ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ໃນໄລຍະ 6 ເດືອນຕົ້ນປີ 2023 ຜ່ານມາ ທົ່ວແຂວງໄຊສົມບູນ ໄດ້ຮັບຜົນເສຍຫາຍຈາກໄພພິບັດ ເກທອບ 2 ຕື້ກີບ. ໃນນັ້ນ, ໄດ້ເກີດໄຟໄໝ້ເຮືອນປະຊາຊົນຢູ່ເມືອງອະນຸວົງ, ທ່າໂທມ, ລ້ອງຊານ ແລະ ເມືອງຮົ່ມ ລວມທັງໝົດ 7 ຄັ້ງ, ລວມມູນຄ່າເສຍຫາຍ 680 ລ້ານກ່ວາກີບ, ເກີດເຫດ ການລົມພາຍຸພັດເຮືອນປະຊາຊົນ ແລະ ໂຮງຮຽນ ຢູ່ເມືອງອະນຸວົງ, ທ່າໂທມ ແລະ ເມືອງຮົ່ມ ຈໍານວນ 3 ຄັ້ງ, ມູນຄ່າ ເສຍຫາຍ 1.268 ລ້ານກ່ວາກີບ. ໃນຂະນະດຽວກັນ, ຄະນະກຳມະການຄຸ້ມຄອງໄພພິບັດແຂວງ ກໍໄດ້ໃຫ້ການຊ່ວຍເຫລືອປະຊາຊົນທີ່ຖືກຜົນກະທົບຈາກໄພທຳມະຊາດ ທັງໝົດ 296 ຄອບຄົວ. ໃນນັ້ນ, ຊ່ວຍເຫລືອສັງກະສີ 720 ແຜ່ນ, ເຂົ້າສານ 4,750 ກິໂລ, ເຫລັກຕະປູ 45 ກັບ, ຜ້າຫົ່ມ 200 ຜືນ, ມຸ້ງ 100 ດາງ, ໝີ່ສໍາເລັດຮູບ 50 ແກັດ ແລະ ເຄື່ອງໃຊ້ໃນຄົວເຮືອນ, ອຸປະກອນທໍາການຜະລິດ, ເຄື່ອງນຸ່ງຫົ່ມຈໍານວນໜຶ່ງ ລວມມູນຄ່າທັງໝົດ 335 ລ້ານກວ່າກີບ.
ຂໍ້ມູນດັ່ງກ່າວ, ໄດ້ຮັບການງານງານໃນກອງປະຊຸມ ສະຫລຸບວຽກງານຄຸ້ມຄອງໄພພິບັດ ແລະ ກອງທຶນສັງຄົມສົງເຄາະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຄະ ນະກຳມະການຄຸ້ມຄອງໄພພິບັດ ແຂວງໄຊສົມບູນ ໃນວັນທີ 17 ກໍລະກົດ 2023 ໂດຍການເປັນປະທານຂອງ ທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ປະທານຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ. ເຊິ່ງໄລຍະຜ່ານມາ ຄະນະກຳມະການຄຸ້ມຄອງໄພພິບັດຂັ້ນແຂວງ ໄດ້ເອົາໃຈໃສ່ຈັດຕັ້ງປະຕິບັດວຽກງານປ້ອງກັນ, ແກ້ໄຂສຸກເສີນ ແລະ ຟື້ນຟູຫລັງໄພພິບັດ ໂດຍໄດ້ອອກແຈ້ງການກ່ຽວກັບ ການເພີ່ມທະວີກະກຽມຄວາມພ້ອມຮັບມື ແລະ ຕອບໂຕ້ໄພພິບັດທີ່ອາດຈະເກີດຂຶ້ນຕາມລະດູການ, ໄດ້ຈັດຝຶກອົບຮົມຝຶກຊ້ອມກາງເຕັ້ນສຸກເສີນໃຫ້ຄະນະກຳມະການຂັ້ນແຂວງ, ລົງຊຸກຍູ້ສ້າງຄວາມເຂັ້ມແຂງໃຫ້ບັນດາບ້ານທີ່ມີຄວາມສ່ຽງ ໄດ້ຮັບຮູ້ເຂົ້າໃຈ ແລະ ມີຄວາມກຽມພ້ອມຮັບມືກັບໄພທຳມະຊາດທີ່ອາດຈະເກີດຂຶ້ນ.
ໃນກອງປະຊຸມ, ຄະນະກຳມະການຂັ້ນແຂວງ ແລະ ເມືອງ ໄດ້ພ້ອມກັນປະກອບຄໍາຄິດຄໍາເຫັນຕໍ່ບົດສະຫລຸບ 6 ເດືອນຕົ້ນປີ ເປັນຕົ້ນ ແມ່ນຕໍ່ກັບບັນຫາຄວາມຫຍຸ້ງຍາກຕ່າງໆ ໃນການຈັດຕັ້ງປະຕິ ບັດວຽກງານ, ການປະສານງານ, ການກະກຽມຄວາມພ້ອມໃນການຮັບມື ແລະ ການລະດົມທຶນຈາກພາກສ່ວນຕ່າງໆ. ທັງນີ້, ກໍເພື່ອຮັບປະກັນໃຫ້ວຽກງານປ້ອງກັນ, ຄວບຄຸມ ແລະ ການຟື້ນຟູຫລັງໄພພິບັດ ກໍຄື ມາດຕະການຈັດຕັ້ງປະຕິບັດວຽກງານ ໃນໄລຍະ 6 ເດືອນທ້າຍປີ 2023 ນີ້ ມີຄວາມເຂັ້ມແຂງ, ຮັດກຸມ, ມີປະສິດທິພາບ ແລະ ສາມາດທັນກັບເວລາ.
ຂ່າວ: ພາພອນ ນະວົງໄຊ
