ວິທະຍຸກະຈາຍສຽງຫວຽດນາມລາຍງານວ່າ: ວັນທີ 27 ກໍລະກົດ ຜ່ານມາ ຢູ່ຫໍສະພາແຫ່ງຊາດ ຫວຽດນາມ, ທ່ານ ເວືອງດິ່ງເຫວ້ ປະທານສະພາແຫ່ງຊາດ ຫວຽດນາມ ໄດ້ໃຫ້ການຕ້ອນຮັບທ່ານ ມາເອດະ ທາດະຊິ ປະທານສະພາບໍລິຫານທະນາຄານຮ່ວມມືສາກົນ ຍີ່ປຸ່ນ (JBIC) ທັງເປັນທີ່ປຶກສາພິເສດຂອງລັດຖະບານ ຍີ່ປຸ່ນ ຢ້ຽມຢາມ ແລະ ເຮັດວຽກ ຢູ່ ຫວຽດນາມ.
ຂ່າວລະບຸວ່າ: ໃນການພົບປະ, ທ່ານ ມາເອດະ ທາດະຊິ ໃຫ້ຮູ້ວ່າ: ໃນບັນດາກອງປະຊຸມຂອງກຸ່ມ 20 ພື້ນຖານເສດຖະກິດໃຫຍ່ທີ່ສຸດໃນໂລກ (G20) ໃນປີ 2022, ຍີ່ປຸ່ນ ໄດ້ສະເໜີຂໍ້ລິເລີ່ມປະຊາຄົມຫຼຸດການປ່ອຍອາຍພິດລົງມາເປັນລະດັບ 0 ຢູ່ອາຊີ (AZEC); ກຸ່ມ 7 ປະເທດທີ່ມີພື້ນຖານເສດຖະກິດພັດທະນາທີ່ສຸດໃນໂລກ (G7) ກໍພວມສຸມໃສ່ຜັນຂະຫຍາຍຂໍ້ລິເລີ່ມກ່ຽວກັບການຫັນປ່ຽນພະລັງງານແບບຍຸຕິທຳ (JETP). ເພື່ອຜັນຂະຫຍາຍຂໍ້ລິເລີ່ມດັ່ງກ່າວ, JBIC ໃຫ້ຄຳໝັ້ນສັນຍາຊ່ວຍເຫຼືອ 300 ລ້ານເອີໂຣ ຜ່ານທະນາຄານຫວຽດຄອມແບ້ງ (Vietcombank). ໃນການຢ້ຽມຢາມ ແລະ ເຮັດວຽກຢູ່ ຫວຽດນາມ ຄັ້ງນີ້, ຝ່າຍຍີ່ປຸ່ນ ປາຖະໜາວ່າ ຫວຽດນາມ ຈະສ້າງກຸ່ມປະຕິບັດງານລວມຜັນຂະຫຍາຍຂໍ້ລິເລີ່ມ AZEC ໂດຍໄວ. ທ່ານ ມາເອດະ ທາດະຊິ ຍັງໃຫ້ຮູ້ວ່າ: ຍີ່ປຸ່ນ, ອາເມຣິກາ ແລະ ອົສຕຣາລີ ກໍຈະສົມທົບກັນສະໜັບສະໜູນ ຫວຽດນາມ ແກ້ໄຂຜົນຮ້າຍຢ້ອນຫຼັງຂອງການປ່ຽນແປງດິນຟ້າອາກາດ. ຍີ່ປຸ່ນ ໄດ້ສ້າງຕັ້ງຂອບເຂດເພື່ອຊ່ວຍເຫຼືອຫວຽດນາມ ໃນບັນຫານີ້.
ທ່ານ ເວືອງດິ່ງເຫວ້ ເນັ້ນໜັກວ່າ: ເປົ້າໝາຍຫັນປ່ຽນພະລັງງານບໍ່ວ່າຢູ່ປະເທດໃດ ກໍເພື່ອຈຸດປະສົງຮັບປະກັນຄວາມໝັ້ນຄົງດ້ານພະລັງງານ. ທ່ານ ເວືອງດິ່ງເຫວ້ ກໍເຫັນດີຈັດສົ່ງຄະນະສະມາຊິກສະພາແຫ່ງຊາດ ເຂົ້າຮ່ວມກຸ່ມປະຕິບັດງານລວມ ແລະ ຫວັງວ່າ ຂໍ້ລິເລີ່ມ AZEC ຈະໄດ້ຜັນຂະຫຍາຍໂດຍໄວ ຢູ່ ຫວຽດນາມ.
