ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ວັນທີ 28 ກໍລະກົດ ຜ່ານມາ, ຄະນະຜູ້ແທນຂັ້ນສູງແຂວງສາລະວັນ ສປປ ລາວ ນໍາໂດຍ ທ່ານ ດາວວົງ ພອນແກ້ວ ກໍາມະການສູນກາງພັກ, ເລຂາພັກແຂວງ, ເຈົ້າແຂວງສາລະວັນ ໄດ້ເດີນທາງເຄື່ອນໄຫວ ຢ້ຽມຢາມ ແລະ ເຮັດວຽກ ຮ່ວມກັບ ຄະນະຜູ້ແທນຂັ້ນສູງແຂວງເທື່ອທຽນເຫວ້ ສສ ຫຽວນາມ ໂດຍໄດ້ຮັບການຕ້ອນຮັບຈາກ ທ່ານ ເລ ເຈື່ອງ ລິວ ກໍາມະການສູນກາງພັກ ກອມມູນິດຫວຽດນາມ, ເລຂາພັກແຂວງ, ປະທານສະພາປະຊາຊົນແຂວງເທື່ອທຽນເຫວ້ ພ້ອມດ້ວຍຄະນະ ເພື່ອເພີ່ມທະວີ ແລະ ຊຸກຍູ້ວຽກວຽກສໍາຄັນ ທີ່ສອງແຂວງ ໄດ້ຮ່ວມກັນປະຕິບັດໃນບົດບັນທຶກຊ່ວຍຈໍາໃນໄລຍະຜ່ານມາ.
ການພົບປະຄັ້ງນີ້, ທັງສອງຝ່າຍ ຕ່າງກໍໄດ້ລາຍງານສະພາບການພັດທະນາເສດຖະກິດ-ສັງ ຄົມພາຍໃນແຂວງຂອງຕົນໃຫ້ກັນຊາບ, ພ້ອມທັງໄດ້ປືກສາຫາລືແລກປ່ຽນຄວາມຄິດເຫັນ ແລະ ທົບທວນຄືນການປະຕິບັດບົດບັນທຶກຊ່ວຍຈໍາ ລະຫວ່າງ ແຂວງສາລະວັນ ກັບແຂວງເທື່ອທຽນເຫວ້ ໃນໄລຍະ 2022-2026, ເພື່ອຊຸກຍູ້ເນື້ອໃນຈິດໃຈບົດບັນທຶກດັ່ງກ່າວ ໃຫ້ໄດ້ສືບຕໍ່ ແລະ ໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດສູງໃນໄວໆນີ້ ເປັນຕົ້ນການພັດທະນາເສດຖະກິດສັງຄົມ, ການຍົກລະດັບດ່ານທ້ອງຖິ່ນໂກຕ່າຍ ແຂວງສາລະວັນ ແລະ ດ່ານລະດັບຊາດ ຮົງເວີນ ແຂວງເທື່ອທຽນເຫວ້ ຂຶ້ນເປັນດ່ານສາກົນ ແລະ ຍົກລະດັບການກໍ່ສ້າງເສັ້ນທາງ S3 ເປັນທາງຫລວງແຫ່ງຊາດ, ແຕ່ສາມແຍກທາງຫລວງແຫ່ງຊາດ ເລກທີ 15 ເຊື່ອມຕໍ່ໃສ່ຊາຍແດນຫຽວດນາມ ເຊິ່ງມີລວງຍາວ 22,5 ກິໂລແມັດ, ຖ້າຫາກການພັດທະນາວຽກງານດັ່ງກ່າວສໍາເລັດຕາມຄາດໝາຍທີ່ວາງໄວ້ ຈະເປັນເງື່ອນໄຂອໍານວຍຄວາມສະດວກຫລາຍດ້ານ, ໃຫ້ແກ່ການຄ້າ, ການລົງທຶນ ແລະ ການທ່ອງ ທ່ຽວ ໂດຍສະແມ່ນການຄ້າຊາຍແດນ ລະຫ່ວາງ ສອງແຂວງ ກໍຄື ສອງປະເທດ ໃຫ້ຂະຫຍາຍຕົວດີຂຶ້ນເປັນກ້າວໆ ແລະ ນໍາຜົນປະໂຫຍດມາໃຫ້ແກ່ປະຊາຊົນຢ່າງແທ້ຈິງ.
ຂ່າວ: ແກ້ວອຸໄທ ແກ້ວມະໄລທອງ
