ວັນທີ 21 ກໍລະກົດ 2023 ຢູ່ທີ່ ຫ້ອງວ່າການນະຄອນຫຼວງ ວຽງຈັນ (ນວ) ທ່ານ ຫວງປົວເຊີງ ເລຂາທິການໃຫ່ຍ ສະ ຖາບັນຄົ້ນຄວ້າເສດຖະກິດ ແລະ ວັດທະນະທໍາຈີນ-ອາ ຊຽນ ໄດ້ນໍາພານັກທຸລະກິດ ແລະ ວິສາຫະກິດຈີນໃນຫຼາຍຂະແໜງການ ເຂົ້າພົບປະທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ.
ຈຸດປະສົງ ເພື່ອເປັນການແລກປ່ຽນຂໍ້ມູນ ແລະ ສົ່ງເສີມການຮ່ວມມືທາງດ້ານການຄ້າ ແລະ ການລົງທຶນ ໃຫ້ມີການພົວພັນ ຊຸກຍູ້ເຊິ່ງກັນ ແລະ ກັນເປັນຕົ້ນ ຂະແໜງອຸດສາ ຫະກໍາການຄ້າ ການລົງທຶນ ເຂດນິຄົມອຸດສາຫະກໍາ ເຂດທີ່ສາມາດລົງທືນຕາມເສັ້ນທາງລົດໄຟລາວ-ຈີນ ແລະ ອື່ນໆ ເພື່ອໃຫ້ພາກທຸລະກິດລາວ-ຈີນ ໄດ້ຮັບຜົນປະໂຫຍດສູງ ສຸດ.
ທ່ານ ນາງ ບົວວອນ ສຸກລາແສງ ຫົວໜ້າພະແນກແຜນ ການ ແລະ ການລົງທຶນ ນວ ໄດ້ລາຍງານສະພາບການພັດທະນາ ແລະ ການລົງທຶນຢູ່ ນວ ໂດຍຫຍໍ້ ໃຫ້ແກ່ນັກທຸລະກິດ ແລະ ວິສາຫະກິດຈີນ ຮັບຊາບ ເພື່ອເປັນທິດ ທາງໃນການປຶກສາຫາລືການຮ່ວມມືດ້ານຂົງເຂດຕ່າງໆເປັນຕົ້ນ ດ້ານກະສິກໍາ ການທ່ອງທ່ຽວ ການຮັກສາສິ່ງແວດ ລ້ອມ ການສຶກສາ ການດັດແປງເຄື່ອຂ່າຍໄຟຟ້າ ນະຄອນ ຫຼວງວຽງຈັນ ເຕັກນິກວິທະຍາສາດລະດັບສູງ ແລະ ການຂົນສົ່ງ ນອກຈາກນີ້ ຍັງໄດ້ແລກປ່ຽນກ່ຽວກັບການບໍາບັດນໍ້າເປື້ອນ ລວມໄປເຖິງການຈໍາກັດຂີ້ເຫຍື້ອ ແລະ ອື່ນໆ.
ພາຍຫຼັງຮັບຟັງການລາຍງານສໍາເລັດບັນດານັກທຸລະກິດ ແລະ ວິສາຫະກິດຈີນໄດ້ສະເໜີການຮ່ວມມືດ້ານຊີວະສາດ ໂດຍສະເພາະການຮັກສາຊີວະນາໆພັນເປັນການປົກປ້ອງຊີວະຕ່າງໆ ສະເໜີຫາຄູ່ຮ່ວມມືບໍາບັດນໍ້າເປື້ອນ ແລະ ການຮ່ວມທຶນດ້ານການຂົນສົ່ງຕື່ມອີກ.
………………………………………………
