ເນື່ອງຈາກຝົນຕົກໜັກເປັນເວລາຫຼາຍຊົ່ວໂມງຕິດຕໍ່ກັນ, ເຮັດໃຫ້ຫ້ວຍນ້ຳຈານໄຫຼນອງຍື່ງຂຶ້ນຖ້ວມບ້ານບວມເລົາ ແລະ ບ້ານໂພລາດ, ເມືອງຈອມເພັດ, ແຂວງຫຼວງພະບາງ, ໃນຄ່ຳຄືນຂອງວັນທີ 28 ສິງຫາ 2023, ດັ່ງນັ້ນຄະນະພັກ – ຄະນະບັນຊາກອງບັນຊາການທະຫານເມືອງຈອມເພັດ ຈິ່ງໄດ້ຮີບດ່ວນຈັດຕັ້ງກຳລັງ 22 ສະຫາຍ, ລົງໄປຊ່ວຍເຫຼືອປະຊາຊົນທັງສອງບ້ານ, ເຊິ່ງນຳໂດຍສະຫາຍ ພັນຕີ ຄຳດີ ໄຊຍະສິດ ຄະນະພັກຮາກຖານ, ຫົວໜ້າການທະຫານກອງຮ້ອຍ 12 ທະຫານເມືອງຈອມເພັດ. ການລົງຊ່ວຍເຫຼືອຄັ້ງນີ້, ໄດ້ນຳກຳລັງຊ່ວຍເຄື່ອນຍ້າຍເຄື່ອງຂອງ, ສັດລ້ຽງ ແລະ ເດັກນ້ອຍ ທັງສອງບ້ານໄປຂຶ້ນໄປສູ່ເຂດທີ່ປອດໄພ.
ໃນນີ້ບ້ານບວມເລົາໄດ້ຮັບຜົນກະທົບຈຳນວນ 9 ຫັຼງຄາເຮືອນ, ບ້ານໂພລາດ 9 ຫຼັງຄາເຮືອນ, ປະຈຸບັນກຳລັງກອງບັນຊາການທະຫານເມືອງຈອມເພັດ ໄດ້ລົງສົມທົບກັບກຳລັງປ້ອງກັນຄວາມສະຫງົບເມືອງ ແລະພໍ່ແມ່ປະຊາຊົນພາຍໃນບ້ານ ຮ່ວມກັນອະນາໄມຕາມເສັ້ນທາງ, ເຮືອນຊານ, ແລະ ຂອບເຂດບໍລິເວນບ້ານ ສຳເລັດ 70%, ສ່ວນຄວາມເສຍຫາຍແມ່ນພາກສ່ວນກ່ຽວຂ້ອງຈະສະຫຼຸບລາຍງານໃຫ້ຮັບຊາບຕາມພາຍຫຼັງ.
ຂ່າວ: ສຸລິພົນ ວິໄລພອນ.
