ນາງ ລົດແກ້ວ ອິນທະກຸມມານ ສາວນັກກິລາແລ່ນທົນທີມຊາດລາວ ຄວ້າ 2 ລາງວັນ ແລ່ນລາຍການ ພັດທະນາ ມາຣາທອນ 2023 ຫຼື “Amazing Thailand Pattaya Marathon 2023” ກໍຄືອັນດັບທີ 2 ປະເພດແລ່ນໄລຍະ 10 ກິໂລແມັດຍິງ ຮຸ່ນທົ່ວໄປ ແລະ ອັນດັບທີ 4 ປະເພດແລ່ນໄລຍະ 21 ກິໂລແມັດຍິງ ຮຸ່ນທົ່ວໄປ ຊຶ່ງງານດັ່ງກ່າວມີນັກກິລາຈາກທົ່ວໂລກເຂົ້າຮ່ວມຊີງໄຊຫຼາຍໝື່ນຄົນ.
ການແຂ່ງຂັນ ແລ່ນ Amazing Thailand Pattaya Marathon 2023 ຈັດຂຶ້ນ ເມື່ອທ້າຍອາທິດຜ່ານມາ ທີ່ແຂວງຊົນບູຣີ ປະເທດໄທ ລາຍການນີ້ ມີນັກກິລາທີ່ມາຈາກທົ່ວໂລກເຂົ້າຮ່ວມຫຼາຍໝື່ນຄົນ ແລະ ມີການຊີງໄຊທັງໝົດ 4 ລາຍການ, ໃນນັ້ນ ນາງ ລົດແກ້ວ ອິນທະກຸມມານ ໄດ້ເຂົ້າຮ່ວມແຂ່ງຂັນ 2 ລາຍການ ຈາກປະເພດແລ່ນໄລຍະ 10 ກິໂລແມັດຍິງ ຮຸ່ນທົ່ວໄປ ແລະ ແລ່ນໄລຍະ 21 ກິໂລແມັດຍິງ ຮຸ່ນທົ່ວໄປ ການແຂ່ງຂັນແມ່ນກຳນົດເສັ້ນທາງພາຍໃນເມືອງພັດທະຍາແຂ່ງຂັນ. ໂດຍ ລົດແກ້ວ ອິນທະກຸມມານ ສາວນັກກິລາແລ່ນທົນທີມຊາດລາວ ໃຫ້ສຳພາດຕໍ່ທີມງານສື່ມວນຊົນໜັງສືພິມສຶກສາ, ວິທະຍາດ ແລະ ກິລາ ອອນລາຍ ຂອງພວກເຮົາ ໃຫ້ຮູ້ວ່າ: ສຳລັບເປົ້າໝາຍຂອງຕົວນ້ອງເອງ ໃນປັດຈຸບັນ ແມ່ນຈະພະຍາຍາມສຸມໃສ່ການພັດທະນາການແລ່ນທົນໃຫ້ດີຂຶ້ນໄປເລື້ອຍໆ ກຽມເຂົ້າຮ່ວມງານແຂ່ງຂັນກິລາແລ່ນ-ລານ ເອຊຽນເກມ ຈະຈັດຂຶ້ນທີ່ແຂວງຫັງໂຈ ສປ ຈີນ ເປັນເຈົ້າພາບ ໃນທ້າຍເດືອນກັນຍາ 2024 ແລະ ງານຕ່າງໆ ຈະຈັດຂຶ້ນໃນທ້າຍປີນີ້ ຊຶ່ງເປົ້າໝາຍໃນການພັດທະນາຕົວນ້ອງເອງ ແມ່ນສືບຕໍ່ຝຶກຊ້ອມທຸກວັນ ມື້ລະ 2 ຄັ້ງ ກໍຄື ເຊົ້າ ແລະ ແລງ ແລ່ນພາກລະ 30 ຮອບ ຫຼື ບາງມື້ແມ່ນຫຼາຍກວ່າ 30 ຮອບ ຕາມມາດຕະຖານສາກົນ ທີ່ນັກກິລາລະດັບໂລກ ເຂົາເຈົ້າຝຶກຊ້ອມກັນ ໂດຍພັດປ່ຽນສະໜາມຝຶກຊ້ອມ ທີ່ສະໜາມກິລາສູນຝຶກກິລາແຫ່ງຊາດ ບ້ານສີເກີດ ແລະ ສະໜາມກິລາຈົ້າອານຸວົງ ແຕ່ມື້ໃດ ຫຍຸ້ງຍາກວຽກ ກໍຈະຊ້ອມທີ່ ເຈົ້າອານຸວົງ ເປັນຫຼັກ. ແນວໃດກໍດີ, ຂໍຝາກບັນດາພໍ່ແມ່ປະຊາຊົນຊາວລາວ ສົ່ງກຳລັງໃຈເຊຍນ້ອງຕື່ມ ເພື່ອເປັນກຳລັງໃຈໃນການເກັບຕົວຝຶກຊ້ອມ ແລ້ວນ້ອງຈະພະຍາຍາມເຮັດໃຫ້ສຸດຄວາມສາມາດ ເພື່ອບໍ່ທຸກຄົນຜິດຫວັງ.
ສຳລັບ 2 ລາງວັນ ໄດ້ຈາກອັນດັບທີ 2 ປະເພດແລ່ນໄລຍະ 10 ກິໂລແມັດຍິງ ໃນຮຸ່ນທົ່ວໄປ ດ້ວຍເວລາ 37 ນາທີ 20 ວິນາທີ ເປັນຮອງອັນດັບ 1 ນັກກິລາຈາກເອທີໂອປີ 1 ນາທີ 25 ວິນາທີ ແລະ ອັນດັບ 4 ປະເພດແລ່ນໄລຍະ 21 ກິໂລແມັດຍິງ ຮຸ່ນທົ່ວໄປ ເວລາ 1 ຊົ່ວໂມງ 28 ນາທີ 8 ວິນາທີ ຕາມຫຼັງອັນດັບໜຶ່ງນັກກິລາຈາກເອທີໂອປີ 7 ນາທີ.
ຂ່າວໂດຍ: ສົງການ ພັນແພງດີ
