ກອງປະຊຸມທາບທາມຄວາມເຊື່ອໝັ້ນໄວ້ວາງໃຈຕໍ່ການນຳພາຂອງຄະນະບໍລິຫານງານສູນກາງພັກ ກາງສະໄໝທີ XI ຈຸດທາບທາມ ຫ້ອງວ່າການສູນກາງພັກ ໄດ້ຈັດຂຶ້ນໃນວັນທີ 28 ກໍລະກົດ ນີ້ ໂດຍໃຫ້ກຽດເຂົ້າຮ່ວມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວປະທານປະເທດ ແຫ່ງ ສປປ ລາວ, ພາຍໃຕ້ການເປັນປະທານຂອງ ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ຄະນະເລຂາ ທິການສູນກາງພັກ ເລຂາຄະນະພັກຄະນະຈັດຕັ້ງສູນກາງພັກ, ມີກຳມະການຄະນະບໍລິຫານງານພັກ, ບັນດາສະຫາຍຄະນະປະຈຳພັກ, ຕາງໜ້າຂົງເຂດພັກ ແລະ ອົງການຈັດຕັ້ງມະຫາຊົນ ທັງໝົດ 11 ພາກສ່ວນເຂົ້າຮ່ວມ.
ຈຸດປະສົງທາບທາມຄັ້ງນີ້ ເພື່ອພ້ອມກັນເບິ່ງຄືນ ແລະ ຕີລາຄາລວມຂອງຄະນະບໍລິຫານງານສູນກາງພັກໃນການຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ກາງສະໄໝຜ່ານມາ ຕໍ່ກັບແຕ່ລະຂົງເຂດວຽກງານ ໂດຍຍົກໃຫ້ເຫັນດ້ານຕັ້ງໜ້າ, ດ້ານຫຍໍ້ທໍ້ ຫຼື ຈຸດອ່ອນຂໍ້ຄົງຄ້າງ, ສາເຫດທີ່ພາໃຫ້ມີຂໍ້ຄົງຄ້າງ ເພື່ອປັບປຸງແກ້ໄຂໃນຕໍ່ໜ້າ. ພ້ອມນັ້ນ, ຍັງໄດ້ພ້ອມກັນຄົ້ນຄວ້າມີຄວາມເຫັນຕີລາຄາບັນຫາຕ່າງໆ ທີ່ພົວພັນເຖິງຄຸນລັກສະນະມາດຖານຂອງພະນັກງານນຳພາ -ຄຸ້ມ ຄອງ; ນອກນີ້ ຍັງມີເປັນການເປີດກວ້າງປະຊາທິປະໄຕພາຍໃນພັກຂອງພວກເຮົາ ເພື່ອໃຫ້ປະກອບຄວາມເຫັນຕໍ່ຄວາມຮັບຜິດຊອບລວມຂອງຄະນະບໍລິຫານງານສູນກາງພັກ ແລະ ຄວາມຮັບຜິດຊອບໜ້າທີ່ການເມືອງຂອງແຕ່ລະສະຫາຍໃນຄະນະບໍລິຫານງານສູນກາງພັກ ແນໃສ່ປັບປຸງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ແລະ ມີຄວາມເປັນເອກະພາບສູງ ເພື່ອສືບຕໍ່ນຳພາ-ຊີ້ນຳ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໃຫ້ບັນລຸຕາມລະດັບຄາດໝາຍທີ່ວາງໄວ້.
ໃນໂອກາດນີ້, ສະຫາຍ ນາງ ສີໃສ ລືເດດມູນສອນ ໄດ້ມີຄຳເຫັນເນັ້ນໜັກບາງຕອນວ່າ: ການປະກອບຄຳຄິດຄຳເຫັນຂອງແຕ່ລະສະຫາຍໃນຄະນະບໍລິຫານງານສູນກາງພັກໃຫ້ເບິ່ງ ແລະ ຕີລາຄາຄຸນທາດການເມືອງ, ຄຸນສົມບັດສິນທຳປະຕິວັດ, ຄວາມຮັບຜິດຊອບຕໍ່ໜ້າທີ່ການເມືອງຂອງສູນກາງພັກກໍຄື ຄວາມຮັບຜິດຊອບໜ້າທີ່ການເມືອງແຕ່ລະສະຫາຍທີ່ໄດ້ຮັບການມອບໝາຍ ເບິ່ງຄວາມຮູ້, ຄວາມສາມາດ ກໍຄືຜົນສຳເລັດ ແລະ ບໍ່ສຳເລັດໃນການປະຕິບັດໜ້າທີ່ ທີ່ໄດ້ຮັບມອບໝາຍ, ເບິ່ງແບບແຜນນໍາພາ ແລະ ວິທີເຮັດວຽກ, ການເຄົາລົບ ແລະ ປະຕິບັດຫຼັກການນໍາພາຂອງພັກ; ເບິ່ງແນວຄິດ ແລະ ທັດສະນະ ໃນການຄົ້ນຄວ້າເບິ່ງບັນຫາຕ່າງໆ ຢ່າງຮອບຄອບ, ເລິກເຊິ່ງ, ພາວະວິໄສ; ເອົາໃຈໃສ່ ແລະ ຖືສໍາຄັນຕໍ່ວຽກງານກໍ່ສ້າງພັກ, ພະນັກງານ, ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ໃນຂະ ແໜງການ ແລະ ທ້ອງຖິ່ນທີ່ຕົນຮັບຜິດຊອບ.
ຂ່າວ: ຄະນະຈັດຕັ້ງສູນກາງພັກ
