳເລັດການແຈກຢາຍປຶ້ມດັ່ງກ່າວໄປເຖິງໂຮງຮຽນຕ່າງໆ ໃນຂອບເຂດທົ່ວປະເທດ ນັບແຕ່ທ້າຍເດືອນກໍລະກົດເປັນຕົ້ນມາແນໃສ່ເພື່ອຮັບປະກັນໃຫ້ທັນກັບການເປີດສົກຮຽນໃໝ່ ສົກຮຽນ 2023-2024 ໃນວັນທີ 1 ກັນຍາ ນີ້ ຊຶ່ງໂຮງພິມສຶກສາໄດ້ຮັບການມອບໝາຍ 2 ໜ້າທີ່ຄື: ພິມປຶ້ມຕາມໂຄງການທີ່ກະຊວງ ສສກ ມອບໝາຍໃຫ້ ແລະ ພິມປຶ້ມເພື່ອຈໍາໜ່າຍຕອບສະໜອງຕາມຄວາມຮຽກຮ້ອງຕ້ອງການຂອງນັກຮຽນກໍຄືສັງຄົມ ເຂົ້າໃນການຮຽນ-ການສອນ, ທັງ 2 ໜ້າທີ່ນີ້ໄດ້ມີການປະສານກັນບໍ່ສາມາດຕັດແຍກອອກຈາກກັນໄດ້, ຖ້າອີງຕາມຈຳນວນນັກຮຽນທີ່ມາຮຽນແລ້ວຈຶ່ງພິມເຫັນວ່າມີຄວາມຫຍຸ້ງຍາກ, ຕາມແຜນຂອງລັດຖະບານປຶ້ມແບບຮຽນຫົວໜຶ່ງໃຫ້ນໍາໃຊ້ໄດ້ 3 ປີ (ບໍ່ຮູ້ວ່ານະໂຍບາຍດັ່ງກ່າວສອດຄ່ອງບໍ່) ເພາະຖ້າຫາກຢູ່ເຂດນອກ ຫຼື ນັກຮຽນອະນຸບານ, ປະຖົມການນຳໃຊ້ປຶ້ມຕົວຈິງ 3 ປີອາດບໍ່ໄດ້ ຍ້ອນມີການຈີກຂາດ ແລະ ເປື້ອນນໍາໃຊ້ຕໍ່ໄປບໍ່ໄດ້. ດັ່ງນັ້ນ, ທາງໂຮງພິມຈຶ່ງກຳນົດບໍ່ທັນໄດ້. ສະນັ້ນໂຄງການເພີ່ນເຮັດການປະມູນເປີດກວ້າງລະຫວ່າງລັດກັບເອກະຊົນມາ 2 ປີແລ້ວ, ປີຜ່ານມາທາງໂຮງພິມເຮົາໄດ້ປຶ້ມຢູ່ 60% ຂອງຈໍານວນປຶ້ມທັງໝົດ, ປີນີ້ໄດ້ປຶ້ມ 80% ຂອງຈໍານວນປຶ້ມທັງໝົດທີ່ຢູ່ໃນໂຄງການຂອງກະຊວງ ສສກ ກໍານົດໄວ້, ສ່ວນເຫຼືອແມ່ນອີງໃສ່ການແຈກຢາຍຂອງລັດຖະບານເຊັ່ນ: ປຶ້ມອະນຸບານລັດຖະບານໄດ້ພິມເພື່ອແຈກຢາຍຈຳນວນ 428.708 ກວ່າຫົວ, ພິມເພື່ອຈຳໜ່າຍ 5 ພັນກວ່າຫົວເສີມໄວ້ເພື່ອນັກຮຽນເຮັດຈີກຂາດ, ປຶ້ມຊັ້ນປະຖົມພິມ 342.115 ຫົວ, ພິມເພື່ອຈຳໜ່າຍ 138.416 ຫົວ, ສະຫຼຸບແລ້ວປຶ້ມແບບຮຽນຊັ້ນປະຖົມ ແລະ ມັດທະຍົມທັງໝົດລັດຖະບານໃຫ້ພິມ 770.823 ຫົວ, ພິມຈຳໜ່າຍ 939.032 ຫົວ ຊຶ່ງເປັນໂຕເລກທີ່ວາງແຜນໄວ້. ມາຮອດປັດຈຸບັນປຶ້ມແບບຮຽນບາງຊະນິດຂາດ ຍ້ອນແມ່ຄ້າຄົນກາງກຳໄດ້ສະພາບຈຸດພິເສດຂອງຜູ້ບໍລິໂພກ ຈຶ່ງມາຊື້ເພື່ອໄປຂາຍຕໍ່ເປັນຈຳນວນຫຼາຍ ເຮັດໃຫ້ໂຮງພິມຕ້ອງໄດ້ພິມປຶ້ມເພີ່ມ ເພື່ອຕອບສະໜອງໃຫ້ທັນກັບການເປີດສົກຮຽນໃໝ່ໃນວັນທີ 1 ກັນຍາ ທີ່ຈະມາເຖິງນີ້.
ທ່ານ ຄຳບອນ ບຸນນະລາດ ກ່າວໃຫ້ຮູ້ຕື່ມອີກວ່າ: ສຳລັບສິ່ງທ້າທາຍແມ່ນການຂົນສົ່ງພາກລັດຕ້ອງໄດ້ເອົາໃຈໃສ່ຕິດຕາມພົວພັນຢ່າງລະອຽດແທ້ ແລະ ການເໜັງຕີງຂອງອັດຕາແລກປ່ຽນໄດ້ສົ່ງຜົນກະທົບຕໍ່ການພິມ, ໃນໄລຍະຫຼາຍປີຜ່ານມາໂຮງພິມສຶກສາບໍ່ເຄີຍຂຶ້ນລາຄາປຶ້ມ ແຕ່ຕົກມາປີນີ້ມີຄວາມຈຳເປັນຕ້ອງໄດ້ປັບຂຶ້ນລາຄາປຶ້ມເກືອບ 20% ດ້ວຍຄວາມຈຳເປັນເພື່ອໃຫ້ສອດຄ່ອງກັບສະພາບເສດຖະກິດໃນປັດຈຸບັນ. ສຳລັບການພິມປຶ້ມຂຽນເພື່ອຕອບສະໜອງຄວາມຕ້ອງການຂອງນັກຮຽນກໍຄືສັງຄົມ ໃນຕໍ່ໜ້າໂຮງພິມຈະນໍາສະເໜີຂັ້ນເທິງເພື່ອພິຈາລະນາ. ແຜນຕໍ່ໜ້າເພື່ອໃຫ້ຄູ-ອາຈານ, ນັກຮຽນທົ່ວປະເທດໄດ້ຊື້ປຶ້ມໃນລາຄາຖືກ ສິ່ງສຳຄັນເຮົາຕ້ອງມີເວັບໄຊລວມຂອງກະຊວງ ສສກ ຫຼື ຂອງກົມໃດ ໜຶ່ງທີ່ເຮັດໜ້າທີ່ຮັບຜິດຊອບ ຫຼື ອາດຈະເປັນຂອງສຳນັກພິມທີ່ຮັບຜິດຊອບກ່ຽວກັບການຈັດພິມ ແລະ ສົ່ງປຶ້ມໄປແຕ່ລະໂຮງຮຽນ ສາມາດຮີບໂຮມອອນລາຍວ່າໂຮງຮຽນໃດມີຄວາມຕ້ອງການປຶ້ມຫຼາຍໜ້ອຍສໍ່າໃດ ຕາມການເກັບກຳຂໍ້ມູນຜ່ານມາເຫັນວ່າບໍ່ກົງກັບຄວາມຕ້ອງການພິມ. ດັ່ງນັ້ນ ຈຶ່ງເຮັດໃຫ້ບາງຄັ້ງພິມປຶ້ມບໍ່ພຽງພໍ. ຖ້າເຮົາມີເວັບໄຊລວມຄືແນວນັ້ນຈະສາມາດຮວບຮວມຄວາມຕ້ອງການປຶ້ມ ເຮັດໃຫ້ປຶ້ມມີພຽງພໍຕອບສະໜອງທົ່ວເຖິງ ລາຄາປຶ້ມຈະຖືກລົງ.
ຂ່າວ: ພູວັນ
