ກະຊວງເຕັກໂນໂລຊີ ແລະ ການສື່ສານ (ຕສ) ຮ່ວມກັບອົງ ການສະຫະປະຊາຊາດ ເພື່ອການພັດທະນາ (UNDP) ປະຈຳ ສປປ ລາວ ໄດ້ຈັດພິທີເປີດການນຳໃຊ້ລະບົບບໍລິການພາກລັດປະຕູດຽວ (Gov-X) ຊຶ່ງເປັນລະບົບສູນລວມຂໍ້ມູນ ແລະ ການບໍລິການຂອງພາກລັດ ເພື່ອສ້າງເງື່ອນໄຂໃຫ້ ປະຊາຊົນ, ທຸລະກິດ ແລະ ພະນັກງານທີ່ເຮັດວຽກກ່ຽວກັບການບໍລິການ ສາມາດເຂົ້າຫາຂໍ້ມູນ ແລະ ການບໍລິການຂອງພາກລັດຜ່ານປະຕູດຽວ. ພິທີດັ່ງກ່າວ ມີຂຶ້ນໃນວັນທີ 28 ສິງຫາ 2023 ທີ່ນະຄອນຫຼວງວຽງຈັນ ໂດຍມີ ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ (ກຕສ), ມີຜູ້ຕາງໜ້າອົງການ UNDP ປະຈຳ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ລະບົບບໍລິການພາກລັດ ປະຕູດຽວ ສາມາດນຳໃຊ້ຜ່ານໂທລະສັບມືຖືສະມາດໂຟນ ຊຶ່ງລະບົບດັ່ງ ກ່າວມີບໍລິການເບື້ອງຕົ້ນຄື: ລະບົບລົງທະບຽນເລກໝາຍໂທລະສັບດ້ວຍຕົນເອງ (3 ແກຣັບ), ແມ່ນແອັບທີ່ໃຫ້ປະຊາຊົນ ສາມາດລົງທະບຽນເລກໝາຍໂທລະສັບດ້ວຍຕົນເອງ ໄດ້ຜ່ານລະບົບອອນລາຍ; ລະບົບກວດສອບຂໍ້ມູນບັດປະກັນສັງຄົມ (LSSO) ໂດຍຜູ້ນຳໃຊ້ສາມາດ ເຂົ້າໄປກວດສອບຂໍ້ມູນບັດປະກັນສັງຄົມຂອງຕົນ ໂດຍການປ້ອນລະຫັດບັດ ຊຶ່ງລະບົບຈະສະແດງຂໍ້ມູນພື້ນຖານປະກັນສັງຄົມເຊັ່ນ: ຊື່ໂຮງໝໍ ແລະ ຂໍ້ມູນປະກັນສັງຄົມຂອງຄອບຄົວ; ລະບົບຄັງປັນຍາລາວ ເປັນລະບົບສື່ການສອນແບບອອນລາຍ, ຜູ້ໃຊ້ສາມາດເຂົ້າໄປຮຽນວິຊາຕ່າງໆ ຕັ້ງແຕ່ລະດັບ ປ.1 ໄປຈົນຮອດ ມ.7 ແລະ ມີຫຼັກສູດສຳລັບການເພີ່ມທັັກສະ ໃນການສອນໃຫ້ກັບອາຈານ ໂດຍບໍ່ເສຍຄ່າ; ລະບົບລວມສູນແບບຟອມ ແລະ ເອກະສານທາງການ ເພື່ອໃຫ້ປະຊາຊົນສາມາດ download ປະກອບເອກະສານຕ່າງໆ ໄດ້ຢ່າງວ່ອງໄວ ໂດຍບໍ່ຈຳເປັນເດີນທາງໄປປ່ອງບໍລິການ; ລະບົບຂໍ້ມູນວິສາຫະກິດແຫ່ງຊາດ (NED) ເພື່ອກວດສອບທະບຽນວິສາຫະກິິດ ຂອງບັນດາບໍລິສັດວິສາຫະກິດ, ບໍລິສັດ ແລະ ຫ້າງຮ້ານຕ່າງໆ ວ່າໄດ້ຈົດທະບຽນວິສາຫະກິດແລ້ວ ຫຼື ບໍ່; ລະບົບໃບຂັບຂີ່ດີຈີຕອນ (e-Driving License) ເພື່ອລົງທະບຽນໃບຂັບຂີ່ໃຫ້ເປັນຮູບແບບດີຈີຕອນ, ປັດຈຸບັນ ກຳລັງດຳເນີນການປະສານສົມທົບກັບກົມຂົນສົ່ງ, ກະຊວງໂຍທາທິການ ແລະ ຂົນ ສົ່ງ ໃນການເຊື່ອມຕໍ່ຂໍ້ມູນ ກັບລະບົບຖານຂໍ້ມູນໃບຂັບຂີ່.
ທ່ານ ບໍ່ວຽງຄຳ ວົງດາລາ ໄດ້ກ່າວວ່າ: ປັດຈຸບັນ, ເຕັກໂນໂລຊີດີຈີຕອນ ໄດ້ກາຍເປັນເຄື່ອງມືທີ່ສຳຄັນ ໃຫ້ແກ່ການເຄື່ອນໄຫວ, ມີການພັດທະນາຢ່າງກ້າວກະໂດດ ແລະ ເປັນສິ່ງຈຳເປັນໃນການດຳລົງຊີວິດຂອງມວນມະນຸດເຮົາ ໃຫ້ມີຄວາມສະດວກສະບາຍ ແລະ ເປັນປັດໄຈທີ່ສຳຄັນໃຫ້ແກ່ ລັດຖະບານຂອງຫຼາຍປະເທດນຳໃຊ້ເຂົ້າໃນວຽກງານບໍລິຫານ-ບໍລິການສັງຄົມ. ສປປ ລາວ ໄດ້ມີວິໄສທັດຫັນເປັນເສດຖະກິດດີຈິຕອນ ໄລຍະ 20 ປີ (2021-2040), ແຜນຍຸດທະສາດເສດຖະກິດດີຈິຕອນໄລຍະ 10 ປີ (2021-2030) ແລະ ແຜນການຫັນເປັນເສດຖະກິດດີຈີຕອນ ໄລຍະ 5 ປີ (2021-2025) ຊຶ່ງປະກອບມີ 3 ເສົາຄໍ້າຄື: ເສດຖະກິດດີຈີຕອນ, ສັງຄົມດີຈິຕອນ ແລະ ລັດຖະບານດີຈີຕອນ. ໃນໄລຍະຜ່ານມາ ກະ ຊວງເຕັກໂນໂລຊີ ແລະ ການສື່ສານ ໄດ້ເປັນໃຈກາງໃນການ ພັດທະນາ ແລະ ນໍາເອົາເຕັກໂນໂລຊີດີຈີຕອນ ສະໜອງໃຫ້ແກ່ບັນດາກະຊວງ ຂະແໜງການ ທັງສູນກາງ ແລະ ທ້ອງຖິ່ນ ເປັນຕົ້ນແມ່ນລະບົບເຄືອຂ່າຍພາກລັດ (Government Network), ລະບົບຫ້ອງການທັນສະໄໝ e-Office, ລະບົບກອງປະ ຊຸມທາງໄກ (Video Conference), ລະບົບການສື່ສານພາກລັດ (G-Chat), ລະບົບຈົດໝາຍເອເລັກໂຕຣນິກ (Email) ແລະ ລະບົບອື່ນໆ.
ຂໍ້ມູນ-ພາບ: ຂ່າວສານປະເທດລາວ
