ສູນກາງຊາວໜຸ່ມປະຊາຊົນ ປະຕິວັດລາວ (ສຊປລ) ໄດ້ຈັດກິດຈະກຳຂຶ້ນໃນຫົວຂໍ້: ເວທີສົນທະນາແລກປ່ຽນປະສົບການຂອງຊາວໜຸ່ມຜູ້ທີ່ມີຜົນງານດີເດັ່ນ ຂຶ້ນໃນວັນທີ 4 ສິງຫາ ຜ່ານມາ ທີ່ ສຊປລ, ໂດຍການເຂົ້າຮ່ວມຂອງ ທ່ານ ທອງຈັນ ພູມິພັນ ຮອງເລຂາຄະນະບໍລິຫານງານສູນກາງຊາວ ໜຸ່ມປະຊາຊົນ ປະຕິວັດລາວ ຜູ້ຊີ້ນຳກົມສື່ມວນຊົນໜຸ່ມລາວ, ມີທ່ານນາງ ພອນສະຫວັນ ສິວິໄລ ຜູ້ປະສານງານໂຄງການຊ່ວຍເຫຼືອບ້ານເດັກເອັສໂອເອັສ ປະຈຳລາວ ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ທອງຈັນ ພູມິພັນ ກ່າວວ່າ: ການຈັດງານຄັ້ງນີ້ ເພື່ອເປັນເວທີ ແລກປ່ຽນປະສົບການຂອງຊາວໜຸ່ມຜູ້ທີ່ມີຜົນງານດີເດັ່ນເຂົ້າຮ່ວມກິດຈະກຳ ເພື່ອເປັນຕົວແທນໃຫ້ແກ່ຊາວໜຸ່ມ-ເຍົາວະຊົນໃນ 6 ແຂວງເປົ້າໝາຍ. ໂດຍສະເພາະແມ່ນແຂວງທີ່ມີໂຄງການຮ່ວມມືກັບສູນກາງຊາວໜຸ່ມປະຊາຊົນ ປະຕິວັດລາວ ເພື່ອສ້າງຄວາມເຂັ້ມແຂງພ້ອມທັງເຂົ້າໃຈຢ່າງຖືກຕ້ອງໃນການສະໜອງຂໍ້ມູນຂ່າວສານ ຊຶ່ງວຽກງານຂ່າວສານ, ການບໍລິໂພກຂໍ້ມູນຂອງຊາວໜຸ່ມໃນຍຸກປັດຈຸບັນ ຍິ່ງມີຄວາມສຳຄັນ ໂດຍສະເພາະແມ່ນສື່ອອນລາຍ, ໃນຍຸກເຕັກໂນໂລຊີທັນສະໄໝນີ້ ເພື່ອນຳໃຊ້ຄວາມຮູ້ຂໍ້ມູນຂ່າວສານຕ່າງໆເຂົ້າໃນການພັດທະນາທັກສະການດຳລົງຊີວິດຂອງຊາວໜຸ່ມ-ເຍົາວະຊົນ. ດັ່ງນັ້ນ, ຊາວໜຸ່ມ-ເຍົາວະຊົນ ຈຶ່ງມີຄວາມຈຳເປັນຕ້ອງໄດ້ຮຽນຮູ້ໃຫ້ຫຼາຍ ພ້ອມທັງສ້າງສະຕິຊາດ, ຮັກສາຄຸນຄ່າທາງດ້ານວັດທະນະທຳ-ສັງຄົມໄວ້ຄູ່ກັບຄົນຮຸ່ນໜຸ່ມ.
ການຈັດງານຄັ້ງນີ້ຍັງເປັນການສະເຫຼີມສະຫຼອງວັນລັດຖະທຳມະນູນວັນທີ 15 ສິງຫາ ຄົບຮອບ 32, ວັນຢຶດອຳນາດ 23 ສິງຫາ ຄົບຮອບ 32 ປີ, ວັນສ້າງຕັ້ງສື່ມວນຊົນ ແລະ ພິມຈຳໜ່າຍ ຄົບຮອບ 73 ປີ ແລະ ເພື່ອຜັນຂະຫຍາຍແຜນການຮ່ວມມືລະຫວ່າງກົມສື່ມວນຊົນໜຸ່ມລາວ ສຊປລ ກັບໂຄງການຊ່ວຍເຫຼືອບ້ານເດັກເອັສໂອເອັສລາວ.
ຂ່າວ-ພາບ: ບຸນຕອມ.
