ຈາກສະພາບຝົນຕົກຕິດຕໍ່ກັນຫຼາຍວັນ ນັບແຕ່ວັນທີ 1 ສິງຫາ 2023 ເປັນຕົ້ນມາ ເຮັດໃຫ້ມີດິນເຊາະເຈື່ອນລົງມາຈາກເທິງພູ ຊຶ່ງສ້າງຄວາມຫຍຸ້ງຍາກໃຫ້ແກ່ການສັນຈອນໄປມາ ຢູ່ບັນດາເສັ້ນທາງຈຳນວນໜຶ່ງ ຂອງແຂວງໄຊສົມບູນ ເນື່ອງຈາກວ່າມີດິນເຊາະເຈື່ອນ ເຮັດໃຫ້ເສັ້ນທາງເກີດການເປ່ເພບາງຈຸດ ໂດຍສະເພາະແມ່ນ ເສັ້ນທາງຈາກເທດສະບານ ແຂວງໄຊສົມບູນ ຫາ ເມືອງລ້ອງຊານ ທີ່ມີການເຊາະເຈື່ອນຢູ່ຈຸດພູຍ່າເຖົ້າ ໃກ້ກັບບ້ານຜາແດງ.
ປັດຈຸບັນ, ພາກສ່ວນທີ່ກ່ຽວຂ້ອງກຳລັງເລັ່ງແກ້ໄຂ ເພື່ອເຮັດໃຫ້ສາມາດສັນຈອນໄປ-ມາໄດ້, ນອກຈາກນີ້, ຍັງມີເສັ້ນທາງໄປບ້ານອອມ ເກີດການເປ່ເພ ຢູ່ຈຸດພູກິ້ວລົມ ແລະ ເສັ້ນທາງໄປບ້ານອ່າວເໜືອ ໄດ້ຮັບຜົນກະທົບ ຕື່ມອີກ, ປັດຈຸບັນ ເສັ້ນທາງບ້ານອ່າວ ໄດ້ຮັບການສ້ອມແປງ ແລະ ສາມາດນໍາໃຊ້ໄດ້ແລ້ວ. ສຳລັບເສັ້ນທາງໄປບ້ານອອມ ຈຸດພູກິ້ວລົມ ແມ່ນຢູ່ໃນແຜນການສ້ອມແປງ ຄາດວ່າ ຈະໄດ້ຮັບການແກ້ໄຂໃນໄວໆນີ້.
ສຳລັບຜູ້ທີ່ຈະເດີນທາງຈາກນະຄອນຫຼວງວຽງຈັນ ຫຼື ຈາກເມືອງລ້ອງຊານ ໄປຍັງເທດສະບານ ແຂວງໄຊສົມບູນ ເມື່ອເດີນທາງຮອດບ້ານຊຽງມີ ໃຫ້ລ້ຽວຂວາເຂົ້າເສັ້ນທາງເມືອງຮົ່ມ ແລ້ວນໍາໃຊ້ເສັ້ນທາງມາບ້ານອ່າວ ເຂົ້າສູ່ເທດສະບານ ຂອງແຂວງ, ສິ່ງສຳຄັນ ແມ່ນໃຫ້ສຶກສາສະພາບເສັ້ນທາງ ຢ່າງລະອຽດ ແລະ ຕິດຕາມພະຍາກອນອາກາດ ກ່ອນການເດີນທາງ ໃນທຸກໆຄັ້ງ.
ຈາກສະພາບຝົນຕົກຕິດຕໍ່ກັນຫຼາຍວັນ, ເຮັດໃຫ້ສາຍນໍ້າຈັ້ງ ທີ່ໄຫຼຜ່ານເທດສະບານ ແຂວງໄຊສົມບູນ ໄດ້ມີປະລິມານນໍ້າທີ່ເພີ່ມສູງຂຶ້ນເຕັມຕາຝັ່ງ, ກະແສນໍ້າ ກໍໄຫຼແຮງພໍສົມຄວນ, ປະຊາຊົນທີ່ອາໄສຢູ່ໃກ້ກັບຝັ່ງນໍ້າຈັ້ງ ຄວນລະມັດລະວັງ ແລະ ເອົາໃຈໃສ່ເບິ່ງແຍງລູກຫຼານຂອງຕົນໃຫ້ດີ ໂດຍບໍ່ໃຫ້ເຂົ້າມາຫຼິ້ນໃກ້ກັບສະຖານທີ່ດັ່ງກ່າວ ເພື່ອຮັບປະກັນຄວາມປອດໄພ ໃນໄລຍະປະລິມານນໍ້າ ທີ່ເພີ່ມສູງຂຶ້ນ.
ຂ່າວ-ພາບ: ຈິນລະວອນ ວໍລະສົມບູນ
