ກອງປະຊຸມປຶກສາຫາລືແບບມີສ່ວນຮ່ວມຂັ້ນແຂວງ ແລະ ສູນກາງ ກ່ຽວກັບບົດລາຍງານການປະເມີນຜົນກະທົບຕໍ່ສິ່ງແວດລ້ອມແບບລະອຽດ, ແຜນຄຸ້ມຄອງ ແລະ ຕິດຕາມກວດກາສິ່ງແວດລ້ອມ ສະບັບເດືອນພຶດສະພາ 2023 ສໍາລັບໂຄງການຂຸດຄົ້ນວັດຖຸດິບ ເພື່ອສະໜອງໃຫ້ໂຮງງານຊີມັງອຸດົມໄຊຈຽງເກີ ຂະໜາດ 2 ລ້ານໂຕນ/ປີ ຢູ່ເຂດບ້ານນາທົ່ງ ເມືອງນາໝໍ້ ແຂວງອຸດົມໄຊ ຂອງບໍລິສັດ ຊີມັງອຸດົມໄຊ ຈຽງເກີ ຈຳກັດຜູ້ດຽວ, ໄດ້ໄຂຂຶ້ນໃນອາທິດຜ່ານມານີ້, ທີ່ໂຮງແຮມມິດຕະພາບ ແຂວງອຸດົມໄຊ, ໂດຍການເປັນປະທານຂອງທ່ານ ອຸ່ນເຮືອນ ໄຊຍະຈັກ ຫົວໜ້າກົມສິ່ງແວດລ້ອມ, ກະຊວງຊັບພະຍາກອນທຳມະ ຊາດ ແລະ ສິ່ງແວດລ້ອມ, ມີຫົວນ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ເຈົ້າເມືອງ ນາໝໍ້ ແລະ ປະທານບໍລິສັດ ຊີມັງອຸດົມໄຊ ຈຽງເກີ ຈຳກັດ ພ້ອມດ້ວຍທິມງານ ບໍລິສັດທີ່ປຶກສາ ແລະ ພະແນກການທີ່ກ່ຽວຂ້ອງຂັ້ນແຂວງເຂົ້າຮ່ວມ.
ຈຸດປະສົງ ຂອງກອງປະຊຸມແມ່ນເພື່ອເປີດໂອກາດໃຫ້ບັນດາຂະແໜງການກ່ຽວຂ້ອງຂັ້ນສູນກາງ ແລະ ທ້ອງຖິ່ນ ໄດ້ມີການປຶກສາຫາລື ແລະ ປະກອບຄຳຄິດຄຳເຫັນໃສ່ບົດລາຍງານການປະເມີນຜົນກະທົບຕໍ່ສິ່ງແວດລ້ອມແບບລະອຽດ ລວມທັງແຜນຄຸ້ມຄອງ ແລະ ຕິດຕາມກວດກາສິ່ງແວດລ້ອມ ສໍາລັບ ໂຄງການຂຸດຄົ້ນວັດຖຸດິບ ແລະ ກໍ່ສ້າງໂຮງງານຜະລິດຊີມັງ ຂອງບໍລິສັດ ຊີມັງອຸດົມໄຊຈຽງເກີ ຈຳກັດຜູ້ດຽວ. ໃນກອງປະຊຸມຍັງໄດ້ສະເໜີກ່ຽວກັບປະຫວັດຄວາມເປັນມາຂອງໂຄງການ ແລະ ການວາງແຜນການພັດທະນາໂຄງການໃນແຕ່ລະໄລຍະ. ຈາກນັ້ນ, ຜູ້ເຂົ້າຮ່ວມຍັງໄດ້ມີການປຶກສາຫາລື ແລະ ປະກອບຄຳຄິດຄຳເຫັນທາງດ້ານວິຊາການຮ່ວມກັນ ກ່ຽວກັບເນື້ອໃນຂອງບົດລາຍງານການປະເມີນຜົນກະທົບຕໍ່ສິ່ງແວດລ້ອມແບບລະອຽດ ລວມທັງແຜນຄຸ້ມຄອງ ແລະ ຕິດຕາມກວດກາສິ່ງແວດລ້ອມ, ມາດຕະການປ້ອງກັນ, ຫຼຸດຜ່ອນ ແລະ ແກ້ໄຂຜົນກະທົບ ທີ່ອາດຈະເກີດຂຶ້ນ ຈາກການດໍາເນີນໂຄງການດັ່ງກ່າວ, ການແກ້ໄຂຜົນກະທົບຕໍ່ກັບບ້ານໄກ້ຄຽງ, ການຊົດເຊີຍທີດີນຂອງປະຊາຊົນ ແລະ ຜົນກະທົບດ້ານອື່ນໆ ເພື່ອຍົກຂຶ້ນມາ ຫາວິທີທາງແກ້ໄຂໃຫ້ເໝາະສົມ ແລະ ຖືກຕ້ອງຕາມລະບຽບກົດໝາຍ.
(ຂ່າວ: ແສງອາທິດ)
