ໂຄງການໂອກາດດ້ານການສຶກສາລາວ (ລີອ໊ອດ) ໄລຍະ III ໄດ້ຈັດກອງປະຊຸມສະຫຼຸບ-ປິດໂຄງການດັ່ງກ່າວ ເມື່ອວັນທີ 25 ກໍລະກົດ 2023 ທີ່ພະແນກສຶກສາທິການ ແລະ ກິລາແຂວງຫຼວງພະບາງ ໂດຍການເປັນປະທານຂອງ ທ່ານ ປອ ນາງ ບົວລອຍ ອິດທິພອນ ຮອງຫົວໜ້າພະແນກສຶກສາທິການ ແລະ ກິລາ ແຂວງຫຼວງພະບາງ, ມີຮອງຫົວໜ້າກົມການສຶກສານອກໂຮງຮຽນ, ຕາງໜ້າກົມຮ່ວມມືກັບຕ່າງປະເທດ ກະຊວງສຶກສາທິການ ແລະ ກິລາ, ກົມອົງການຈັດຕັ້ງສາກົນ ກະຊວງການຕ່າງປະເທດ, ຕາງໜ້າພະແນກການອ້ອມຂ້າງແຂວງ, ຫ້ອງວ່າການເມືອງ/ນະຄອນ, ຫ້ອງການສຶກສາທິການ ແລະ ກິລາເມືອງ ເປົ້າໝາຍ, ພະນັກງານໂຄງການ, ຫົວໜ້າ-ຮອງຫົວໜ້າຂະແໜງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນກອງປະຊຸມ ໄດ້ຮັບຟັງການລາຍງານຮ່າງບົດສະຫຼຸບ-ລາຍງານຜົນການຈັດຕັ້ງປະຕິບັດກິດຈະກໍາທ້າຍໂຄງການ ແລະ ປີດໂຄງການ ໂອກາດດ້ານການສຶກສາລາວ (ລີອ໊ອດ) ໄລຍະ III (2021-2023), ຈາກນັ້ນຜູ້ແທນກອງປະຊຸມທຸກພາກສ່ວນໄດ້ຮ່ວມກັນປະກອບຄຳຄິດຄໍາເຫັນຢ່າງກົງໄປກົງມາ ແລະ ມີເນື້ອໃນຢ່າງເລິກເຊິ່ງ ພ້ອມເຫັນດີຮັບຮອງເອົາບົດສະຫຼຸບ-ລາຍງານ ການຈັດຕັ້ງປະຕິບັດໂຄງການໂອກາດດ້ານການສຶກສາລາວ ທີ່ໄດ້ຊ່ວຍເຫຼືອວຽກງານການສຶກສາຢູ່ແຂວງຫຼວງພະບາງ ໄລຍະທີ III (2021-2023 ) ໂດຍພື້ນຖານ ແລະ ຮັບຮອງເອົາບົດສະຫຼຸບ-ລາຍງານການປະເມີນທ້າຍໂຄງການ, ກິດຈະກໍາການຝຶກອົບຮົມຄູພາສາອັງກິດ ໃຫ້ມີການປັບປຸງດ້ານງົບປະມານໃຫ້ສຳມະນາກອນ ແລະ ປ່ຽນຮູບແບບ ໃຫ້ວິທະຍາກອນລົງຝຶກອົບຮົມ ໃຫ້ຄູສອນຢູ່ຂັ້ນເມືອງເປົ້າໝາຍ, ພາຍຫຼັງກິດຈະກຳສຳເລັດ ແມ່ນມອບໃຫ້ຄະນະກຳມະການຂັ້ນເມືອງ ໃນການລົງກວດກາ, ຊຸກຍູ້ ແລະ ຕິດຕາມໂຄງການກໍ່ສ້າງອາຄານຮຽນ, ຫ້ອງນໍ້າ, ຫຼັງຈາກການສຳເລັດໂຄງການແລ້ວ, ອາຄານສູນ ລີອ໊ອດ ແລະ ທີ່ດິນ ແມ່ນມອບໂອນໃຫ້ພະແນກສຶກສາທີິການ ແລະ ກິລາແຂວງ. ນອກຈາກນີ້ ຄະນະກໍາມະການຄຸ້ມຄອງໂຄງການ ແຕ່ລະຂັ້ນ ຕ້ອງເພີ່ມຄວາມເອົາໃຈ ໃນໃສ່ຂອດການປະສານງານ, ການລົງຕິດຕາມ ຊຸກຍູ້ຊ່ວຍເຫຼືອ ໃນການຈັດຕັ້ງປະຕິບັດໂຄງການ ເພື່ອເປັນເອກະພາບກັນ ທາງດ້ານລະບຽບຫຼັກການ.
ໂອກາດນີ້, ທ່ານ ປອ ນາງ ບົວລອຍ ອິດທິພອນ ໄດ້ໃຫ້ກຽດມີຄໍາເຫັນວ່າ: ເພື່ອພ້ອມກັນສືບຕໍ່ໃນການຈັດຕັ້ງປະຕິບັດວຽກງານດັ່ງກ່າວໃນອະນາຄົດ ໃຫ້ມີຄວາມຖືກຕ້ອງສອດຄ່ອງຕາມລະບຽບຫຼັກການ ໂດຍສະເພາະໂຄງການໂອກາດດ້ານການສຶກສາລາວ (ລີອ໊ອດ) ຕ້ອງໄດ້ປະສານສົມທົບກັບຜູ້ປະສານງານໂຄງການ ແລະ ທຸກພາກສ່ວນທີ່ກ່ຽວຂ້ອງ ໃນການປັບປຸງບາງເນື້ອໃນ, ຂອດການປະສານງານ ເພື່ອເຮັດໃຫ້ການຈັດຕັ້ງປະຕິບັດວຽກງານໃນອະນາຄົດມີຄວາມສອດຄ່ອງກັບການປະຕິບັດຕົວຈິງ ພ້ອມກັນນັ້ນໃນແຕ່ລະເມືອງເປົ້າໝາຍ ໃຫ້ມີແຜນການໃນການນຳໃຊ້, ການປົກປັກຮັກສາ ແລະ ບຸລະນະອາຄານຮຽນ, ຫ້ອງນ້ຳ, ອຸປະກອນຮັບໃຊ້ການຮຽນການສອນທີ່ທາງໂຄງການໄດ້ກໍ່ສ້າງ ແລະ ມອບໃຫ້ບ້ານ, ໂຮງຮຽນໃຫ້ນຳໃຊ້ໄດ້ຢ່າງຍາວນານ.
ໂດຍ: ສອນອາຄົມ ແກ້ວຄຳເພັດ ສກຂ ຫຼວງພະບາງ
