ລະຫວ່າງວັນທີ 28-29 ສິງຫາ 2023 ນີ້,ສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງຊຸດທີ II ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງສະຫວັນນະເຂດຊຸດທີ II ຢູ່ 3 ຈຸດຂອງເມືອງໄຊພູທອງຄື: ເຂດກຸ່ມບ້ານທີ 1 ບ້ານຄັນທ່າຈານ,ສະໂມສອນເມືອງ ແລະ ເຂດກຸ່ມບ້ານທີ 2 ບ້ານທ່າໂພ,ນໍາໂດຍທ່ານ ປອ. ນາງ ບົວໄຂ ເພັງພະຈັນ ສະມາຊິກສະພາແຫ່ງຊາດເຂດເລືອກຕັ້ງທີ 13, ທ່ານ ແສງສະຫວັນ ອະນຸສິດ ປະທານຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງໄຊພູທອງ,ໂດຍໃຫ້ກຽດຕ້ອນຮັບຈາກ ທ່ານ ພົມມາ ສົງວິໄລ ຮອງເຈົ້າເມືອງໄຊພູທອງ,ຜູ້ຊີ້ນໍາວຽກງານວັດທະນະທໍາ-ສັງຄົມເມືອງ,ມີບັນດາການນໍາຂອງເມືອງ,ພະແນກການ,ຂະແໜງການ,ອົງການຈັດຕັ້ງມະຫາຊົນ,ອໍານາດການປົກຄອງບັນດາບ້ານເຂົ້າຮ່ວມ.
ທ່ານ ປອ. ນາງ ບົວໄຂ ເພັງພະຈັນ ສະມາຊິກສະພາແຫ່ງຊາດເຂດເລືອກຕັ້ງທີ 13 ປະທານຄະນະບໍລິຫານງານສະຫະພັນແມ່ຍິງກະຊວງຖະແຫຼງຂ່າວ-ວັດທະນະທໍາ ແລະ ທ່ອງທ່ຽວ,ພ້ອມດ້ວຍຄະນະໄດ້ໂອ້ລົມ ແລະ ເຜີຍແຜ່ ເນື້ອໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງສະຫວັນນະເຂດຊຸດທີ II ເຊິ່ງມີເນື້ອໃນກ່ຽວກັບ ວຽກງານສໍາຄັນຕ່າງໆຂອງຊາດ ໂດຍສະເພາະບັນຫາອັດຕາແລກປ່ຽນເງິນຕາ,ລາຄາສິນຄ້າແພງ ແລະ ບັນຫາຢາເສບຕິດ,ຄຸນນະພາບການສຶກສາ,ທີ່ໄດ້ສົ່ງຜົນກະທົບຕໍ່ຊີວິດການເປັນຢູ່ຂອງພະນັກງານ-ລັດຖະກອນ,ທະຫານ-ຕໍາຫຼວດ ແລະ ພໍ່ແມ່ປະຊາຊົນ,ເຊິ່ງລັດຖະບານ ກໍ່ໄດ້ເລັ່ງແກ້ໄຂ.ນອກຈາກ ກໍ່ໄດ້ສ້າງໂອກາດໃຫ້ປະຊາຊົນປະກອບ ຄໍາຄິດຄໍາເຫັນ ແລະ ຂໍ້ສະເໜີຕ່າງໆ, ເຊິ່ງບັນຫາສ່ວນໃຫຍ່ແມ່ນກ່ຽວກັບການແກ້ໄຂ ຄວາມທຸກຍາກຂອງພໍ່ແມ່ປະຊາຊົນ ໃນສະພາບທີ່ປະເທດຊາດຂອງພວກເຮົາກໍາລັງປະເຊີນໜ້າກັບຄວາມຫຍຸ້ງຍາກທາງດ້ານເສດຖະກິດ-ການເງິນ,ບັນຫາເງິນເຟີ້,ບັນຫາເສັ້ນທາງຄົມມະນາຄົມ,ຄຸນນະພາບການສຶກສາ,ຄູອາສາສະໝັກ,ເງິນອຸດໜູນນາຍບ້ານ,ປະກົດການຫຍໍ້ທໍ້ກ່ຽວກັບສິ່ງເສບຕິດ ທີ່ຍັງເປັນບັນຫາກົດໜ່ວງທ່ວງດຶງຕໍ່ກັບການພັດທະນາປະເທດຊາດ.
ພາບ-ຂ່າວ: ພັນທະມິດ ວົງສຸທິ.
