ເນື່ອງໃນໂອກາດວັນສ້າງຕັ້ງແນວລາວສ້າງຊາດ ຄົບຮອບ 73 ປີ (13 ສິງຫາ 1950-13 ສິງຫາ 2023) ທີ່ສູນກາງແນວລາວສ້າງຊາດ ໃນວັນທີ 17 ກໍລະກົດ 2023 ແນວລາວສ້າງຊາດແຂວງຫຼວງພະບາງ ໄດ້ຈັດກິດຈະກໍາມາທັດສະນະສຶກສາ ຢູ່ນະຄອນຫຼວງວຽງຈັນ ນໍາພາໂດຍ ທ່ານ ອ່ອນສີ ຈາເພ້ຍວ່າ ຮອງປະທານແນວລາວສ້າງຊາດແຂວງຫຼວງພະບາງ ແລະ ໄດ້ເຂົ້າພົບປະຢ້ຽມຢາມ ທ່ານ ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດ.
ທ່ານຮອງປະທານແນວລາວສ້າງຊາດແຂວງຫຼວງພະບາງ ໄດ້ສະແດງຄວາມຂອບໃຈຕໍ່ທ່ານ ຈັນເພັງ ສຸດທິວົງ ທີ່ໄດ້ຕ້ອນຮັບ ພ້ອມທັງໄດ້ລາຍງານການເຄື່ອນໄຫວເຮັດວຽກ ແລະ ທັດນະສະສຶກສາຢູ່ນະຄອນຫຼວງວຽງຈັນ ໃນຄັ້ງນີ້ ໂດຍຫຍໍ້ໃຫ້ທ່ານຮອງປະທານສູນກາງແນວລາວສ້າງຊາດ ໄດ້ຮັບຊາບ.
ທ່ານ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຍ້ອງຍໍຊົມເຊີຍຕໍ່ຜົນງານໃນການເຄື່ອນໄຫວວຽກງານຂອງແນວລາວສ້າງຊາດ ແຂວງຫຼວງພະບາງ ພ້ອມທັງໄດ້ຊົມເຊີຍທີ່ໄດ້ຈັດກິດຈະກຳໃນການມາທັດສະນະສຶກສາຢູ່ນະຄອນຫຼວງວຽງຈັນ ໃນຄັ້ງນີ້ ເຊິ່ງເປັນການປະກອບສ່ວນເຂົ້າໃນຂະບວນສະເຫຼີມສະຫຼອງຂໍຄຳນັບຮັບຕ້ອນວັນສ້າງຕັ້ງແນວລາວສ້າງຊາດ ໃຫ້ມີຂະບວນການຟົດຟື້ນ.
ພ້ອມກັນນັ້ນ ຄະນະກໍ່ໄປທັດສະນະສຶກສາສາຢູ່ຫໍມູນເຊື້ອແນວລາວສ້າງຊາດ ແລະ ໄດ້ຮັບຟັງການບັນລະຍາຍກ່ຽວກັບປະຫວັດການກຳເນີດການເຕີບໃຫຍ່ຂະຫຍາຍຕົວ ແລະ ມູນເຊື້ອອັນສະຫງ່າລາສີຂອງແນວລາວສ້າງຊາດ ໂດຍຜ່ານສາມໄລຍະປະຫວັດສາດ ຄື: ແນວລາວອິດສະຫຼະແນວລາວຮັກຊາດ ແລະ ແນວລາວສ້າງຊາດ.
