ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ວັນທີ 17 ກໍລະກົດ 2023 ນີ້, ທີ່ ສະຫະພັນແມ່ຍິງແຂວງ ໄດ້ຈັດກິດຈະກຳຮັບບໍລິຈາກເລືອດແບບສະໝັກໃຈ ເພື່ອສະເຫລີມສະຫລອງວັນສ້າງຕັ້ງ ສະຫະພັນແມ່ຍິງລາວ 20 ກໍລະກົດ ຄົບຮອບ 68 ປີ ໂດຍມີ ທ່ານ ນາງ ອິນທະວອນ ພົມມະຈັນ ປະທານສະຫະພັນແມ່ຍິງແຂວງ, ທ່ານ ວຽງສະຫວັນ ກະເສີມສຸກ ຫົວໜ້າອົງການກາແດງແຂວງ, ພ້ອມດ້ວຍຜູ້ສະໝັກໃຈບໍລິຈາກເລືອດ ເຂົ້າຮ່ວມ.
ທ່ານ ນາງ ອິນທະວອນ ພົມມະຈັນ ໄດ້ມີຄຳເຫັນວ່າ: ການຈັດກິດຈະກຳ ຮັບບໍລິຈາກເລືອດແບບສະໝັກໃຈຄັ້ງນີ້ ເປັນການປະຕິບັດແຜນການຮ່ວມມື ລະຫວ່າງ ສະຫະພັນແມ່ຍິງແຂວງ ແລະອົງການກາແດງແຂວງ ເພື່ອເປັນການສ້າງຂະບວນການຕ້ອນຮັບ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ ໃຫ້ມີບັນຍາກາດຟົດຟື້ນ ແລະ ມີຄວາມໝາຍອັນເລິກເຊິ່ງ; ການຮັບບໍລິຈາກເລືອດ ເປັນກິດຈະກຳໜຶ່ງທີ່ສຳຄັນ ເພາະການໃຫ້ເລືອດ ເປັນການຕໍ່ຊີວິດ ຕໍ່ລົມຫາຍໃຈຂອງຄົນເຈັບ ທີ່ກຳລັງຕ້ອງການເລືອດເຂົ້າໃນການປີ່ນປົວ, ທັງເປັນການສ້າງບຸນກຸສົນອັນຍິ່ງໃຫຍ່ຂອງຜູ້ໃຫ້, ກິດຈະກຳການບໍລິຈາກເລືອດແບບສະໝັກໃຈຄັ້ງນີ້ ມີຜູ້ສະໝັກໃຈຮ່ວມບໍລິຈາກເລືອດຫລາຍກວ່າ 100 ຄົນ ໄດ້ເລືອດຕົວຈິງ 102 ຖົງ.
ນອກຈາກ ກິດຈະກຳບໍລິຈາກເລືອດ, ສະຫະພັນແມ່ຍິງແຂວງ ໄດ້ສ້າງຂະບວນການຫລາຍຢ່າງເຊັ່ນ: ປຸກລະດົມເອື້ອຍແມ່ຍິງຢູ່ຕາມສຳນັກງານ, ອົງການອອກ ແຮງງານອະນາໄມຕາມສຳນັກງານ ແລະຖະໜົນຫົນທາງ, ການແຂ່ງຂັນກິລາ-ສິລະປະວັນນະຄະດີ, ການແລກປ່ຽນບົດຮຽນທາງດ້ານຫັດຖະ ກຳຕໍ່າແຜ່ນ ແລະ ຈັດປາຖະກະຖາ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ວັນທີ 20 ກໍລະກົດຄົບຮອບ 68 ປີ ຕື່ມອີກ.
