(ສພຊ) ເພື່ອເປັນການແລກປ່ຽນບົດຮຽນ ແລະ ມີຄວາມຮັບຮູ້ເຂົ້າໃຈກ່ຽວກັບການກະກຽມດໍາເນີນກອງປະຊຸມ ຂອງສະພາປະຊາຊົນຂັ້ນແຂວງ ຊຸດທີ II ໃນໄລຍະຜ່ານມາ ເປັນຕົ້ນການກະກຽມ, ການດໍາເນີນ, ການຄົ້ນຄວ້າ, ການພິຈາລະນາ, ຮັບຮອງເນື້ອໃນກອງປະຊຸມ ເພື່ອເຫັນໄດ້ດ້ານດີທີ່ຈະຕ້ອງສືບຕໍ່ຈັດຕັ້ງປະຕິບັດ ແລະ ຂໍ້ຄົງຄ້າງທີ່ຈະຕ້ອງປັບປຸງແກ້ໄຂ ແລະ ເພື່ອເປັນການແນະນໍາການກະກຽມ ແລະ ຮັບໃຊ້ການປະເມີນຄວາມໄວ້ວາງໃຈຂອງບຸກຄະລາກອນ ທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ.
ໃນລະຫວ່າງວັນທີ 19-20 ກໍລະກົດ ນີ້ ທີ່ເມືອງວັງວຽງ ແຂວງວຽງຈັນ ກໍາມາທິການວຽກງານສະມາຊິກສະພາແຫ່ງຊາດ (ກວສຊ) ໄດ້ຈັດກອງປະຊຸມແລກປ່ຽນບົດຮຽນການດໍາເນີນກອງປະຊຸມ ຂອງສະພາປະຊາຊົນຂັ້ນແຂວງ (ສພຂ) ຊຸຸດທີ II ໂດຍການເປັນປະທານຂອງ ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ທັງເປັນຜູ້ຊີ້ນໍາວຽກງານຂອງກໍາມາທິການວຽກງານສະມາຊິກສະພາແຫ່ງຊາດ, ມີບັນດາທ່ານປະທານ-ຮອງປະທານກໍາມາທິການວຽກງານສະມາຊິກສະພາແຫ່ງຊາດ, ບັນດາທ່ານປະທານ-ຮອງປະທານ, ເລຂາ-ຮອງເລຂາທິການສະພາປະຊາຊົນຂັ້ນແຂວງຈາກ 18 ແຂວງທົ່ວປະເທດ ເຂົ້າຮ່ວມ ຊຶ່ງກອງປະຊຸມຄັ້ງນີ້ ໄດ້ຮັບການສະໜັບສະໜູນ ຈາກໂຄງການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).
ກອງປະຊຸມ ໄດ້ຮັບຟັງການສະເໜີບົດຕີລາຄາຜົນສໍາເລັດການດໍາເນີນກອງປະຊຸມຂອງສະພາປະຊາຊົນຂັ້ນແຂວງ ຊຸດທີ II ໃນໄລຍະຜ່ານມາ; ບົດກ່ຽວກັບການພົວພັນປະສານງານການກະກຽມດ້ານເນື້ອໃນ ເພື່ອນໍາເຂົ້າພິຈາລະນາໃນກອງປະຊຸມສະພາປະຊາຊົນນະຄອນຫຼວງ ແລະ ການຮ່າງມະຕິກອງປະຊຸມ; ບົດກ່ຽວກັບການບັນຊາກອງປະຊຸມຂອງປະທານ ແລະ ການປະກອບຄໍາເຫັນ, ຄໍາຊັກຖາມຂອງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ການສະເໜີບົດແນະນໍາ ກ່ຽວກັບການກະກຽມ ແລະ ດໍາເນີນການປະເມີນຄວາມໄວ້ວາງໃຈໃນການປະຕິບັດໜ້າທີ່ຂອງບຸກຄະລາກອນ ທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ ແລະ ການແນະນໍາການກະກຽມ ແລະ ດໍາເນີນກອງປະຊຸມຂອງສະພາປະຊາຊົນຂັ້ນແຂວງ ແລະ ການປະເມີນ 4 ກົດໝາຍ (ໃນຂົງເຂດສະພາແຫ່ງຊາດ) ຈາກນັ້ນ, ຜູ້ແທນກອງປະຊຸມໄດ້ຜັດປ່ຽນກັນປະກອບຄໍາຄິດຄໍາເຫັນ ເພື່ອແລກປ່ຽນບົດຮຽນ ຊຶ່ງກັນ ແລະ ກັນໃສ່ຫົວຂໍ້ທີ່ນໍາມາສະເໜີ ແລະ ຕາມຄໍາຖາມເຈາະຈີ້ມຂອງປະທານກອງປະຊຸມ ແລະ ໄດ້ຮັບຟັງການໂອ້ລົມຊີ້ທິດເຍືອງທາງໃນການປະຕິບັດໜ້າທີ່ຂອງສະພາປະຊາຊົນຂັ້ນແຂວງຈາກປະທານກອງຊຸມ.
(ຂ່າວ-ພາບ: ສອນສັກ ວັນວິໄຊ)
