ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 16 ກໍລະກົດ ຜ່ານມານີ້, ກອງປະຊຸມລັດຖະມົນຕີການຕ່າງປະເທດການຮ່ວມມື ແມ່ຂອງ – ແມ່ນ້ຳຄົງຄາ (MGC) ຄັ້ງທີ 12 ໄດ້ຈັດຂຶ້ນດ້ວຍຮູບແບບທາງໄກ ໂດຍການເຂົ້າຮ່ວມຂອງ ຫວຽດນາມ, ກຳປູເຈຍ, ລາວ, ມຽນມາ, ໄທ, ອິນເດຍ. ທ່ານ ບຸ່ຍແທງເຊີນ ລັດຖະມົນຕີການຕ່າງປະເທດຫວຽດນາມ ເປັນຫົວໜ້າຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມ.
ທ່ານ ບຸ່ຍແທງເຊີນ ກ່າວຄຳເຫັນໃນກອງປະຊຸມ ວ່າ: ຫວຽດນາມ ຖືສຳຄັນ ແລະ ໄດ້ປະກອບສ່ວນຢ່າງມີປະສິດທິຜົນຕໍ່ການຮ່ວມມື MGC. ທ່ານເນັ້ນໜັກວ່າ: ໃນສະພາບໂລກມີການຫັນປ່ຽນຢ່າງວ່ອງໄວ, MGC ຄວນໃຫ້ບຸລິມະສິດ ແລະ ຊ່ວຍເຫຼືອປະເທດສະມາຊິກ ຍົກສູງກຳລັງແກ່ງແຍ່ງ ແລະ ການພັດທະນາແບບຍືນຍົງ. ທ່ານ ບຸ່ຍແທັງເຊີນ ຍັງໄດ້ສະເໝີ 3 ມາດຕະການ ຄື: 1. ເພີ່ມທະວີຊຸກຍູ້ການຮ່ວມມືເສດຖະກິດລະຫວ່າງບັນດາປະເທດ ແມ່ນ້ຳຂອງ ແລະ ອິນເດຍ, 2. ຮັບປະກັນອະນາຄົດສີຂຽວ ແລະ ຍືນຍົງໃຫ້ແກ່ຄົນຮຸ່ນຫຼັງ ຜ່ານການຮ່ວມມື ຮັບມືກັບສິ່ງທ້າທາຍດ້ານການຄ້ຳປະກັນສະບຽງອາຫານ – ນ້ຳ – ພະລັງງານ, ການຖ່າຍທອດເຕັກໂນໂລຊີ ແລະ ການລົງທຶນເຂົ້າໃນດ້ານພະລັງງານສະອາດ ແລະ ພະລັງງານທົດແທນ, ລະດົມບັນດາແຫຼ່ງກຳລັງສະໜັບສະໜູນວິວັດການຫັນປ່ຽນພະລັງງານ. 3. ຊຸກຍູ້ການພົບປະແລກປ່ຽນປະຊາຊົນ ປະກອບສ່ວນເພີ່ມທະວີນ້ຳໃຈມິດຕະພາບ ແລະ ການພົວພັນຄູ່ຮ່ວມມືລະຫວ່າງບັນດາປະເທດສະມາຊິກ MGC.
ກອງປະຊຸມໄດ້ປິດລົງດ້ວຍຜົນສຳເລັດຢ່າງຈົບງາມ ຜ່ານການຮັບຮອງເອົາຖະແຫຼງການຮ່ວມ ພ້ອມກັບເອກະສານຊ້ອນທ້າຍ 2 ສະບັບ ກ່ຽວກັບການປະສານງານການຮ່ວມມື MGC ຕາມຂົງເຂດ ແລະ ສ້າງຕັ້ງສະພາດຳເນີນທຸລະກິດ MGC. ບັນດາລັດຖະມົນຕີໄດ້ເຫັນດີເປັນເອກະພາບຈັດກອງປະຊຸມລັດຖະມົນຕີການຕ່າງປະເທດ ການຮ່ວມມື MGC ຄັ້ງທີ 13 ໃນປີ 2024.
