ໃນວັນທີ 29 ສິງຫາ 2023 ນີ້. ທ່ານ ໄພວີ ສີບົວລິພາ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ. ໃນໂອກາດລົງເຄື່ອນໄຫວວຽກງານໃນຄັ້ງນີ້ ທ່ານລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ໄດ້ເຂົ້າພົບ ທ່ານ ບຸນໂຈມ ອຸບົນປະເສີດ ກໍາມະການສູນກາງພັກ, ເລຂາພັກແຂວງ-ເຈົ້າແຂວງສະຫວັນນະເຂດ ເພື່ອແຈ້ງຈຸດປະສົງ ໂດຍສະເພາະ ແມ່ນການຊຸກຍູ້ການຈັດຕັ້ງປະຕິບັດວຽກງານຍຸຕິທໍາຮາກຖານປະຈໍາປີ 2023 ຕິດພັນວຽກງານຈັດຕັ້ງປະຕິບັດຄໍາຕັດສີນຂອງສານ. ຈາກນັ້ນ, ທ່ານລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ກໍໄດ້ໄປ ຊີ້ນໍາ ແລະ ຊຸກຍູ້ ການຈັດຕັ້ງປະຕິບັດວຽກງານຍຸຕິທໍາຮາກຖານ ຢູ່ພະແນກຍຸຕິທໍາ ແຂວງ, ມີຜູ້ເຂົ້າຮ່ວມທັງໝົດຈໍານວນ 130 ຄົນ.
ໃນກອງປະຊຸມ ທ່ານ ຄໍາສິງ ເພັດໄຊຍະພອນ ຮອງຫົວໜ້າພະແນກຍຸຕິທຳແຂວງສະຫວັນນະເຂດ, ທ່ານ ສົມສະໜິດ ດອນປະເສີດ ຫົວໜ້າສະຖາບັນຍຸຕິທໍາແຫ່ງຊາດ ສາຂາສະຫວັນນະເຂດ ກໍໄດ້ຜັດປ່ຽນກັນລາຍງານສະພາບການຈັດຕັ້ງປະຕິບັດວຽກງານຍຸຕິທຳຮາກຖານໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023. ເປັນຕົ້ນ ວຽກງານສ້າງ ແລະ ປັບປຸງນິຕິກໍາ, ວຽກງານໂຄສະນາເຜີຍແຜ່ກົດໝາຍ, ວຽກງານການສ້າງບ້ານ ແລະ ຄອບຄົວແບບຢ່າງປະຕິບັດກົດໝາຍ, ວຽກກງານໄກ່ເກັ່ຍຂໍ້ຂັດແຍ່ງຂັ້ນບ້ານ, ວຽກງານຍຸຕິທໍາເດັກ, ວຽກງານສ້າງບຸກຄະລາກອນທາງດ້ານກົດໝາຍ, ວຽກງານປະຕິບັດຄໍາຕັດສີນຂອງສານ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ບັນດາຂໍ້ຄົງຄ້າງທີ່ຈະຕ້ອງໄດ້ເອົາໃຈໃສ່ປັບປຸງແກ້ໄຂໃນຕໍ່ໜ້າ. ຈາກນັ້ນ ທ່ານ ສີວິໄຊ ປະສານພອນ ຮອງຫົວໜ້າສະຖາບັນຍຸຕິທໍາແຫ່ງຊາດ ກະຊວງຍຸຕິທຳ ພະນັກງານລົງກໍ່ສ້າງຮາກຖານ ປະຈຳຢູ່ພະແນກຍຸຕິທຳ ແຂວງສະຫວັນນະເຂດ ໄດ້ຂຶ້ນລາຍງານການເຄື່ອນໄຫວວຽກງານຂອງຕົນໃນໄລຍະລົງກໍ່ສ້າງຮາກຖານ 3 ເດືອນຜ່ານມາ ໂດຍໄດ້ຍົກໃຫ້ຜົນສຳເລັດ, ດ້ານອ່ອນ ແລະ ຂໍ້ຄົງຄ້າງ ທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ.
ໃນຕອນທ້າຍຂອງກອງປະຊຸມ ທ່ານ ໄພວີ ສີບົວລິພາ ກຳມະການສູນກາງພັກ, ເລຂາຄະນະບໍລິ ຫານພັກກະຊວງ, ລັດຖະມົນຕີກະຊວງຍຸຕິທຳ ກໍໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງ ຍໍຊົມເຊີຍ ຕໍ່ຜົນງານທີ່ພະແນກຍຸຕິທໍາແຂວງ, ສະຖາບັນຍຸຕິທໍາແຫ່ງຊາດ ສາຂາສະຫວັນນະເຂດ ແລະ ຫ້ອງການຍຸຕິທໍາເມືອງ ຍາດມາໄດ້ໃນໄລຍະຜ່ານມາ. ພ້ອມນັ້ນ ທ່ານກໍໄດ້ເນັ້ນໜັກ ໃຫ້ຄະນະພັກ-ຄະນະນໍາຂອງພະແນກຍຸຕິທໍາ ເຊີດຊູບົດບາດການນໍາພາຂອງພັກ, ຄົ້ນຄວ້າເຊື່ອມຊຶມ, ກໍາແໜ້ນແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ໃນແຕ່ລະໄລຍະ. ເອົາໃຈໃສ່ເຄື່ອນໄຫວຈັດຕັ້ງປະຕິບັດຄຳແນະນໍາຂອງລັດຖະມົນຕີກ່ຽວກັບການ ຈັດຕັ້ງປະຕິບັດວຽກງານຍຸຕິທຳຮາກຖານ ປະຈຳປີ 2023 ຢ່າງແຂງແຮງ ແລະ ເປັນຂະບວນການຟົດຟື້ນ, ຍົກສູງຄວາມເປັນແບບຢ່າງນຳໜ້າໃນການປະຕິບັດໜ້າທີ່ ທີ່ພັກ-ລັດ ແລະ ປະຊາຊົນມອບໝາຍໃຫ້ເປັນຢ່າງດີ ມີຜົນສຳເລັດໃໝ່ໃຫຍ່ຫຼວງກວ່າເກົ່າ.
ໃນໂອກາດລົງເຄື່ອນໄຫວຊຸກຍູ້ວຽກງານຍຸຕິທຳຮາກຖານໃນຄັ້ງນີ້ ທ່ານລັດຖະມົນຕີກະຊວງຍຸຕິທຳກໍໄດ້ມອບເງິນ ໃຫ້ພະແນກຍຸຕິທໍາແຂວງສະຫວັນນະເຂດ ຈໍານວນ 15,000,000 ກີບ (ສິບຫ້າລ້ານກີບ) ແລະ ມອບໃຫ້ຫ້ອງການຍຸຕິທໍາ 15 ຕົວເມືອງ, ເມືອງລະ 15,000,000 ກີບ (ສິບຫ້າລ້ານກີບ) ລວມທັງໝົດ 240,000,000 ກີບ (ສອງຮ້ອຍສີ່ສິບລ້ານກີບ) ເພື່ອນໍາໃຊ້ເຂົ້າໃນການເຄື່ອນໄຫວວຽກງານຍຸຕິທໍາຮາກຖານ.
ໃນຕອນບ່າຍຂອງວັນດຽວກັນ ທ່ານລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ກໍໄດ້ໄປຢ້ຽມຢາມພົບປະ ແລະ ຊຸກຍູ້ການຈັດຕັ້ງປະຕິບັດວຽກງານຍຸຕິທໍາຮາກຖານຢູ່ຫ້ອງການຍຸຕິທໍາເມືອງອຸທຸມພອນ ໃຫ້ກຽດຕ້ອນຮັບໂດຍ ທ່ານ ອຸ່ນແກ້ວ ວົງສາຄອນ ຄະນະປະຈໍາພັກເມືອງ ຫົວໜ້າຄະນະຈັດຕັ້ງເມືອງອຸທຸມພອນ, ທ່ານ ສີສົມພົງ ມະນີບົດ ກໍາມະການພັກເມືອງ ຫົວໜ້າຫ້ອງການຍຸຕິທໍາເມືອງອຸທຸມພອນ ພ້ອມດ້ວຍອົງການຈັດຕັ້ງອອ້ມຂ້າງເມືອງອຸທຸມພອນ. ໃນໂອກາດການລົງພົບປະ ແລະ ຊຸກຍູ້ວຽກງານຍຸຕິທໍາຮາກຖານໃນຄັ້ງນີ້ ທ່ານລັດຖະມົນຕີ ຍັງໄດ້ຮັບຟັງການລາຍງານກ່ຽວກັບການປະຕິບັດໜ້າທີ່ວຽກງານໃນໄລຍະຜ່ານມາ ຈາກຫ້ອງການຍຸຕິທໍາເມືອງອຸທຸມ ພອນ ຕື່ມອີກ ແລະ ຜູ້ເຂົ້າຮ່ວມກໍໄດ້ມີການປະກອບຄໍາຄິດຄໍາເຫັນເພື່ອເປັນການແລກປ່ຽນບົດຮຽນເຊິ່ງກັນ ແລະ ກັນ ແລະ ເຕັມໄປດ້ວຍບັນຍາກາດອັນດີ.
ຂ່າວ-ພາບ: ໄຊຍະສິດ ບັນຍາວົງ
