ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງສາລະວັນ ຈັດພິທີເປີດປ້າຍໂຄສະນາ, ຢຸດລ່າ, ຢຸດຊື້ຂາຍສັດປ່າ ທີ່ດ່ານສາກົນລະໄລ ເມືອງສະໝ້ວຍ ໃນວັນທີ 14 ກໍລະກົດ ຜ່ານມານີ້, ໂດຍການເຂົ້າຮ່ວມຂອງ ທ່ານ ຈັນເພັງ ສາຍທຳມະວົງ ກຳມະການພັກແຂວງ ຫົວໜ້າຫ້ອງວ່າການແຂວງ, ທ່ານ ສີວັນພະກອນ ວົງບຸນທັນ ຮອງຫົວໜ້າພະແນກະສິກຳ ແລະ ປ່າໄມ້ແຂວງ, ທ່ານ ບຸນນານ ປັນຍາຈັກ ຮອງເລຂາພັກເມືອງ ປະທານກວດກາພັກ-ລັດເມືອງ, ມີທ່ານຮອງຫົວໜ້າກົມກອງກວດກາປ່າໄມ້, ຜູ້ຕາງໜ້າ ຈາກກົມກວດກາປ່າໄມ້ ແລະ ຄະນະປະສານງານເຄືອຂ່າຍບັງຄັບໃຊ້ກົດໝາຍຂັ້ນແຂວງ (P-WEN), ຫົວໜ້າ-ຄະນະຄຸ້ມຄອງດ່ານສາກົນລະໄລ, ຫົວໜ້າ-ຮອງຫົວໜ້າເຈົ້າ ໜ້າທີ່ປະຈໍາດ່ານຈາກ 8 ພາກສ່ວນ, ຕາງໜ້າເຈົ້າໜ້າທີ່ກອງກວດກາປ່າໄມ້ແຂວງ ແລະ ແຂກທີ່ຖືກເຊີນຈາກພະ ແນກ, ຫ້ອງການອ້ອມຂ້າງເມືອງເຂົ້າ ຮ່ວມ; ໃນພິທີໄດ້ຮັບຟັງການຜ່ານບົດລາຍງານການຈັດຕັ້ງປະຕິບັດວຽກງານບັງຄັບໃຊ້ກົດໝາຍວ່າດ້ວຍສັດນໍ້າ-ສັດປ່າ ຜ່ານມາ ຄະນະກອງກວດກາປ່າໄມ້ແຂວງ ໄດ້ປະສານສົມທົບກັບຄະນະປະສານງານ P-Wen ໃນການຈັດຝຶກອົບຮົມ, ໂຄສະ ນາເຜີຍແຜ່, ໄດ້ລົງກວດກາລາດຕະເວນຕາມຮ້ານ ແລະ ຕະຫຼາດ, ເກັບກຳຂໍ້ມູນ, ໃນການດຳເນີນຄະດີອາຊະຍາກຳ ແລະ ສັດປ່າ, ເກັບກຳຂໍ້ມູນກ່ຽວການບໍລິໂພກສັດປ່າ ແລະ ການມີໄວ້ຄອບຄອງ ໃນ 8 ເມືອງ ຢ່າງເປັນປະຈຳ ແລະ ຕໍ່ເນື່ອງ.
ຜ່ານການຈັດຕັ້ງປະຕິບັດ ໄດ້ກວດກາກັກຢຶດສັດປ່າ ຢູ່ຕະຫຼາດເທດສະບານ ເມືອງສາລະວັນ ໄດ້ 36 ໂຕ ແລະ ຊິ້ນສ່ວນຟານ 2,3 ກິໂລ (ມີນົກກະແຊວ, ນົກຖົ່ວ, ນົກເຄົ້າ, ງູສິງ, ກະຮອກ, ໄກ່ປ່າ ແລະ ສັດປະເພດຕ່າງໆ). ສຳລັບສັດທີ່ຍັງມີຊີວິດ ແມ່ນໄດ້ປ່ອຍຄືນສູ່ທຳມະ ຊາດ, ສ່ວນສັດທີ່ຕາຍ, ຊິ້ນສ່ວນ ແມ່ນທຳລາຍຖິ້ມ, ໄດ້ກວດຄົ້ນຫ້າງຮ້ານ ຢູ່ 2 ເມືອງຕະໂອ້ຍ ແລະ ເມືອງສະໝ້ວຍ ກວດ 25 ຮ້ານ, ພົບເຫັນ 15 ຮ້ານ ໃນນັ້ນພົບເຫັນ: ສັດປ່າທີ່ຍັງມີຊີວິດ 148 ໂຕ, ຊິ້ນສ່ວນເຂົາກວາງ 1 ອັນ, ຊິ້ນສ່ວນສັດປ່າ (ໝູປ່າ+ຟານ) 72 ກິໂລ, ເຄື່ອງມືລ່າສັດນ້ຳ-ສັດປ່າ ຈຳນວນ 2.225 ອັນ/ເສັ້ນ/ກິໂລ (ມີລູກປືນ, ລູກຫວ່ານ, ມາດ, ຂີ້ເຈຍ, ກັບເຫຼັກ, ກົງເຫຼັກ, ສາຍແຮ້ວລວດ), ກວດກາກັກຢຶດສັດປ່າຈຳນວນໜຶ່ງທີ່ລັກລອບເຄື່ອນຍ້າຍໃສ່ລົດໂດຍສານ, ສັດປ່າທີ່ກັກໄດ້ແມ່ນໄດ້ມອບໃຫ້ສູນມູນນິທິອະນຸລັກສັດປ່າ ລາວ ທີ່ເມືອງທຸລະຄົມ ແຂວງວຽນຈັນ ເພື່ອປິີນປົ່ວ ແລະ ບົວລະບັດຮັກສາ, ສ່ວນຜູ້ກະທໍາຜິດເຈົ້າໜ້າທີ່ປ່າໄມ້ ກຳລັງດຳເນີນການສືບສວນ-ສອບສວນ. ນອກນັ້ນກໍໄດ້ລົງເຄື່ອນໄຫວໂຄສະນາເຜີຍແຜ່ ກົດ ໝາຍສັດນໍ້າ-ສັດປ່າ ແລະ ນິຕິກຳຕ່າງໆ ກ່ຽວກັບການຄຸ້ມຄອງ ຊັບພະຍາກອນປ່າໄມ້, ຢູ່ແຕ່ລະບ້ານຂອງ 8 ເມືອງ (ທີ່ເປັນຈຸດລໍ່ແຫຼມ), ມີ 71 ບ້ານ, ມີຜູ້ເຂົ້າຮວມທັງໝົດ 1.959 ຄົນ ຍິງ 642 ຄົນ. ທັງນີ້ກໍເພື່ອເປັນການຫຼຸດຜ່ອນການຄ້າ-ຂາຍ ສັດປ່າທີ່ຜິດກົດໝາຍ ໂດຍຂະຫຍາຍການສ້າງຂີດຄວາມສາມາດໃນການສືບສວນ, ສະກັດກັ້ນ ແລະ ຂັດຂວາງເຄືອຂ່າຍອາຊະຍາກຳເປັນກຸ່ມ ແລະ ດຳເນີນຄະດີຕໍ່ຜູ້ທີ່ເຂົ້າຮ່ວມກ່ຽວກັບອາຊະຍາກຳສັດປ່າ; ຈາກນັ້ນ ໃນພິທີກໍໄດ້ມີການຕັດແຖບຜ້າ ເປີດປ້າຍ ຢຸດລ່າ-ຊື້ຂາຍສັດປ່າ ແລະ ຜະລິດຕະພັນສັດປ່າ-ພືດປ່າປະເພດຫວງຫ້າມ ຜູ້ກະທຳຜິດຈະຖືກລົງໂທດຕາມກົດໝາຍ ທີ່ດ່ານສາກົນລະໄລ ເມືອງສະໝ້ວຍ. ໂດຍການຮ່ວມຕັດແຖບຜ້າຂອງ ທ່ານ ຈັນເພັງ ສາຍທຳມະ, ທ່ານ ສີວັນພະກອນ ວົງບຸນທັນ, ທ່ານ ບຸນນານ ປັນຍາຈັກ ແລະ ທ່ານ ຄຳຜຸຍ ເທບວົງສາ ແລະ ພາກສວ່ນທີ່ກ່ຽວຂ້ອງເຂົ້າຮ່ວມຢ່າງເປັນທາງການ.
(ຂ່າວ-ພາບ: ທິດານີ ໂຄດໂຍທາ)
