ກະຊວງຍຸຕິທຳ ໄດ້ຈັດພິທີເຜີຍແຜ່ມະຕິກອງປະຊຸມຄົບຄະນະ ຄັ້ງທີ 6 ຂອງຄະນະບໍລິຫານງານສູນກາງພັກ ສະໄໝທີ XI, ວັນເກີດ ປະທານ ສຸພານຸວົງ (13 ກໍລະກົດ 1909 13 ກໍລະກົດ 2023) ຄົບຮອບ 114 ປີ, ມູນເຊື້ອການກໍາເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ ຂຶ້ນໃນວັນທີ 21 ກໍລະກົດ ນີ້ ທີ່ ກະຊວງຍຸຕິທຳ ໂດຍການເປັນປະທານຂອງ ສະຫາຍ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ມີບັນດາຮອງເລຂາຄະນະພັກ, ບັນດາຫົວໜ້າກົມ-ຮອງກົມ ພ້ອມດ້ວຍພະນັກງານ-ລັດຖະກອນ ເຂົ້າຮ່ວມຢ່າງພ້ອມພຽງ.
ໃນພິທີ, ສະຫາຍ ໄພວີ ສີບົວລິພາ ໄດ້ເຜີຍແຜ່ມະຕິກອງປະຊຸມຄົບຄະນະ ຄັ້ງທີ 6 ຂອງຄະນະບໍລິຫານງານສູນກາງພັກ ສະໄໝທີ XI ວ່າ: ກອງປະຊຸມດັ່ງກ່າວ ໄດ້ດໍາເນີນໃນວັນທີ 5-9 ມິຖຸນາ 2023 ທີ່ສໍານັກງານສູນກາງພັກປະຊາຊົນ ປະຕິວັດລາວ, ພາຍໃຕ້ການເປັນປະທານຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ. ກອງປະຊຸມ, ໄດ້ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນໍາຕໍ່ບັນຫາສໍາຄັນ ຄື: ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານ ແລະ ແຜນເງິນຕາ 6 ເດືອນຕົ້ນປີ ແລະ ຄາດຄະເນທິດທາງແຜນວຽກຈຸດສຸມ 6 ເດືອນທ້າຍປີ 2023, ຕິດພັນກັບການຕີລາຄາການປະຕິບັດວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍ ການແກ້ໄຂຢາເສບຕິດ, ຕີລາຄາເພີ່ມທະວີວຽກງານປ້ອງກັນຄວາມສະຫງົບ ໃນສະພາບການໃໝ່ ແລະ ທິດທາງແຜນການໃນຕໍ່ໜ້າ, ຕີລາຄາການຈັດຕັ້ງປະຕິບັດວຽກງານການພົວພັນຄົນເຊື້ອຊາດລາວ ຢູ່ຕ່າງປະເທດ ແຕ່ປີ 2007-2022 ແລະ ທິດທາງແຜນໃນຕໍ່ໜ້າ, ການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ, ໄດ້ປຶກສາຫາລື ແລະ ໃຫ້ທິດຊີ້ນໍາ ການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນໍາພາຂອງພັກ, ຄະນະບໍລິຫານງານສູນກາງພັກ ໄດ້ຄົ້ນຄວ້າ ແລະ ປະກອບຄວາມເຫັນຕໍ່ໂຄງຮ່າງ ໂຄງການການເມືອງຂອງພັກ ເພື່ອກໍານົດວິໄສທັດຍຸດທະສາດຍາວນານຂອງການປະຕິວັດຂອງພັກເຮົາ, ກໍານົດຈຸດໝາຍ, ເສັ້ນທາງກ້າວເດີນຂອງປະເທດຊາດໃນແຕ່ລະໄລຍະ ເພື່ອສືບຕໍ່ນໍາພາບັນລຸຕາມອຸດົມການຂອງພັກ ກໍຄື ຄວາມມຸ່ງມາດປາຖະໜາຂອງປະຊາຊົນລາວ, ກອງປະຊຸມໄດ້ວາງວຽກງານຈຸດສຸມ ໃນການນໍາພາຊີ້ນໍາ ແຕ່ນີ້ຮອດກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ XI ແລະ ວຽກງານອື່ນໆ.
ສະຫາຍ ບຸນທາ ຊົງເຍີທ່າວ ຮອງເລຂາຄະນະບໍລິຫານງານພັກ ຮອງລັດຖະມົນຕີກະຊວງຍຸຕິທຳ ກໍໄດ້ປາຖະກະຖາມູນເຊື່ອກ່ຽວກັບ ວັນເກີດຂອງປະທານ ສຸພານຸວົງ ຄົບຮອບ 114 ປີ ຊຶ່ງສະຫາຍໄດ້ຍົກໃຫ້ເຫັນວ່າ: ປະທານ ສຸພານຸວົງ ແມ່ນຜູ້ນຳສູງສຸດ ຂອງພັກ ແລະ ລັດ ຄົນໜຶ່ງ ທີ່ຕິດພັນກັບຂະບວນການປະຕິວັດ, ເພິ່ນໄດ້ຮ່ວມກັບຜູ້ນຳຄົນອື່ນໆ ນຳພາຂະບວນການຕໍ່ສູ້ປົດປ່ອຍຊາດ ກໍຄື ການປົກປັກຮັກສາ ແລະ ສ້າງສາພັດທະນາປະເທດຊາດ, ປະທານ ສຸພານຸວົງ ເປັນເຈົ້າຊາຍແດງ, ເປັນສັນຍາລັກ ຂອງຄວາມສາມັກຄີ, ເປັນວິສະວະກອນເອກ ຂອງປະເທດລາວ ແລະ ເປັນນັກການເມືອງທີ່ມີຈິດໃຈສາກົນອັນຜ່ອງໃສ, ເພິ່ນເປັນຜູ້ນຳທີ່ມີຈິດໃຈຮັກຊາດອັນສູງສົ່ງ, ຍອມເສຍສະຫຼະທຸກສິ່ງທຸກຢ່າງ ເພື່ອປະເທດຊາດ, ເພື່ອປະຊາຊົນ.
ຈາກນັ້ນ, ສະຫາຍ ນາງ ດວງມະນີ ລາວມາວ ປະທານ ຄະນະບໍລິຫານງານສະຫະພັນແມ່ຍິງ ກະຊວງຍຸຕິທຳ ກໍໄດ້ຂຶ້ນເຜີຍແຜ່ມູນເຊື້ອການກໍາເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ ຊຶ່ງຕະຫຼອດໄລຍະຜ່ານມາ ເອື້ອຍນ້ອງແມ່ຍິງໄດ້ປະກອບສ່ວນສຳຄັນເຂົ້າໃນພາລະກິດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ ແລະ ພັດທະນາປະເທດຊາດໃນປັດຈຸບັນ.
(ຂ່າວ-ພາບ: ບຸນຕອມ)
