ພິທີມອບ-ຮັບອາຄານໂຮງຊ່າງອົງຄະທຽມ – ເຄື່ອງຊ່ວຍຄໍ້າຊູ, ສາຂາສູນການແພດຟື້ນຟູໜ້າທີການແຂວງອຸດົມໄຊ ໄດ້ຈັດຂຶ້ນໃນຫວ່າງແລ້ວນີ້ ທີ່ໂຮງໜໍແຂວງອຸດົມໄຊ, ໂດຍການເຂົ້າຮ່ວມຂອງທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງ ສາທາລະນະສຸກ, ມີທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ມີແຂກຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂຄງການ ກໍ່ສ້າງອາຄານໂຮງຊ່າງອົງຄະທຽມ, ສາຂາ ສູນການແພດຟື້ນຟູໜ້າທີ່ການ ແຂວງອຸດົມໄຊ ແມ່ນໂຄງການ ທີ່ຈັດຕັ້ງປະຕິບັດພາຍໃຕ້ສັນຍາກໍ່ສ້າງ ລະຫວ່າງ ສູນການແພດຟື້ນຟູໜ້າທີ່ການ, ໂຄງການໂຄບ ແລະ ບໍລິສັດ ເວີນຄ້າກໍ່ສ້າງ ຈຳກັດ ລົງນາມ ຄັ້ງວັນທີ 13 ກຸມພາ 2023 ໃນມູນຄ່າທັງໝົດ 40.575,40 ໂດລາ, ມີຂະໜາດອາຄານກວ້າງ 11,5 ແມັດ ແລະ ຍາວ 16,5 ແມັດ ເປັນອາຄານຊັ້ນດຽວ. ໄດ້ເລີ່ມລົງມືກໍ່ສ້າງ ໃນວັນທີ 17 ກຸມພາ 2023 ແລະ ໄດ້ສຳເລັດ 100% ກາງປີ 2023 ຜ່ານມາ, ໂດຍໄດ້ຮັບການຊ່ວຍເຫຼືອທາງດ້ານງົບປະມານຈາກໂຄງການໂຄບ,
ຈຸດປະສົງຂອງໂຄງການ ສ້າງຂຶ້ນເພື່ອເປັນບ່ອນຊ່ວຍຊູຄົນເຈັບ, ຄົນພິການ ແລະ ເສຍອົງຄະ ຢູ່ແຂວງອຸດົມໄຊ ກໍຄືບັນດາແຂວງພາກເໜືອ ທັງເປັນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມ ກໍຄືການພັດທະນາວຽກງານຮັກສາສຸຂະພາບຂອງປະຊາຊົນຊາວແຂວງອຸດົມໄຊ.
(ຂາວ:ແສງອາທິດ)
