ຂ່າວຕ່າງປະເທດລາຍງານ ໃນວັນທີ 27 ກໍລະກົດ ຜ່ານມາ, ສຳນັກງານອຸຕຸນິຍົມວິທະຍາຍີ່ປຸ່ນໄດ້ເປີດເຜີຍບົດລາຍງານໂດຍລະບຸວ່າ: ຈຸດສັງເກດການສະພາບອາກາດທົ່ວປະເທດຫຼາຍກວ່າ 200 ແຫ່ງໄດ້ກວດວັດແທກອຸນຫະພູມໃນຍີ່ປຸ່ນສູງເຖິງ 35 ອົງສາຂຶ້ນໄປ ໂດຍບາງພື້ນທີ່ພົບກັບມື້ທີ່ອາກາດຮ້ອນທີ່ສຸດຂອງປີນີ້.
ເມືອງຮາໂຕຢາມະ ແຂວງໄຊຕາມະ ໃກ້ກັບນະຄອນຫຼວງໂຕກຽວ ວັດແທກອຸນຫະພູມໄດ້ສູງເຖິງ 39,7 ອົງສາ ຊຶ່ງເທົ່າກັບອຸນຫະພູມສູງທີ່ສຸດຂອງຍີ່ປຸ່ນໃນປີນີ້ ໂດຍການວັດແທກໄດ້ທີ່ເມືອງຄິຣິວ ແຂວງກຸນມະ ໃນວັນທີ 16 ກໍລະກົດ ຜ່ານມາ. ຂະນະທີ່ໃຈກາງນະຄອນຫຼວງໂຕກຽວ ແທກອຸນຫະພູມໄດ້ສູງເຖິງ 37,7 ອົງສາ ຊຶ່ງກາຍເປັນມື້ທີ່ອາກາດຮ້ອນທີ່ສຸດໃນປີນີ້ ສຳລັບນະຄອນຫຼວງຂອງຍີ່ປຸ່ນປະເຊີນກັບມື້ທີ່ມີອຸນຫະພູມສູງເກີນ 35 ອົງສາລວມຢ່າງໜ້ອຍ 8 ມື້ໃນເດືອນກໍລະກົດ ທຳລາຍສະຖິຕິ 7 ມື້ຂອງໄລຍະເວລາດຽວກັນໃນປີ 2001.
