ໃນວັນທີ 14 ກໍລະກົດ 2023 ນີ້. ກອງພົນທີ 2 ໄດ້ຈັດພິທີປ່ອຍປາ ລົງສູ່ທໍາມະຊາດ ໂດຍການເຂົ້າຮ່ວມຂອງ ສະຫາຍ ພັນໂທ ຄຳພັດ ປະພັດສີີນ ຮອງຫົວໜ້າຫ້ອງພະລາທິການກອງພົນທີ 2, ມີຄະນະພັກ ຄະນະບັນຊາ 5 ອົງການ, ພະແນກການທີ່ກ່ຽວຂ້ອງ ຕະຫລອດຮອດ ພະນັກງານ-ນັກຮົບກອງຮ້ອຍຜະລິດເຂົ້າຮ່ວມ.
ໃນພິທິດັ່ງກ່າວ ສະຫາຍ ພັນໂທ ຄໍາພັດ ປະພັດສີີນ ຮອງຫົວໜ້າຫ້ອງພະລາທິການ ກອງພົນທີ 2 ໄດ້ກ່າວວ່າ ຕະຫລອດໄລຍະທີຜ່ານມາ ພັກ ແລະ ລັດຖະບານ ສປປ ລາວ ເຫັນໄດ້ຄວາມສໍາຄັນຂອງວຽກງານຄຸ້ມຄອງປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ ຈຶ່ງໄດ້ກຳນົດເອົາວັນທີ 13 ກໍລະກົດ ຂອງທຸກໆປີເປັນວັນອະນຸລັກສັດນໍ້າ-ສັດປ່າແຫ່ງຊາດ. ດັ່ງນັ້ນ ຄະນະພັກ ຄະນະບັນຊາກອງພົນ ຍາມໃດກໍ່ເຫັນໄດ້ຄວາມໝາຍຄວາມສຳຄັນຂອງວັນດັ່ງກ່າວທີ່ພັກ-ລັດຖະບານໄດ້ວາງອອກ ແລະ ໄດ້ຊີ້ນຳບັນດາອົງການ, ກົມກອງເຫລົ່າຮົບ ທີ່ຂື້ນກັບກອງພົນທີ 2 ຈົ່ງພ້ອມກັນເປັນເຈົ້າການໃນການໂຄສະນາປູກຈິດສຳນືກໃຫ້ແກ່ພະນັກງານ-ນັກຮົບ ແລະ ປະຊາຊົນບັນດາເຜົ່າໃຫ້ເຂົ້າມາມີສ່ວນຮ່ວມໃນການປົກປັກຮັກສາຊັບພະຍາກອນທຳມະຊາດ ສັດນ້ຳ – ສັດປ່າ ທີ່ຫາຍາກ ແລະ ມີຄວາມສ່ຽງໃກ້ຈະສູນພັນ ໄວ້ຢູ່ຄູ່ກັບ ສປປ ລາວ ກໍ່ຄືປະຊາຊົນລາວ ແລະ ລູກຫລານລາວຕະຫລອດໄປ
ພິທີປ່ອຍປາໃນຄັ້ງນີ້ ໄດ້ຈັດຂື້ນຢູ່ທີ່ອ່າງເກັບນໍ້າ ຂອງກອງຮ້ອຍຜະລິດ ກອງພົນທີ 2 ເພື່ອເປັນການປະກອບສ່ວນຄືນຄວາມສົມດູນໃຫ້ແກ່ທຳມະຊາດ ເຊິ່ງລູກປານຳມາປ່ອຍໃນຄັ້ງນີ້ ມີຈຳນວນທັງໝົດ 6.000 ໂຕ ໃນນັ້ນມີ ປານີນ ຈຳນວນ 2.000 ໂຕ, ປາໄນ ຈຳນວນ 2.000 ໂຕ ແລະ ປາອີນເດຍ ຈຳນວນ 2.000 ໂຕ.
ໂດຍ: ອານຸສັກ ອຳພັນວິໄລ
