ເມື່ອບໍ່ດົນມານີ້, ໄດ້ມີກອງປະຊຸມປຶກສາຫາລື ກ່ຽວກັບການຊຸກຍູ້ສົ່ງເສີມມາດຕະຖານ ປີ້ງໄກ່ນາປົ່ງໃຫ້ມີຄຸນນະພາບໃໝ່ ຢູ່ເມືອງຄົງເຊໂດນ ແຂວງສາລະວັນ ໂດຍມີ ທ່ານ ສະໄໝ ໂພທິສານ ເຈົ້າເມືອງຄົງເຊໂດນ, ທ່ານ ນາງ ສອນທິດາ ອຸນາພົມ ປະທານບໍລິສັດ ພັດທະນາແຫລ່ງທ່ອງທ່ຽວ ນໍ້າຕົກຕາດເຍືອງ, ມີອຳນາດການປົກຄອງບ້ານ, ຜູ້ປະກອບການຂາຍປີ້ງໄກ່ນາປົ່ງ ເຂົ້າຮ່ວມ. ທັງນີ້ ກໍເພື່ອຊຸກຍູ້ສົ່ງເສີມ ແລະ ປັບປຸງ ປີ້ງໄກ່ນາປົ່ງ ໃຫ້ມີມາຕະຖານ, ມີຄຸນນະພາບໃໝ່ ແລະ ກາຍເປັນສະ ຖານທີ່ທ່ອງທ່ຽວ ວັດທະນະທຳ ເອກະລັກອາຫານທ້ອງຖິ່ນ ແຫ່ງໜຶ່ງທີ່ມີຄຸນນະພາບ, ເປັນເສດຖະກິດກັບທີ່ ທີ່ເຂັ້ມແຂງ ແລະ ຍືນຍົງ.
ກອງປະຊຸມຄັ້ງນີ້, ໄດ້ຜ່ານຂໍ້ຕົກລົງ ແລະ ມະຕິແຕ່ງຕັ້ງຂອງເຈົ້າເມືອງວ່າດ້ວຍການແຕ່ງຕັ້ງຄະ ນະປະສານງານ ກັບບໍລິສັດ ພັດທະນາແຫລ່ງທ່ອງທ່ຽວ ນໍ້າຕົກຕາດເຍືອງ ໃນການສົ່ງເສີມ, ຍົກລະດັບມາດຕະຖານປີ້ງໄກ່ນາປົ່ງ ໃຫ້ມີຄຸນນະພາບໃໝ່. ພ້ອມນີ້, ກອງປະຊຸມໄດ້ປຶກສາຫາລືຮ່ວມກັນເຖິງຈຸດປະສົງເປົ້າໝາຍ, ຮູບແບບ ແລະ ວິທີການຈັດຕັ້ງຮ່ວມກັບຜູ້ປະກອບການຫລາຍຮ້ານ ເຊິ່ງມີຄວາມຈຳເປັນຕ້ອງໄດ້ມີການປັບປຸງແບບມີສ່ວນຮ່ວມ ເພື່ອສົ່ງເສີມທ່າແຮງທີ່ມີຢູ່ ແລະ ຄວາມເປັນເອກະລັກຂອງປີ້ງໄກ່ນາປົ່ງ.
ບ້ານນາປົ່ງ, ເມືອງຄົງເຊໂດນ ຖືວ່າເປັນແຫລ່ງທ່ອງທ່ຽວວັດທະນະທຳ ດ້ານອາຫານ ທີ່ມີເອກະ ລັກທ້ອງຖິ່ນ ແລະ ມີຊື່ສຽງ ເປັນທີ່ນິຍົມຊົມຊອບຈາກສັງຄົມມາເປັນເວລາດົນນານ. ການຮ່ວມມືກັບພາກທຸລະກິດ ມີປະສົບການດ້ານການພັດທະນາແບບປະຊາຊົນມີສ່ວນຮ່ວມ ມາຊ່ວຍພັດທະນາເຂດດັ່ງກ່າວ ເພື່ອສ້າງຄວາມເຂັ້ມແຂງ, ຍົກລະດັບມາດຕະຖານອາຫານທ້ອງຖິ່ນ ກ້າວເຂົ້າສູ່ມາດຕະຖານສາກົນ ເພື່ອກະກຽມຄວາມພ້ອມ ການເປັນເຈົ້າພາບທີ່ດີ ຕ້ອນຮັບນັກທ່ອງທ່ຽວ ທີ່ຈະເດີນທາງ ເຂົ້າມາທ່ອງທ່ຽວ ຢ່າງຫລວງຫລາຍ ໃນປີ 2024 ທີ່ ສປປ ລາວ ເຮົາຈະເປັນເຈົ້າພາບ ກອງປະຊຸມທ່ອງທ່ຽວອາຊຽນ ແລະ ສ້າງບັນຍາກາດ ໃຫ້ເປັນການທ່ອງທ່ຽວ ການບໍລິການຄ້າ-ຂາຍ ໃຫ້ຄຶກຄື້ນ ຄືດັ່ງຄໍາຂວັນທີ່ວ່າ “ໝາກພ້າວນາໄຊ, ປີ້ງໄກ່ນາປົ່ງ, ເຫລົ້າຂາວເມືອງຄົງ ລຳວົງສາລະວັນ” ເຊື່ອມໂຍງກັບ ແຫລ່ງທ່ອງທ່ຽວອື່ນໆ ໃຫ້ຟົດຟື້ນ ຂະຫຍາຍຕົວ ແລະ ຍືນຍົງ.
ຂ່າວ: ມິ່ງແກ້ວ
ພາບ: ໂກ້
