ເມືອງໄຊບູລີ ແຂວງສະຫວັນນະເຂດມີຜູ້ຕິດເຊື້ອພະຍາດໄຂ້ຍຸງລາຍຕິດອັນດັບ 1 ຂອງແຂວງ. ເມື່ອບໍ່ດົນມານີ້ ທີ່ສະໂມສອນເມືອງ ຫ້ອງການສາທາ ລະນະສຸກເມືອງໄຊບູລີ ໄດ້ຈັດກອງປະຊຸມເພື່ອຂໍການສະໜັບສະໜູນໃນການຕ້ານ, ຄວບຄຸມ ແລະ ແກ້ໄຂການລະບາດຂອງພະຍາດໄຂ້ຍຸງລາຍ. ໂດຍການເປັນປະທານຂອງທ່ານ ແສງດາວ ສີດາໄລ ຫົວໜ້າພະແນກສາທາລະນະສຸກແຂວງ, ມີທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີ, ມີຄະນະນໍາເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນພິທີຕາງໜ້າຫ້ອງ ການສາທາລະນະສຸກເມືອງ ໄດ້ລາຍງານສະພາບການ ເຄື່ອນໄຫວວຽກງານໄຂ້ຍຸງລາຍ ແລະ ຂໍການສະໜັບສະໜູນຈາກທຸກພາກສ່ວນທີ່ເຂົ້າຮ່ວມກອງປະຊຸມ ໂດຍໄດ້ນໍາສະເໜີພາຍໃຕ້ຫົວຂໍ້: ຄວາມຮູ້ພື້ນຖານຂອງໄຂ້ຍຸງລາຍ, ສາເຫດທີ່ພາໃຫ້ເກີດການລະບາດ, ຂໍ້ມູນສະພາບໄຂ້ຍຸງລາຍໃນ ສປປ ລາວ, ການຄວບຄຸມໄຂ້ຍຸງລາຍປີ 2023 ຢູ່ເມືອງໄຊບູລີ, ບົດ ຮຽນດ້ານດີ-ດ້ານອ່ອນ, ແຜນຍຸດທະສາດປີ 2023 ແລະ ການສະໜັບສະໜູນຈາກພາກສ່ວນຕ່າງໆ, ສໍາລັບເມືອງໄຊບູລີເລີ່ມແຕ່ເດືອນມັງກອນ ຮອດວັນທີ 16 ກໍລະກົດ 2023 ມີຜູ້ຕິດ ເຊື້ອພະຍາດໄຂ້ຍຸງລາຍສະສົມທັງໝົດ 217 ກໍລະນີ, ເປັນອັນດັບ 1 ຂອງແຂວງສະຫວັນນະເຂດ, ເພີ່ມຂຶ້ນຫຼາຍທີ່ສຸດໃນເດືອນມິຖຸນາ ມີເຖິງ 110 ກໍລະນີ, ມີການລະບາດໃນ 33 ບ້ານທົ່ວເມືອງ, ບ້ານທີ່ພົບການລະບາດຫຼາຍກວ່າໝູ່ແມ່ນບ້ານຍາງຄໍ້າ ແລະ ນັບແຕ່ເດືອນມັງກອນເປັນຕົ້ນມາ ເມືອງໄຊບູລີ ໄດ້ມີການສໍາຫຼວດໜອນນໍ້າ ແລະ ເຮັດສຸກຂະສຶກສາທັງໝົດ 24 ຄັ້ງ, ແຈກຢາຍຢາຂ້າໜອນ ນໍ້າຈໍານວນ 5 ກິໂລ, ພົ່ນຢາຂ້າຍຸງ 1 ຄັ້ງທີ່ບ້ານກະຈຸ ຊຶ່ງເປັນບ້ານທໍາອິດທີ່ມີການລະບາດ.
ກອງປະຊຸມຄັ້ງນີ້ໄດ້ມີການປະກອບຄໍາຄິດຄໍາເຫັນໃນການຄວບຄຸມ, ແກ້ໄຂການລະບາດຂອງເຊື້ອພະຍາດໄຂ້ຍຸງລາຍ ໂດຍລວມໄດ້ມີການສະເໜີໃຫ້ທຸກພາກ ສ່ວນຮ່ວມແກ້ໄຂບັນຫາຕົ້ນເຫດຂອງການລະບາດດ້ວຍການຕັດວົງຈອນຊີວິດຂອງຍຸງ, ໂດຍປະຕິບັດຫຼັກການ 5 ປ ແລະ ມອບໃຫ້ຫ້ອງການສາທາລະນະສຸກເມືອງສົມທົບກັບການນໍາເມືອງ, ການຈັດຕັ້ງບ້ານ, ໂຮງໝໍນ້ອຍໃນທົ່ວເມືອງລົງປະຕິບັດຕົວຈິງນໍາພາປະຊາຊົນແຕ່ລະບ້ານໃນການເຄື່ອນ ໄຫວກິດຈະກໍາຕ້ານໄຂ້ຍຸງລາຍໂດຍດ່ວນ.
ໂອກາດນີ້, ຄະນະປະທານໄດ້ຮຽກຮ້ອງມາຍັງທຸກພາກສ່ວນໃນສັງຄົມຮ່ວມແຮງຮ່ວມໃຈກັນໃນການຄວບຄຸມ, ແກ້ໄຂການລະບາດຂອງພະຍາດດັ່ງກ່າວໃຫ້ເປັນປົກກະຕິຕໍ່ເນື່ອງ ເພື່ອເຮັດໃຫ້ການແຜ່ລະບາດຂອງເຊື້ອພະຍາດໄຂ້ຍຸງໃຫ້ຫຼຸດໜ້ອຍຖອຍລົງ ແລະ ໝົດໄປເທື່ອລະກ້າວ.
ຂ່າວ: ເມືອງໄຊບູລີ
