ກຳປູເຈຍ ສົ່ງອອກສິນຄ້າກະສິກຳ ຫລຸດລົງ 22,5%

ສຳນັກຂ່າວຊິນຮວາ ຂອງ ສປຈີນ, ວັນທີ 16 ກໍລະກົດ, ກະຊວງ ກະສິກຳປ່າໄມ້ ແລະ ການປະມົງ ຂອງ ກຳປູເຈຍ ລາຍງານວ່າ: ການສົ່ງອອກ ສິນຄ້າ ກະສິກຳ ຂອງ ປະເທດນີ້ ໃນໄລຍະ 6 ເດືອນຕົ້ນປີນີ້ (ເດືອນມັງກອນ-ເດືອນມິຖຸນາ) ຫລຸດລົງ 22,5% ເມື່ອທຽບປີຕໍ່ປີ. ກະຊວງກ່ຽວຂ້ອງ ລະບຸວ່າ ກຳປູເຈຍ ມີລາຍໄດ້ ຈາກການສົ່ງອອກ ສິນຄ້າ ກະສິກຳ ໄປຍັງ 67 ປະເທດ ແລະ ພາກພື້ນ ຈຳນວນ 2,4 ຕື້ໂດລາ ສະຫະລັດ, ໂດຍ ສິນຄ້າ ກະສິກຳ ສົ່ງອອກສ່ວນຫລາຍ ໄດ້ແກ່ ເຂົ້າ, ຢາງພາລາ, ກ້ວຍສົດ, ພິກໄທ, ສາລີ ແລະ ອື່ນໆ. ການສົ່ງອອກ ຫລຸດລົງນີ້ ເນື່ອງຈາກວ່າ: ວິກິດການ ທາງເສດຖະກິດ ທົ່ວໂລກ ເຮັດໃຫ້ ການຄ້າຢຸດຈຶ້ງ ແລະ ຫລຸດກຳລັງການຊື້ ສິນຄ້າ ທຸກຊະນິດ. ນອກນັ້ນ ກະຊວງດັ່ງກ່າວ ຈະສືບຕໍ່ ສົ່ງເສີມ ບໍລິສັດ ເອກະຊົນ ເພື່ອຊອກຫາຜູ້ຊື້ສິນຄ້າ ກະສິກຳ ເພີ່ມຂຶ້ນ.