ບໍລິສັດ ຊີມັງລາວ ມະຫາຊົນ ກໍຄື ໂຮງງານຊີມັງວັງວຽງ ຈະໄດ້ຮັບການພັດ ທະ ນາສະຖານທີ່ນີ້ເປັນສະຖານທີ່ທ່ອງທ່ຽວແບບປະສົມປະສານຄົບວົງ ຈອນ ພາຍຫຼັງໄດ້ຮັບຜົນກະທົບຈາກການລະບາດຂອງໂຄວິດ-19 ແລະ ສະພາບເສດຖະກິດ ຈົນເຮັດໃຫ້ຢຸດການຜະລິດ ປັດຈຸບັນກຳລັງດຳເນີນ ການຂໍໃບອະນຸຍາດລົງທຶນ ຄາດວ່າຈະໄດ້ຮັບໃບອະນຸຍາດໃນເດືອນ ສິງຫາ ທີ່ຈະມາເຖິງ.
ທ່ານ ຄຳບົນ ໄຊເລົ່າວົງ ຮອງຜູ້ອຳນວຍການລັດວິສາຫະກິດພັດທະນາກະສິ ກຳ ແລະ ອຸດສາຫະກຳ ແລະ ບໍລິການຂາເຂົ້າ-ຂາອອກໄດ້ໃຫ້ສຳພາດໃນ ໂອ ກາດສື່ມວນຊົນລາວ-ຈີນໄດ້ລົງໄປສຳພາດຕາມທາງລົດໄຟ ລາວ-ຈີນ ໃນ ຫົວຂໍ້ ໝູ່ເພື່ອນໜຶ່ງແລວໜຶ່ງເສັ້ນທາງ ໃນວັນທີ 17 ກໍລະກົດ 2023 ວ່າ: ພາຍຫຼັງທີ່ໂຮງງານໄດ້ຢຸດເຊົາທາງບໍລິສັດ ຊີມັງລາວ ມະຫາຊົນໄດ້ສະເໜີິ ຕໍ່ລັດຖະບານເພື່ອຊອກຫາວິທີປັບປຸງ ແລະ ຟື້ນຟູກິດຈະການດັ່ງກ່າວຈຶ່ງ ໄດ້ຮັບການສະໜັບສະໜູນຈາກລັດຖະບານ ແລະ ກະຊວງກ່ຽວຂ້ອງໃຫ້ ຫັນມາພັດທະນາສະຖານທີ່ນີ້ເປັນສະຖານທີ່ທ່ອງທ່ຽວແບບປະສົມປະສານຄົບວົງຈອນ ໂດຍປັດຈຸບັນບໍລິສັດ ຊີມັງລາວ ມະຫາຊົນແມ່ນກຳລັງດຳເນີນ ການຂໍໃບອະນຸຍາດລົງທຶນຈາກກະຊວງແຜນການ ແລະ ການລົງທຶນເພື່ອ ປ່ຽນຊື່ຈາກ ບໍລິສັດ ຊີມັງລາວ ມະຫາຊົນ ມາເປັນ ບໍລິສັດທ່ອງທ່ຽວ ວັດທະ ນະທຳ ມະຫາຊົນ ເຊິ່ງຄາດວ່າຈະໄດ້ຮັບໃບອະນຸຍາດໃນເດືອນສິງຫາ ປີ 2023 ເຊິ່ງບໍລິສັດດັ່ງກ່າວແມ່ນຈະມີສຳນັກງານໃຫຍ່ຕັ້ງຢູ່ ນະຄອນຫຼວງ ວຽງຈັນ ເຊິ່ງເປັນວິສາຫະກິດໃຫຍ່ຂອງປະເທດລາວ ທີ່ມີບໍລິສັດເຄື່ອຂ່າຍ ເຕັກໂນໂລຊີ ຢຸນນານຊຽນຫານຈຳກັດເປັນຂາຮຸ້ນຄອບຄຸ້ມກິດຈະການທັງ ເປັນບໍລິສັດຈົດທະບຽນຢູ່ຕະຫຼາດຫຼັກຊັບລາວ.
ພາຍຫຼັງໄດ້ຮັບໃບອະນຸຍາດການລົງທຶນແລ້ວກໍຈະເລີ່ມການກໍ່ສ້າງໄລຍະທີ 1 ໃນເນື້ອທີ່ 58 ເຮັກຕາຂອງໂຮງງານຊີມັງວັງວຽງຫຼັງ 2 ໃນທ້າຍປີ 2023 ເຊິ່ງ ຈະເລີ່ມກໍ່ສ້າງຈາກໂຮງງານຜະລິດຊີມັງທັງສອງຫຼັງໂດຍຈະມ້າງແຕ່ເຄື່ອງຈັກອອກແລ້ວປັບປຸງກໍ່ສ້າງໃຫ້ກາຍເປັນ ຫໍພິພິດຕະພັນອຸດສາຫະກຳລາວ ເພື່ອໄວ້ໃຫ້ລູກຫຼານ ແລະ ນັກທ່ອງທ່ຽວໄດ້ເຫັນເພາະໂຮງງານແຫ່ງນີ້ແມ່ນ ມີຄວາມສຳຄັນ ຊຶ່ງ ປີ 1997 ລັດຖະບານລາວ ໄດ້ພິມລົງເປັນສັນຍາລັກໜຶ່ງ ໃນພັນທະບັດໃບໜ້າພັນກີບ ພ້ອມນັ້ນກໍ່ຈະສ້າງໂຮງແຮມ ຮ້ານອາຫານ ສ້າງຄຸ້ມບ້ານຊົນເຜົ່າ ສະລອຍນໍ້າ ແລະ ມີແຜນພັດທະນາພູຍາງຢູ່ດ້ານຫຼັງ ຂອງໂຮງງານໃຫ້ກາຍເປັນສວນພຶກສາສາດໂດຍຄາດວ່າຈະນຳໃຊ້ທຶນກໍ່ສ້າງໃນໄລຍະທີ່ 1 ຈຳນວນ 100 ລ້ານໂດລາສະຫະລັດເຊິ່ງເປັນທຶນທີ່ນຳມາຈາກ ສປ ຈີນ.
ທ່ານ ຄຳບົນ ໄຊເລົ່າວົງ ໄດ້ກ່າວຕື່ມວ່າ: ການຫັນທຸລະກິດຜະລິດຊີມັງ ມາ ເປັນສະຖານທີ່ທ່ອງທ່ຽວແບບປະສົມປະສານຄົບວົງຈອນນີ້ແມ່ນການສ້າງພື້ນທີ່ສີຂຽວ ຮັກສາສະພາບແວດລ້ອມເໝືອນທຳມະຊາດແທ້ ແລະ ຄາດ ວ່າພາຍຫຼັງກໍ່ສ້າງສຳເລັດກໍຈະສາມາດສ້າງວຽກເຮັດງານທຳໃຫ້ປະຊາຊົນ ທ້ອງຖິ່ນໄດ້ຫຼາຍຮ້ອຍຄົນ ພ້ອມທັງໄດ້ມີແຜນຊຸກຍູ້ໃຫ້ປະຊາຊົນເຮັດການ ຜະລິດກະສິກຳ ປູກພືດຜັກ ເພື່ອສະໜອງໃຫ້ສະຖານທີ່ທ່ອງທ່ຽວຂອງ ພວກເຮົາເປັນການສ້າງລາຍຮັບໃຫ້ປະຊາຊົນ ແລະ ຈະເປັນການດຶງດູດນັກ ທ່ອງທ່ຽວໃຫ້ເດີນທາງມາທ່ອງທ່ຽວຢູ່ປະເທດລາວນັບມື້ນັບເພີ່ມຂຶ້ນ ໂດຍ ຜ່ານທາງລົດໄຟລາວ-ຈີນ ພ້ອມນັ້ນທາງບໍລິສັດຂອງພວກເຮົາຍັງໄດ້ສ້າງ ໂຮງແຮມ 21 ຊັ້ນຕັ້ງຢູ່ບ້ານ ໂພນພະເນົາ ນະຄອນຫຼວງວຽງຈັນເພື່ອຮອງ ຮັບນັກທ່ອງທ່ຽວນຳອີກດ້ວຍ.
ທຸກການເຄື່ອນໄຫວໃນການວາງແຜນດຳເນີນທຸລະກິດຂອງບໍລິສັດ ຊີມັງ ລາວ ມະຫາຊົນ ແມ່ນປະຕິບັດຕາມແນວທາງນະໂຍບາຍຂອງລັດຖະບານ ກ່ຽວກັບການຫັນທຸລະກິດຂອງຕົນໄປຕາມທິດຫັນວິກິດ ໃຫ້ເປັນໂອກາດ ຕັດສິນໃຈຫັນປ່ຽນດ້ວຍຕົນເອງ ໄປສູ່ທຸລະກິດທີ່ເກີດປະສິດທິຜົນສູງສຸດ.
