ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ສູນກາງສະຫະພັນແມ່ຍິງລາວ ສະໄໝທີ IV ຈັດຂຶ້ນໃນວັນທີ 17 ກໍລະກົດ 2023 ໂດຍໃຫ້ກຽດເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ, ໂດຍການເປັນປະທານຂອງ ສະຫາຍ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ເລຂາຄະນະບໍລິຫານງານພັກ, ປະທານສູນກາງສະພັນແມ່ຍິງລາວ, ມີບັຄະນະປະຈໍາພັກ ຄະນະພັກ, ສະມາຊິກພັກ ພາຍໃນສູນກາງສະຫະພັນແມ່ຍິງລາວ(ສສຍລ) ເຂົ້າຮ່ວມ.
ສະຫາຍ ນາງ ອິນລາວັນ ແກ້ວບຸນພັນ ໄດ້ໃຫ້ຮູ້ວ່າ: ກອງປະຊຸມຄັ້ງນີ້, ຈະໄດ້ພ້ອມກັນເຊື່ອມຊຶມບັນດາມະຕິຄໍາສັ່ງຂອງຄະນະເລຂາທິການສູນກາງພັກ, ຄຳແນະນຳວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ, ລວມທັງບັນດາຂໍ້ຂ້າມຂອງສະມາຊິກພັກ; ຈະໄດ້ພ້ອມກັນຕີລາຄາ ແລະ ທາບທາມ ຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນໃນຄະ ນະພັກ ຂອງສູນກາງສະຫະພັນແມ່ຍິງລາວ; ຮັບຟັງການລາຍງານຮ່າງບົດສະຫລຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກພັກ ຄັ້ງທີ IV ກາງສະໄໝຂອງ ອົງຄະນະພັກສູນກາງສະຫະ ພັນແມ່ຍິງລາວ ຕິດພັນກັບມະຕິ XI ຂອງພັກ, ການຈັດຕັ້ງປະຕິບັດແຜນພັດທະນາແມ່ຍິງລາວ ແລະ ການປະຕິບັດວາລະແຫ່ງຊາດ, ການສ້າງຫັນປ່ຽນຢ່າງແຂງແຮງໃນທຸກຂອດພະນັກງານ. ພ້ອມນີ້, ຍັງຈະໄດ້ດຳເນີນກອງປະຊຸມພາຍໃນຄະນະບໍລິຫານງານພັກກາງສະໄໝ ຂອງສູນກາງສະຫະພັນແມ່ຍິງລາວ ເພື່ອສຳຫລວດກວດກາ ແລະ ຕີລາຄາການນຳພາ-ຊີ້ນຳລວມ ຂອງອົງຄະນະພັກ ແລະ ບັນດາສະ ຫາຍໃນຄະນະພັກຕາມພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບ ທີ່ກວມເອົາດ້ານດີ ທີ່ເປັນພື້ນຖານ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ຈາກພຶດຕິກໍາຕົວຈິງຢ່າງພາວະວິໄສ.
ພ້ອມນີ້, ສະຫາຍ ວຽນທອງ ສິງຄຳພັນ ກຳມະການຄະນະພັກ, ຫົວໜ້າກົມຈັດຕັ້ງ ແລະ ພະນັກງານ, ຄະນະຮັບຜູ້ຊອບຈາກຄະນະຈັດຕັ້ງສູນກາງພັກ ໄດ້ຜ່ານຄໍາສັ່ງຂອງຄະນະເລຂາທິການສູນກາງພັກ ເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ, ຜ່ານມາດຖານຂອງພະນັກງານນຳພາ-ຄຸ້ມຄອງ, ສິດ ແລະ ໜ້າທີ່ຂອງຄະນະພັກ, ຂໍ້ຫ້າມສຳລັບສະມາຊິກພັກ.
ໃນໂອກາດດຽວກັນ, ສະຫາຍ ບຸນທອງ ຈິດມະນີ ໄດ້ມີຄຳເຫັນຕໍ່ການທາບທາມຢັ່ງຫາງສຽງຄວາມເຊື່ອໜັ້ນໄວ້ວາງໃຈຕໍ່ການນຳພາລວມ ແລະ ບຸກຄົນໃນຄະນະບໍລິຫານງານພັກ ສູນກາງສະຫະ ພັນແມ່ຍິງລາວ ເພື່ອໃຫ້ພະນັກງານຫລັກແຫລ່ງໄດ້ປະກອບຄຳຄິດຄຳເຫັນຂອງຕົນ ຕໍ່ຄວາມຮັບຜິດ ຊອບລວມຂອງຄະນະພັກ ໂດຍສະເພາະ ໃຫ້ລົງເລິກປະກອບຄິດຄຳເຫັນໃຫ້ບັນດາສະຫາຍຄະນະພັກດ້ວຍຄວາມຈິງໃຈ ເພື່ອຊ່ວຍປັບປຸງກໍ່ສ້າງພະນັກງານນຳພາ-ຄຸ້ມຄອງ ຂອງຕົນໃຫ້ມີຄວາມປອດໃສເຂັ້ມແຂງ, ໜັກແໜ້ນ ຮອບດ້ານ, ການປະກອບຄຳຄິດຄຳເຫັນ, ຕຳນິສົ່ງຂ່າວ ເພື່ອຊ່ວຍໃຫ້ພະນັກງານນຳພາ-ຄຸ້ມຄອງ ໄດ້ປັບປຸງປ່ຽນແປງຕົນເອງ, ແກ້ໄຂຈຸດອ່ອນ ແລະ ຂໍ້ຄົງຄ້າງ ເພື່ອກ້າວຂຶ້ນເຮັດສຳເລັດໜ້າທີ່ ທີ່ພັກ-ລັດມອບໝາຍໃຫ້.
ຂ່າວ-ພາບ: ໜັງສືພິມປະຊາຊົນ
