ຢາສູບໄຟຟ້າມີສານທີ່ເປັນອັນຕະລາຍຕໍ່ສຸຂະພາບຂອງຜູ້ສູບຫຼາຍກວ່າ 4.000 ຊະນິດບັນດາສານເຫຼົານັ້ນສາມາດສົ່ງຜົນກະທົບຕໍ່ຫຼອດປອດ ເຮັດໃຫ້ຫຼອດປອດມີການອຸດຕັນ ສົ່ງຜົນກະທົບຕໍ່ລະບົບປະສາດ ສະໝອງຈະເຮັດໃຫ້ຄວາມຈຳສັ້ນ ຊຶມເສົ້າ ຄວບຄົມອາລົມຈິດບໍ່ໄດ້ ອັກເສບຫຼອດລົມຊຳເຮື້ອ ກໍ່ໃຫ້ເກີດພະຍາດມະເຮັງ ພ້ອມດຽວກັນນັ້ນຢາສູບໄຟຟ້າຍັງສົ່ງຜົນກະທົບຕໍ່ຄົນໃກ້ສິດທີ່ໄດ້ຮັບຄວັນຢາສູບໂດຍສະເພາະເດັກນ້ອຍ ແມ່ຍິງຖື ຫຼ ຜູ້ສູງອາຍຸ ແລະ ເສຍຊີວິດໄດ້.
ທ່ານ ດຣ ນາງ ສີສຸພັນ ວິດາມາລີ ຫົວໜ້າພະແນກປອດ-ວັນນະໂລກ ໂຮງໝໍມະໂຫສົດ ໃຫ້ສຳພາດວັນທີ 29 ສິງຫາ 2023 ວ່າ ພະຍາດອັກເສບປອດສ່ວນໃຫຍ່ແມ່ນເກີດຈາກການຕິດເຊື້ອໃນປອດເຊິ່ງສາເຫດຂອງການຕິດເຊື້ອດັ່ງກ່າວເກີດຈາກການຕິດເຊື້ອ ຫຼື ການແພ້ສານບາງຢ່າງ ສຳລັບຜູ້ທີ່ສູບຢາສູບໄຟຟ້າຈະມີອາການປອດອັກເສບຮຸນແຮງທີ່ຜິດປົກກະຕິ ແຕກຕ່າງຈາກຜູ້ຕິດເຊື້ອໃນປອດທົ່ວໄປ ຫຼື ຜູ້ອັກເສບປອດຕາມລະດູການ ເມື່ອບໍ່ດົນມານີ້ໂຮງມະໂຫສົດໄດ້ກວດພົບຄົນເຈັບທີ່ໄດ້ຮັບຜົນກະທົບຈາກການສູບຢາໄຟຟ້າ 2 ກໍລະນີອາຍຸລະຫວ່າງ 25-35 ປີ ທີ່ມີອາການທາງລະບົບຫາຍໃຈຮຸນແຮງຄື ຫາຍໃຈຝືດ ເຈັບໜ້າເອິກ ໄອແຫ້ງ ບາງຄັ້ນມີເລືອດອອກມານຳ ຈາກນັ້ນກໍໄດ້ມີການກວດຮ່າງກາຍດ້ວຍການສ່ອງໄຟຟ້າແລ້ວພົບວ່າປອດທັງສອງເບື້ອງເປັນຝ້າຂາວ ເຊິ່ງອາການຂອງຄົນເຈັບດັ່ງກ່າວອາດຈະເກີດຈາກການສູບຢາສູບໄຟຟ້າ ເນື່ອງຈາກຜູ້ກ່ຽວມີການພົວພັນກັບຢາສູບໄຟຟ້າເປັນເວລາດົນພໍສົມຄວນ ນອກຈາກນີ້ຍັງມີຜູ້ສູບຢາສູບທົ່ວໄປເຂົ້າມາປິ່ນປົວຢູ່ໂຮງໝໍເປັນຈຳນວນຫຼາຍ ບາງກໍລະນີສູບຢາສູບມາດົນພາໃຫ້ເກີດພະຍາດແຊກຊ້ອນໃນປອດເປັນຕົ້ນ ພະຍາດວັນນະໂລກ ໃບໄມ້ໃນປອດ ແລະ ກາຍເປັນພະຍາດມະເຮັງປອດ.
