ໃນຕອນເຊົ້າວັນທີ 21 ກໍລະກົດ 2023ນີ້ ຢູ່ທີ່ວິທະຍາໄລຄູສະຫວັນນະເຂດ ແຜນງານບີຄວາ ໄດ້ເປີດຊຸດ ຝຶກອົບຮົມ ໃຫ້ແກ່ກຸ່ມພະນັກງານຜູ້ເຮັດວຽກສຶກສານິເທດພາຍໃນ ເພື່ອຊ່ວຍເຫຼືອດ້ານການສອນ ໃນ 30 ເມືອງເປົ້າໝາຍ ຂອງແຜນງານບີຄວາ ເຊິ່ງຈະດຳເນີນໄປຈົນຮອດກາງ ເດືອນສິງຫາ 2023 ນີ້ ພ້ອມທັງ ມອບເຄື່ອງແທັບເລັດຈໍານວນ 35 ເຄື່ອງໃຫ້ວິທະຍາໄລຄູສະຫວັນນະເຂດເພື່ອນໍາໃຊ້ເຂົ້າໃນກາານການ ຝຶກອົບຮົມຄູຝຶກຜູ້ເຮັດວຽກສຶກສານິເທດພາຍໃນຄັ້ງທີ 2 ໂດຍໃຫ້ກຽດຮັບຂອງທ່ານ ລັດສະໝີ ພະໄຊສີ ຜູ້ອໍານວນການວິທະຍາໄລຄູສະຫວັນນະເຂດ.
ໃນໄລຍະການຝຶກອົບຮົມຊຸດໃໝ່ນີ້ຈະໃຊ້ເວລາ 5 ວັນ,ເຊິ່ງຈະໄດ້ຮຽນຮູ້ພື້ນຖານການນຳໃຊ້ແທັບເລັດ (ເລີ່ມຕົ້ນດ້ວຍການຮຽນນຳໃຊ້ແທັບເລັດ, ໜ້າທີ່ພື້ນຖານຂອງແທັບເລັດ ແລະ ການແກ້ໄຂບັນຫາ) ແລະ ວິທີການເຂົ້າເຖິງສື່ການຮຽນການສອນ ດິຈິຕອນທີ່ມີຢູ່ ເຊັ່ນ: ຊ່ອງທາງ ຢູທູບ ວິດີໂອ ສຳລັບການພັດທະນາຄູ ແລະ ທາງຄັງປັນຍາລາວ ແລະ ຍັງຈະໄດ້ຮຽນຮູ້ວິທີການນໍາໃຊ້ ອຸປະກອນ ເພື່ອການສື່ສານ ແລະ ຂໍ້ມູນຂ່າວສານ ສໍາລັບການເກັບຂໍ້ມູນ ແລະ ການເກັບບັນທຶກຂໍ້ມູນ ຈາກການລົງຕິດຕາມໂຮງຮຽນ. ຈຸດປະສົງແມ່ນເພື່ອໃຫ້ເຂົາເຈົ້າ ສາມາດປະສົມປະສານ ເຄື່ອງມືທັນສະໄໝ ເຂົ້າໃນພາລະບົດບາດຂອງເຂົາເຈົ້າ ໃນລະບົບການພັດທະນາວິຊາຊີບຄູແບບຕໍ່ເນື່ອງ ເພື່ອສ້າງຄວາມເຂັ້ມແຂງດ້ານຄຸນນະພາບດ້ານການສອນ ແລະ ປັບປຸງຜົນການຮຽນຂອງນັກຮຽນ ແລະ ການມີສ່ວນຮ່ວມ.ເຊິ່ງ ໃນລະບົບໃໝ່ຂອງການພັດທະນາວິຊາຊີບຄູແບບຕໍ່ເນື່ອງ ແລະ ການສະໜັບສະໜູນຄູຢ່າງຕໍ່ເນື່ອງ ແມ່ນໄດ້ອຳນວຍຄວາມສະດວກໂດຍທີມງານຜູ້ເຮັດວຽກສຶກສານິເທດພາຍໃນ ທີ່ໄດ້ຖຶກຄັດເລືອກໃນເດືອນ ກຸມພາ-ມີນາ 2023 ທີ່ຜ່ານມາ ໃນ 30 ເມືອງເປົ້າໝາຍຈາກ 7 ແຂວງ ມີແຂວງ(ຜົ້ງສາລີ, ຫຼວງນ້ຳທາ, ບໍ່ແກ້ວ, ຫົວພັນ, ຊຽງຂວາງ, ສະຫວັນນະເຂດ ແລະ ຄຳມ່ວນ). ທີມງານຜູ້ເຮັດວຽກສຶກສານິເທດພາຍໃນ ແມ່ນຖຶກຄັດເລືອກໂດຍອີງໃສ່ລະດັບໂຮງຮຽນ ແລະ ປະກອບມີ 1.043 ທ່ານ, ຜູ້ອໍານວຍການ ແລະ ຮອງອໍານວຍການ (40%) ແລະ ຄູ (60%). ໃນນັ້ນ 56% ຂອງສະມາຊິກທີມງານຜູ້ເຮັດວຽກສຶກສານິເທດພາຍໃນ ແມ່ນເພດຍິງ. ໃນ 3 ວິທະຍາໄລຄູ ເປົ້າໝາຍຄື: ວິທະຍາໄລຄູສະຫວັນນະເຂດ, ວິທະຍາໄລຄູຄັງໄຂ ແລະ ວິທະຍາໄລຄູຫຼວງນ້ຳທາ ເຊິ່ງຈະນຳພາທີມງານຜູ້ເຮັດວຽກສຶກສານິເທດພາຍໃນ ສ້າງຂີດຄວາມສາມາດເພື່ອໃຫ້ການຊ່ວຍເຫຼືອທີ່ມີຄຸນນະພາບແກ່ຄູສອນຊັ້ນປະຖົມສຶກສາ. ການຝຶກອົບຮົມຄັ້ງທີສອງ ແມ່ນຈະສຸມໃສ່ການປະຕິບັດການສອນທີ່ສາມາດນໍາໃຊ້ໃນຫ້ອງຮຽນ ແລະ ວິທີການນໍາໃຊ້ແທັບເລັດ ເພື່ອສະໜັບສະໜູນຄູໃນວຽກງານການພັດທະນາວິຊາຊີບຄູແບບຕໍ່ເນື່ອງ.
